Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

МӨРДӨН ШАЛГАХ ГАЗРЫН НЭРЭМЖИТ “ХӨЛ БӨМБӨГ”-ИЙН АВАРГА ШАЛГАРУУЛАХ ТЭМЦЭЭН ЗОХИОН БАЙГУУЛАГДАЖ БАЙНА

Нийтийн биеийн тамир, спортыг сурталчлах, алба хаагчдын бие бялдрын бэлтгэлийг хангуулах, хөгжүүлэх, хөдөлгөөний дутагдлаас урьдчилан сэргийлэх, чөлөөт цагийг зөв боловсон өнгөрүүлэх, алба хаагчдыг тэмцээн, уралдаанд идэвхтэй оролцуулах зорилгоор Нийслэлийн цагдаагийн удирдах газрын Мөрдөн шалгах газрын нэрэмжит “Хөл бөмбөг”-ийн тэмцээн зохион байгуулагдлаа.

Энэхүү тэмцээн Чингэлтэй дүүргийн “Хайрхан хөгжил”-ийн төвд зохион байгуулагдаж, тэмцээнд Нийслэлийн цагдаагийн удирдах газар, Баянгол, Баянзүрх, Сонгинохайрхан, Сүхбаатар, Чингэлтэй, Хан-Уул дүүрэг дэх цагдаагийн газрын долоон багийн 105 тамирчин хурд хүч, авхаалж самбаагаа сорин өрсөлдсөн юм.

“АЗИ ТИВИЙН АВАРГА ШАЛГАРУУЛАХ ТЭМЦЭЭН”-ЭЭС ХОС ХҮРЭЛ МЕДАЛЬ ХҮРТЛЭЭ

Олимпын таеквондогийн өсвөр үе, залуучуудын “Ази тивийн аварга шалгаруулах тэмцээн” энэ оны 08 дугаар сарын 22-ноос 28-ны өдрүүдэд Вьетнам Улсын Хо Ши Мин хотод амжилттай зохион байгуулагдлаа.

Энэхүү тэмцээнд Цагдаагийн ерөнхий газрын "Хүч" спорт хорооны өсвөр үе, залуучуудын хоёр тамирчин оролцож, спортын мастер Т.Тэмүүлэн “-57 кг”-ийн жинд, спортын мастер А.Азбаяр “+78 кг”-ийн жинд тус тус гуравдугаар байр эзэлж, “Хүрэл” медаль хүртсэн юм.

Тэмцээнд амжилттай оролцсон тамирчдынхаа сурлага, спортод өндөр амжилт хүсье!

"ХАМТЫН АЖИЛЛАГААНЫ АЮУЛГҮЙ БАЙДАЛ, ХАМТЫН ХӨГЖИЛ ЦЭЦЭГЛЭЛТ" СЭДЭВТ ЦАХИМ УУЛЗАЛТ БОЛЛОО

Бүгд Найрамдах Хятад Ард Улсын Нийгмийг аюулаас хамгаалах яамнаас “Лиан Юун Ган” олон улсын форумыг цахим дугуй ширээний уулзалт хэлбэрээр зохион байгууллаа.

Цахим уулзалтад Бүгд Найрамдах Беларусь Улс, Бүгд Найрамдах Серби Улс, Өмнөд Африкийн Бүгд Найрамдах Улс, Оросын Холбооны Улс, Бүгд Найрамдах Ардчилсан Лаос Ард Улс, Исламын Бүгд Найрамдах Пакистан Улс, Камбожийн Хант Улс, Бүгд Найрамдах Аргентин Улс зэрэг дэлхийн 10 гаруй улс орны хууль сахиулах байгууллагын удирдах албан тушаалтнууд оролцлоо.

Энэ удаагийн цахим уулзалт нь "Хамтын ажиллагааны аюулгүй байдал, хамтын хөгжил цэцэглэлт" сэдэвтэй бөгөөд дээрх чиглэлээр цаашид хийж хэрэгжүүлэх ажил, арга хэмжээний талаар оролцогч нартай санал солилцох зорилготой юм.

"ХИЧЭЭЛ ЭХЭЛЛЭЭ" ЕРӨНХИЙ АРГА ХЭМЖЭЭГ ЗОХИОН БАЙГУУЛЖ БАЙНА

Их, дээд болон коллеж, ерөнхий боловсролын сургууль, цэцэрлэгийн 2022-2023 оны хичээлийн шинэ жилийн нээлттэй холбогдуулан оюутан, сурагч, хүүхэд багачуудыг гэмт хэрэг, зөрчлөөс урьдчилан сэргийлэх, болзошгүй эрсдэлээс хамгаалах чиглэлээр байгууллагын гадна, дотор орчны хяналтын камерын бүрэн бүтэн байдлыг хангуулах, орчны эрсдэлийг арилгуулах, олон нийтийн цагдаа, хүүхэд хамгаалагч нарт сургалт зохион байгуулах зэрэг арга хэмжээг цагдаагийн байгууллагаас үе шаттай зохион байгуулж байна.

“ТӨРИЙН ДАЛБАА”-НД ХҮНДЭТГЭЛ ҮЗҮҮЛЭХ АРГА ХЭМЖЭЭГ ЗОХИОН БАЙГУУЛЛАА.

Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албанаас алба хаагчдын ёс зүйн хэм хэмжээг мөрдүүлэх, сахилгын зөрчлөөс урьдчилан сэргийлэх, хувь хүний эерэг хандлагыг төлөвшүүлэх зорилгоор “Хандлага дор хүндлэл оршино” нөлөөллийн аяныг улсын хэмжээнд эхлүүлээд байна.

Аяны хүрээнд алба хаагчдын албаараа бахархах, албандаа итгэх итгэлийг нэмэгдүүлэх, цэрэгжилт, жагсаалч байдлыг сайжруулах зорилгоор Монгол Улсын "Төрийн далбаа"-нд хүндэтгэл үзүүлэх арга хэмжээг газар, хэлтсүүд амжилттай зохион байгууллаа.

АЛБА ХААГЧДЫН ХҮҮХДИЙН ХӨГЖЛИЙГ ДЭМЖИХ ЗОРИЛГООР “ГЭР ЦЭЦЭРЛЭГ” БАЙГУУЛЛАА

Булган аймаг дахь Цагдаагийн газраас алба хаагчдын ажиллах нөхцөл, нийгмийн асуудалд дэмжлэг үзүүлэх зорилгоор алба хаагчдын хүүхдийн хөгжлийг дэмжих, тулгарч буй хүндрэл бэрхшээлийг арилгах, гэр бүлийн гишүүдийг ажлын байртай болгох зорилгоор байгууллагын дэргэд сургуулийн өмнөх боловсрол олгох 2-оос 5 настай хүүхдүүдийг хүлээн авч сургах “Гэр цэцэрлэг”-ийн нээлтийн үйл ажиллагааг зохион байгууллаа.

Нээлтийн үйл ажиллагаанд Цагдаагийн газрын дарга, цагдаагийн хурандаа Л.Ганбаатар, Булган аймгийн Засаг даргын Тамгын газрын дарга, Д.Алтаншагай аймгийн удирдлагуудаас үйл ажиллагааг туслан дэмжиж ажиллах талаар, Боловсрол, шинжлэх ухааны газрын дарга, Ж.Ганболд цэцэрлэгийн хүний нөөц, үйл ажиллагаа явуулах стандарт дүрэм, журмыг хангах талаар дэмжлэг үзүүлэн ажиллах талаар үг хэлж, тус газрын алба хаагчид оролцлоо.

ИХ, ДЭЭД СУРГУУЛИЙН ОЮУТАН, ЗАЛУУЧУУДАД ГЭМТ ХЭРЭГ, ЗӨРЧЛӨӨС УРЬДЧИЛАН СЭРГИЙЛЭХ ЧИГЛЭЛЭЭР “ИХ ХОТЫН СОЁЛ БА ХАРИУЦЛАГАТАЙ ИРГЭН” СЭДЭВТ СУРГАЛТ ЗОХИОН БАЙГУУЛЖ БАЙНА

Хичээлийн шинэ жил эхэлж байгаатай холбогдуулан их, дээд сургуулийн оюутан, залуучуудад өөрийгөө болон бусдыг аливаа осол, гэмтэл, болзошгүй эрсдэлээс хамгаалах, гэмт хэрэг, зөрчилд өртөж хохирох, холбогдохоос урьдчилан сэргийлэх, тэдний хууль, эрх зүйн мэдлэг боловсролыг дээшлүүлэх зорилгоор алба, нэгж, нутаг дэвсгэр хариуцсан цагдаагийн байгууллагын удирдах албан тушаалтай алба хаагчид сургалт орж байгаа юм. Сургалтыг Нийслэл, дүүргийн Соёл урлагийн газар, Боловсролын газар, хэлтэс болон Их, дээд сургуулийн удирдлагуудтай хамтран зохион байгуулж байна.