Энэ долоо хоногт Цагдаа, дотоодын цэргийн байгууллагад болж өнгөрсөн ОНЦЛОХ үйл явдлыг тоймлон хүргэж байна.

ДОТООДЫН ЦЭРЭГТ ТАТАГДАН ИРСЭН ХУГАЦААТ ЦЭРГИЙН АЛБА ХААГЧИД ЦЭРГИЙН ТАНГАРАГ ӨРГӨЛӨӨ

Дотоодын цэрэгт энэ оны нэгдүгээр ээлжийн цэрэг татлагаар татагдан ирсэн хугацаат цэргийн алба хаагчдын “Цэргийн тангараг” өргөх ёслол хүндэтгэлийн арга хэмжээ боллоо.

Энэхүү хүндэтгэлийн үйл ажиллагаа өнөөдөр /2022.06.15/ Дотоодын цэргийн 05 дугаар ангид зохион байгуулагдаж, арга хэмжээнд Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд, Дотоодын цэргийн штабын дарга, хурандаа Р.Чингис, анги байгууллагын дарга, захирагч нар болон алба хаагчдын төлөөлөл, гэр бүлийн гишүүд оролцсон юм.

ЭРЭЛЧ НОХОЙН АЛБЫГ ЧАДАВХЖУУЛАХ СУРГАЛТ ҮРГЭЛЖИЛЖ БАЙНА

Лондоны амьтан судлалын нийгэмлэгийн Монгол дахь төлөөлөгчийн газраас хэрэгжүүлж буй “Монгол Улсын Эрэлч нохойн албыг чадавхжуулах” төслийн хүрээнд албаны нохой ашигладаг төрийн байгууллагуудын алба хаагчдад олон улсын албаны нохойг сургах сургалтын арга барил, туршлагыг танилцуулах, тэднийг чадавхжуулах сургалт эхэллээ.

Сургалтыг Цагдаа, дотоодын цэргийн Сургалтын нэгдсэн төвд Их Британи Умард Ирландын Нэгдсэн Вант Улсын Вест Мидландын Цагдаагийн газрын Албаны нохойн сургалтын нэгдсэн төвийн Гөлөг хөгжүүлэх хөтөлбөрийн сургагч багш Эмма Салвони удирдан зохион байгуулж байна.

Дээрх сургалтад Цагдаагийн ерөнхий газар, Гаалийн ерөнхий газар, Хил хамгаалах ерөнхий газар, Онцгой байдлын ерөнхий газар, Улаанбаатар Төмөр зам-Хувь нийлүүлсэн нийгэмлэг, Иргэний нисэхийн үндэсний төв, Монголын Эрэлч нохойн холбоо зэрэг төрийн болон төрийн бус 9 байгууллагын 20 гаруй алба хаагч, ажилтан, албаны нохойн хамт хамрагдаж байна.

САНХҮҮ, АЖ АХУЙН АЛБА ХААГЧДЫГ МЭРГЭШҮҮЛЭХ СУРГАЛТАД ХАМРУУЛЖ БАЙНА

“Цагдаа, дотоодын цэргийн алба хаагчдын мэдлэг, ур чадварыг дээшлүүлэх 2022 оны сургалтын нэгдсэн төлөвлөгөө”-ний хэрэгжилтийг хангах зорилгоор санхүүгийн алба хаагчдыг /ахлах нягтлан бодогч, аж ахуйн ажилтан, нярав/ давтан сургалтад хамруулж байна.

Энэхүү сургалтаар “Төрийн хэмнэлтийн тухай хууль”-ийн хэрэгжилтийг ханган ажиллахад анхаарах асуудал, “Шилэн дансны тухай хууль”-ийн хэрэгжилт, “2022 онд батлагдсан Засгийн газрын тогтоол, Сангийн сайдын тушаал, Төрийн өмчийн бодлого зохицуулалтын газрын тогтоол шийдвэрүүд”, “Анхан шатны баримтын бүрдүүлэлт, тооллого, тооцоо бодолтын талаар”, “Эд хариуцагчийн бүрэн хариуцлагын гэрээ байгуулах”, “Өмч хамгаалах байнгын зөвлөлийн үйл ажиллагаа, тооллого, өмч эзэмшлийн гэрээ дүгнэх”, “Тендерийн бичиг баримт техникийн тодорхойлолт боловсруулах” зэрэг сэдвийн хүрээнд зохион байгууллаа.

МОНГОЛ УЛС ДАХЬ НЭГДСЭН ҮНДЭСТНИЙ БАЙГУУЛЛАГЫН ХҮН АМЫН САНГИЙН ТЭРГҮҮН ДР.ХАЛИД ШАРИФИГ ХҮЛЭЭН АВЧ УУЛЗЛАА

Монгол Улс дахь Нэгдсэн Үндэстний Байгууллагын Хүн амын сангийн тэргүүнээр томилогдсон Др.Халид Шарифиг Цагдаагийн ерөнхий газрын Тэргүүн дэд дарга, цагдаагийн хурандаа Ц.Ням-Очир, Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга, цагдаагийн хошууч Э.Баярбаясгалан нар хүлээн авч уулзлаа.

Уулзалтын үеэр цагдаагийн байгууллагаас "Жендерт суурилсан хүчирхийлэлтэй тэмцэх" төслийг амжилттай хэрэгжүүлсэн тухай болон үр нөлөө, ач холбогдлын талаар ярилцлаа. Мөн Монгол Улс дахь Нэгдсэн Үндэстний Байгууллагын Хүн амын сангийн цаашдын хамтын ажиллагааг улам өргөжүүлэн ажиллах тухай санал солилцлоо.  

ЭРҮҮЛЖҮҮЛЭХ, СААТУУЛАХ БАЙРНЫ ДАРГА ЭМЧ, ЭМЧ НАРТАЙ ТУРШЛАГА СОЛИЛЦОХ УУЛЗАЛТ ЗОХИОН БАЙГУУЛЛАА

Нийтийн хэв журам хамгаалах, олон нийтийн аюулгүй байдлыг хангах албаны Нийтийн хэв журам хамгаалах хэлтсээс нутаг дэвсгэр хариуцсан цагдаагийн байгууллагын "Эрүүлжүүлэх, саатуулах байрны дарга эмч, эмч нарын туршлага солилцуулах" уулзалт, арга хэмжээг Нийслэлийн цагдаагийн удирдах газрын Эрүүлжүүлэх, саатуулах төвд зохион байгууллаа.

Уулзалтад Нийслэлийн цагдаагийн удирдах газрын Эрүүлжүүлэх саатуулах төв, Зөрчлийн хэрэг бүртгэх газрын Зөрчлийн хэрэг бүртгэлт мэргэжил арга зүйн хэлтэс, Нийтийн хэв журам хамгаалах хэлтсийн удирдлагууд болон нийслэлээс 7, орон нутгаас 18 нийт 25 эрүүлжүүлэх саатуулах байрны дарга, эмч нар оролцож хариуцсан эрүүлжүүлэх, саатуулах байрны нөхцөл байдал, зохион байгуулсан онцлог ажил, анхаарах зарим асуудлын талаар оролцогч нарт танилцуулж, ажлын туршлага, мэдээлэл солилцсон юм.