Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

ОХУ-ЫН ДОТООД ХЭРГИЙН ЯАМНЫ ХАРЬЯА АКАДЕМИД СУРАЛЦАХ АЛБА ХААГЧ, СОНСОГЧДОД ЦОЛ ОЛГОХ, ТАНГАРАГ ӨРГӨХ, СУРГАЛТЫН ГЭРЭЭ БАЙГУУЛАХ АРГА ХЭМЖЭЭГ ЗОХИОН БАЙГУУЛЛАА

Хууль зүй, дотоод хэргийн сайд, Цагдаагийн ерөнхий газрын даргын тушаалаар Оросын Холбооны Улсын Дотоод хэргийн яамны харьяа академи, их, дээд сургуулиудад 2022-2023 оны хичээлийн жилд 16 алба хаагч, сонсогч, ерөнхий боловсролын сургуулийн төгсөгчдийг суралцуулахаар шийдвэрлэсэн юм.

Цагдаагийн байгууллагын захиалгаар суралцах эрх авсан алба хаагч, суралцагчдад цол олгох, тангараг өргөх, сургалтын гэрээ байгуулах арга хэмжээг Цагдаагийн ерөнхий газрын “Сүлд” чуулгын танхимд зохион байгууллаа.

“ЖАГСААЛ ЦУГЛААНЫ ҮЕД ХУУЛЬ САХИУЛАХАД ХҮНИЙ ЭРХИЙГ ХАНГАХ НЬ” СУРГАЛТ ЗОХИОН БАЙГУУЛАГДЛАА

Цагдаагийн ерөнхий газар, Хүний эрхийн үндэсний комисс, Европын аюулгүй байдал, хамтын ажиллагааны байгууллагууд хамтран нийтийн хэв журам хамгаалах, олон нийтийн аюулгүй байдлыг хангах чиглэл хариуцсан удирдах албан тушаалтан, алба хаагчдын мэдлэг, ур чадварыг дээшлүүлэх зорилгоор удирдах албан тушаалтнуудад “Жагсаал цуглааны үед хууль сахиулахад хүний эрхийг хангах нь” сэдэвт сургалтыг 2022 оны 09 дүгээр сарын 14-нөөс 16-ны өдрүүдэд зохион байгууллаа.

Тус сургалтыг Европын аюулгүй байдал, хамтын ажиллагааны байгууллагын Ардчилсан институт, Хүний эрхийн газрын хүний эрхийн шинжээч, ноён Павел Хацук, Олон улсын цагдаагийн зөвлөх, ноён Гери Вайт нар явуулсан юм.

Сургалтын хаалтын үйл ажиллагаанд Хүний эрхийн үндэсний комиссын гишүүн, PhD Б. Энхболд, ЦЕГ-ын НХЖХОНАБХА-ны дарга, цагдаагийн хурандаа Н.Лхагвасайхан нар оролцож сургалтад хамрагдсан ажилтан, алба хаагчдад сертификат гардууллаа.

ДОТООДЫН ЦЭРГИЙН ШТАБААС ЭМЭГТЭЙ АЛБА ХААГЧДЫН АЛБАНЫ МЭДЛЭГ, УР ЧАДВАРЫГ ДЭЭШЛҮҮЛЭХ СУРГАЛТ ЗОХИОН БАЙГУУЛЛАА

Дотоодын цэргийн штабаас анги, тусгай салбарын эмэгтэй алба хаагчдын Цэргийн хэргийн болон албаны мэдлэг, ур чадварыг дээшлүүлэх сургалтыг энэ оны 09 дүгээр сарын 12, 13-ны өдрүүдэд зохион байгууллаа.

Сургалтаар “Эмэгтэйчүүдийн харилцааны соёл, хандлага, биеэ хэрхэн зөв авч явах, хувийн зохион байгуулалт”, “Эмэгтэй алба хаагчдын сэтгэл зүйн байдал, мэргэжлээс шалтгаалах өөрчлөлтүүд, урьдчилан сэргийлэх нь”, “Цэргийн албаны зохион байгуулалт”, “Биеийн хүч, нэг бүрийн тусгай хэрэгсэл, галт зэвсэг хэрэглэх”, “Осол гэмтлийн үед эмнэлгийн анхны тусламж үзүүлэх”, Жагсаалын бэлтгэл”, “Цэргийн байр зүй”, Нийтийг хамарсан жагсаал цуглааны үед өгөгдөх командуудыг гүйцэтгэх”, “Үй олноор хөнөөх зэвсгээс хамгаалах бэлтгэл”, “Автомат болон гар бууны хагас задаргаа” зэрэг 13 чиглэлээр танхимын болон дадлагын сургалтыг явууллаа.

“МЭДЭЭЛЭЛ СУРТАЛЧИЛГААНЫ ГАЛТ ТЭРЭГ” АЯН ЭХЭЛЛЭЭ

Төмөр зам дахь цагдаагийн газраас Улаанбаатар төмөр замын гэмт хэрэг, зөрчлөөс урьдчилан сэргийлэх ажлыг зохицуулах зөвлөлтэй хамтран “Мэдээлэл сурталчилгааны галт тэрэг аян”-ыг энэ оны 09 дүгээр сарын 12-ны өдрөөс эхлэн Замын-Үүд, Сайншанд, Чойр, Сэлэнгэ, Дархан, Эрдэнэт, Зүүнхараа өртөөнд зохион байгуулж байна. Энэхүү аян энэ сарын 23-ныг хүртэл үргэлжлэх бөгөөд аяны хүрээнд шугам замд ажиллаж байгаа төмөр замчид болон Улаанбаатар төмөр замаар үйлчлүүлж байгаа иргэд, зорчигчдод гэмт хэрэг, зөрчлөөс урьдчилан сэргийлэх чиглэлээр мэдээ мэдээлэл өгч, хууль эрх зүйн сургалтууд зохион байгуулагдана.

"SIGNATURE" ХАРИЛЦАГЧИЙН "1000-0" АЯН ЭХЭЛЛЭЭ

Тээврийн цагдаагийн албанаас "Хаан банк"-тай хамтран ажиллах санамж бичгийн хүрээнд хүүхдийг зам тээврийн осол хэргээс урьдчилан сэргийлэх чиглэлээр "Signature" харилцагчийн "1000-0" аяныг 09 дүгээр сарын 01-ний өдрөөс эхлэн 3 сарын хугацаанд эхлүүлээд байна. Аяны хүрээнд нийслэл хотын алслагдсан гэр хорооллын орчимд байрлах эрсдэл бүхий ерөнхий боловсролын 5 сургууль орчмын бүсэд стандартын хурд сааруулагч тэмдэг, тэмдэглэл хийлгэн 3000 ширхэг цацруулагчтай бугуйвчийг 1-5 дугаар ангийн сурагчдад тараан ажиллалаа.