Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

БҮГД НАЙРАМДАХ СОЛОНГОС УЛСЫН НАМЪЯАНЖУ ХОТЫН “ЭЛЬ” ЭМНЭЛЭГТЭЙ ХАМТРАН АЖИЛЛАХ ГЭРЭЭ БАЙГУУЛЛАА

Бүгд Найрамдах Солонгос Улсын Намъяанжу хотын “Эль” эмнэлгийн зочид төлөөлөгчид энэ оны 08 дугаар сарын 19-21-ний өдрүүдэд алба хаагчдын эрүүл мэнд, өвчин эмгэгээс сэргийлэх, хамтын ажиллагааны тогтолцоог бүрдүүлэх зорилгоор Цагдаагийн ерөнхий газарт албан айлчлал хийлээ.

Хүндэт зочид, төлөөлөгчид Цагдаагийн ерөнхий газрын үйл ажиллагаатай танилцаж, “Монгол Улсын Цагдаагийн ерөнхий газар, Бүгд Найрамдах Солонгос Улсын Намъяанжу хотын “Эль” эмнэлэгтэй хамтран ажиллах гэрээ”-нд гарын үсэг зурах ажиллагаа Цагдаагийн ерөнхий газарт зохион байгуулагдлаа.

Дээрх гэрээний зорилго нь цагдаа, дотоодын цэргийн байгууллагад ажиллаж байгаа алба хаагч, түүний гэр бүлийн гишүүдэд эрүүл мэндийн үйлчилгээ үзүүлэх, сургалт, судалгаа, эрүүл мэндийн тусламж дэмжлэгтэй холбоотой хамтын ажиллагааны тогтолцоог бүрдүүлэх юм.

ЦАГДААГИЙН БАЙГУУЛЛАГА “МОНГОЛЫН МАСТЕРУУДЫН СПОРТЫН VI ИХ НААДАМ”-Д АМЖИЛТТАЙ ОРОЛЦЛОО

Монголын Мастеруудын спортын VI их наадам “Софт волейбол”, “Шатар”, “Дартс”, “Ширээний теннис”, “Хөнгөн атлетик”, “Гранд гольф” зэрэг спортын 6 төрөлд энэ оны 08 дугаар сарын 19-21-ний өдрүүдэд Баянхонгор аймагт амжилттай зохион Монголын Мастеруудын спортын VI их наадамд нийт 26 байгууллага амжилттай оролцож, нийлбэр дүнгээр “Тэргүүн байр”-ыг Баянхонгор аймаг, “Дэд байр”-ыг Баянзүрх дүүрэг, “Гутгаар байр”-ыг цагдаагийн байгууллага тус тус эзэлсэн юм.

Энэхүү их наадамд цагдаа, дотоодын цэргийн байгууллагыг төлөөлж, цагдаагийн байгууллагын 3 алба хаагч, 60 ахмад ажилтан оролцсон юм.

Тэмцээнд амжилттай оролцсон алба хаагч, ажилтнууд та бүхэндээ спортын өндөр амжилт хүсье.

ДУГААРЫН ХЯЗГААРЛАЛТЫН ХУГАЦААНД ЦАГДААГИЙН АЛБА ХААГЧИД ХЯНАЛТ ТАВИН АЖИЛЛАНА

“Замын хөдөлгөөний түгжрэл, ачааллыг бууруулах талаар авах зарим арга хэмжээний тухай” захирамжид заасны дагуу автомашины улсын дугаарын сүүлчийн орон нь сондгой /1,3,5,7,9/ тоогоор төгссөн автомашиныг энэ оны 08 дугаар сарын 27, 29, 31, 9 дүгээр сарын 02-ны өдрүүдэд, тэгш /0,2,4,6,8/ тоогоор төгссөн автомашиныг энэ оны 08 дугаар сарын 28, 30, 09 дүгээр сарын 01, 03-ны өдрүүдэд 08:00-20:00 цагийн хооронд хөдөлгөөнд оролцуулахаар Нийслэлийн засаг даргын захирамж гарсантай холбоотойгоор Цагдаагийн байгууллагаас заасан хязгаарлалт нутаг дэвсгэр хамаарсан хэсгүүдэд цагдаагийн алба хаагч хяналт тавин ажиллана.

ЭЗЭНГҮЙ ОРХИГДСОН 120 ГА ГАЗАРТ НӨХӨН СЭРГЭЭЛТ ХИЙХЭЭР БОЛЛОО

Засгийн газрын 2020-2024 оны үйл ажиллагааны хөтөлбөрт туссан зорилтын хэрэгжилтийг хангах “Нөхөн сэргээлт-2024” нэгдсэн арга хэмжээний хүрээнд Төв аймгийн Заамар сумын нутаг дэвсгэрт ашигт малтмал олборлох чиглэлээр үйл ажиллагаа явуулдаг 17 аж ахуйн нэгжийн төлөөлөлтэй уулзалт зохион байгуулж, “Баян гол”–ын хэсэгт уул, уурхайн үйл ажиллагааны улмаас эвдэгдэж, хөндөгдсөн 120 га талбайг хуваарилан өгч, дүйцүүлэн хамгаалах нөхөн сэргээлтийн ажлыг энэ оны 10 дугаар сарын 01-ний өдрийн дотор гүйцэтгэн хүлээлгэн өгөх, хэрэгжилтийг хангаж ажиллахыг Төв аймгийн Байгаль орчин аялал жуулчлалын газар, Мэргэжлийн хяналтын газар, Засаг даргын тамгын газар, Заамар сум дахь сум дундын цагдаагийн хэлтэст үүрэг болгосон.

Дээрх аймаг, сумын нутаг дэвсгэрт ашигт малтмал олборлох чиглэлээр үйл ажиллагаа явуулж буй “Уулс Заамар” ХХК техник 70 га, биологи 65 га, “Монполимет” ХХК техник 10 га, биологи 10 га, “Бүрдэл майнинг” ХХК техник 16,5 га, биологи 14,2 га, “Платинум ланд” ХХК техник 5 га, биологи 10 га талбайд нөхөн сэргээлтийн ажлыг хийж гүйцэтгэсэн байна.

ДОТООДЫН ЦЭРГИЙН “ХАРУУЛЧИН” МЭРГЭЖИЛ ОЛГОХ СУРГАЛТ ЗОХИОН БАЙГУУЛАГДАЖ БАЙНА

Цагдаагийн ерөнхий газрын дарга, Дотоодын цэргийн командлагчийн 2022 оны 08 дугаар сарын 16-ны өдрийн А/18 дугаар тушаалаар Дотоодын цэргийн “Харуулчин” мэргэжил олгох сургалтыг энэ оны 08 дугаар сарын 22-ны өдрөөс эхлэн 1 сарын хугацаатайгаар Цагдаа, дотоодын цэргийн сургалтын нэгдсэн төвд зохион байгуулж байна.

Энэ удаагийн сургалтын онцлог нь дотоодын цэргийн анги, байгууллагад ажиллах хүсэл сонирхолтой цэргийн алба хааж байгаа байлдагч нараас сонгон шалгаруулж суралцуулж байгаа юм.

ӨЛЗИЙТ СУМЫН ХЭСГИЙН ТӨЛӨӨЛӨГЧ АЖЛЫН БАЙРАА ТОХИЖУУЛЖЭЭ

Дундговь аймгийн Өлзийт сумын хэсгийн төлөөлөгч Цагдаагийн дэслэгч Х.Энэбиш хэсгийн цагдаа, Цагдаагийн дэд ахлагч Ц.Дашням нар өөрсдийн нөөц бололцоогоороо ажлын байраа тохижуулжээ.

Хашаандаа бяцхан цөөрөм, наранцэцэг, улаан сухай, шар хуайс, хайлаас зэрэг олон төрлийн мод тарьж ургуулахын зэрэгцээ сүүдрэвч хийн дотор нь хийжээ. Мөн хаягдал чулуу, жонш, чулуужсан мод зэргээр чимэглэсэн байна. Хэдий албаны хашаа ч орой бүр элсэн дээр нь хүүхдүүд ирж тоглодог гэнэ.