“Олон улсын болон Монголын ахмадын өдөр”-ийг тохиолдуулан Цагдаагийн ерөнхий газрын ахмад ажилтнуудад хүндэтгэл үзүүлж, хүлээн авах арга хэмжээг өнөөдөр /2022.09.30/ Цагдаагийн ерөнхий газарт зохион байгууллаа.

Энэхүү хүндэтгэлийн арга хэмжээнд Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд, Цагдаа, дотоодын цэргийн байгууллагын ахмадын хорооны дарга, хошууч генерал Ч.Амарболд, Монгол Улсын гавьяат хуульч, хошууч генерал Д.Сандаг-Очир, Цагдаагийн ерөнхий газрын Тэргүүн дэд дарга, бригадын генерал Ц.Ням-Очир болон Цагдаагийн ерөнхий газрын ахмад ажилтнууд оролцсон юм.

Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд хэлэхдээ: “Улс, эх орныхоо бүрэн эрхт байдал, тусгаар тогтнол, бүтээн байгуулалт, ард иргэдийнхээ амар амгалан аюулгүй амьдрал, хойч үеийнхээ ирээдүйн сайн сайхны төлөө цуцалтгүй хөдөлмөрлөж ирсэн. Та бүхэндээ Монгол төрийн цагдаа, дотоодын цэргийн байгууллагын нийт бие бүрэлдэхүүн, Цагдаагийн ерөнхий газрын даргын зөвлөлийн гишүүдийнхээ нэрийн өмнөөс болон хувиасаа “Олон улсын болон Монголын ахмадын өдөр”-ийн баярын мэндийг хүргэе.

Өнгөрсөн хоёр жилийн хугацаанд дэлхий нийтэд тархсан цар тахлын улмаас ахмадууд та бүхэнтэйгээ нүүр тулан уулзаж, хүндэтгэл үзүүлж чадаагүй билээ. Харин өнөөдөр ийнхүү уулзаж байгаадаа туйлын баяртай байна. Хүндэтгэлийн арга хэмжээнд хүрэлцэн ирсэн ахмадууддаа болон гэр бүлийнхэнд тань чин сэтгэлийн баярын мэндчилгээ дэвшүүлж, эрч хүчтэй, эрүүл энх байж, хойч үе бидэндээ үнэт сургаалаа хайрлаж, мартсаныг сануулж, алдсаныг ухааруулж байхыг хүсье.” хэмээв.

Мөн энэ үеэр 11 ахмад ажилтныг Ардын хувьсгалын 100 жилийн ойн хүндэт медалиар шагнаж, урамшууллаа.