Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

ЭКОЛОГИЙН ЦАГДААГИЙН АЛБАНААС ЭКОЛОГИЙН АСУУДАЛ ХАРИУЦСАН АЛБА ХААГЧДАД СУРГАЛТ ЗОХИОН БАЙГУУЛЛАА

Экологийн цагдаагийн албанаас “Зэрлэг амьтан ба ургамлын аймгийн ховордсон зүйлийг олон улсын хэмжээнд худалдаалах тухай” конвенц болон хэргийн газрын үзлэг хийхэд эд мөрийн баримт цуглуулах, бэхжүүлэх” сэдэвт сургалтыг Лондонгийн амьтан судлалын нийгэмлэгийн Монгол дахь төлөөлөгчийн газар, Гэмт хэргээс урьдчилан сэргийлэх зөвлөлтэй хамтран энэ оны 06 дугаар сарын 27, 28-ны өдрүүдэд зохион байгууллаа.

Зэрлэг амьтад, тэдгээрийн эд эрхтэн, бүтээгдэхүүний хил дамнасан хууль бус худалдаанаас урьдчилан сэргийлэх, энэ төрлийн гэмт хэрэг, зөрчлийг мөрдөн шалгах болон түүний илрүүлэлт, мэдээллийн солилцоо, хамтын ажиллагааг сайжруулах, алба хаагчдын мэргэжлийн мэдлэг, ур чадварыг дээшлүүлэх зорилгоор зохион байгуулсан энэхүү сургалтад экологийн цагдаагийн алба, аймаг дахь цагдаагийн газар, хэлтсийн экологийн асуудал хариуцсан болон нийслэлийн дүүрэг дэх газар, хэлтсийн эрүүгийн мөрдөгч нарын нийт 94 алба хаагч хамрагдсан юм.

“ДОТООДЫН ЦЭРЭГ-100” UNIQUIZ ТЭМЦЭЭН ЗОХИОН БАЙГУУЛЛАА

Монгол Улсад орчин цагийн Дотоодын цэрэг үүсэж хөгжсөний түүхт 100 жилийн ойг тохиолдуулан алба хаагчдын танин мэдэхүйн мэдлэгийг дээшлүүлэх, албаны болон хууль эрх зүйн мэдлэгийг батжуулах зорилгоор Юнител ХХК-тай хамтран зохион явуулсан “ДОТООДЫН ЦЭРЭГ-100” UNIQUIZ тэмцээний 1-р шатанд амжилттай оролцсон алба хаагчдыг тодруулж дурсамж хадгалуулав.

АЛБА ХААГЧДАД “НИЙГЭМ СЭТГЭЛ ЗҮЙН БОЛОН АНХНЫ ТУСЛАМЖ”-ИЙН СУРГАЛТ ЗОХИОН БАЙГУУЛЖ БАЙНА

Эрүүл мэндийн яам “Монголын Улаан загалмай” нийгэмлэгийн хамтын ажиллагааны хүрээнд Мөрдөн байцаах алба, Нийтийн хэв журам хамгаалах, олон нийтийн аюулгүй байдлыг хангах алба, Тээврийн цагдаагийн албаны алба хаагчдад “Нийгэм сэтгэл зүйн болон анхны тусламж”-ийн сургалт зохион байгууллаа.

Сургалтыг “Анхны тусламжийн ач холбогдол, хууль эрх зүйн асуудлууд”, “Анхны тусламж үзүүлэхэд гарч болох эрсдэлүүд”, “Зуса” хийх дараалал”, “Хажуугийн сэргээх байрлал”, “Хахах үед хэрхэн тусламж үзүүлэх, хүүхдийн хахалт”, “Гадуур болон дотуур цус алдалтад анхны тусламж үзүүлэх” зэрэг сэдвийн хүрээнд мэргэжлийн сургагч багш нар зааж байгаа юм.

АЛБА ХААГЧДЫН АЖЛЫН АЧААЛАЛТАЙ ТАНИЛЦАХ, АЖЛЫН БАЙРНЫ ЗУРАГ АВАЛТ ХИЙХ

ЗОРИЛГООР АРГА ХЭМЖЭЭ ЗОХИОН БАЙГУУЛЛАА

Налайх дүүрэг дэх цагдаагийн хэлтсээс Цагдаа, дотоодын цэргийн байгууллагаас 2022 онд дэвшүүлсэн зорилтыг хэрэгжүүлэх, удирдах ажилтны манлайллыг дээшлүүлэх, алба хаагчдын ажлын ачаалалтай танилцах, ажлын байрны зураг авалт хийх зорилгоор нийт ахлагч бүрэлдэхүүнийг 1 өдөр амрааж, тасгийн дарга, ахлах албан тушаалтай алба хаагчид ахлагч бүрэлдэхүүний ажил үүргийг гүйцэтгэн ажиллалаа.

ХҮҮХДИЙГ ОСОЛ ГЭМТЛЭЭС УРЬДЧИЛАН СЭРГИЙЛЭХ САРЫН АЯН ЗОХИОН БАЙГУУЛАГДАЖ БАЙНА

Дархан-Уул аймаг дахь Цагдаагийн газраас аймгийн Онцгой байдлын газар, Эрүүл мэндийн газар, Гэр бүл хүүхэд залуучуудын хөгжлийн газартай хамтран “Хүүхдийг осол гэмтлээс урьдчилан сэргийлэх 1 сарын аян зохион байгуулж байна.

Тус аяны хүрээнд Хараа голын эрэг дагуу амарч, зугаалж буй 80 орчим тээврийн хэрэгсэлтэй, 200 орчим иргэдэд гол усны ослоос урьдчилан сэргийлэх, гол усны ойролцоо амарч байх хугацаандаа бага насны хүүхдэд тавих хараа хяналтыг сайжруулах, архи согтууруулах ундаа хэрэглэхгүй байх, нарших, даралт ихсэх, хордлого авах зэрэг эрсдэлээс урьдчилан сэргийлэхийг анхааруулж гарын авлага тараан ажиллалаа.