Террорист үйлдлийн сөрөг тусгай ажиллагааны “Хаан шонхор-2022” гурав дахь удаагийн нэгдсэн дадлага сургуулийг Монгол Улсын Терроризмтой тэмцэх зөвлөл, Цагдаагийн ерөнхий газар хамтран 2022 оны тавдугаар сарын 10-11-ний өдрүүдэд “Буянт-Ухаа” спорт цогцолборт амжилттай зохион байгуулагджээ. Энэ удаагийн нэгдсэн дадлага сургууль зэвсэг дэлгэрүүлэх болон терроризмтой тэмцэх тухай эрх зүйн орчин шинэчлэгдсэн үед болон хот, суурин газарт анх удаагаа зохион байгуулагдаж байгаа гэдгээрээ онцлогтойгоос гадна НҮБ, ЕАБХАБ зэрэг олон улсын байгууллагын өмнө хүлээсэн үүргээ биелүүлэхэд чухал ач холбогдолтой юм.

“Хаан шонхор-2022” гурав дахь удаагийн нэгдсэн дадлага сургуульд терроризмтой тэмцэх зөвлөлийн гишүүн байгууллагууд болон бусад төрийн байгууллагуудаас бүрдсэн нийт 1,800 орчим албан хаагч оролцсон бөгөөд “нийтийн эмх замбараагүй байдлын үед террорист халдлага үйлдэгдсэн, олон нийтийн үзвэр, үйлчилгээний газрыг барьцаалсан үед террорист үйлдлийн сөрөг тусгай ажиллагаа явуулах нь” сэдвээр зохион байгуулагдсан байна.

Сургалтын сэдвийн хүрээнд ТЕГ, ЦЕГ, ЗХЖШ, ШШГЕГ, ТТХГ, ХХЕГ, ОБЕГ болон ЭМЯ-ны харьяа эрүүл мэндийн байгууллагуудын алба хаагчид террорист этгээдүүдийг аюулгүй болгох, дайчлан баривчлах, барьцаалагдсан иргэд болон объектыг чөлөөлөх, шархдаж, гэмтсэн иргэдэд яаралтай эмнэлгийн тусламж үзүүлэх зэрэг дасгалуудыг амжилттай хийж гүйцэтгэжээ. 

Уг арга хэмжээг нээж, Монгол Улсын терроризмтой тэмцэх зөвлөлийн дарга, хошууч генерал П.Одонбаатар хэлсэн үгэндээ, "Сүүлийн жилүүдэд дэлхийн хэмжээнд хүн ам олноор төвлөрсөн газрууд дахь террорист халдлагын тоо улам бүр нэмэгдэж байна. Дэлхийн хэмжээнд өнгөрсөн 20 жилд үйлдэгдсэн нийт террорист халдлагын 72 хувь нь хүн ам олноор цугларсан газарт буюу зах, худалдааны төв, үзвэр үйлчилгээний газар, олон нийтийн жагсаал, цуглаан, тэмдэглэлт баяр ёслол, урт дараалал, авто вокзал, төмөр замын вокзал, нисэх буудал, спорт үзвэр үйлчилгээний газар, сургууль, боловсролын байгууллагуудын орчим үйлдэгдсэн байна.

2022 оны нэгдсэн дадлага сургуулийг Монгол Улсын Терроризмтой тэмцэх зөвлөл, Цагдаагийн ерөнхий газар хамтран зохион байгуулж байгаа бөгөөд Монгол Улсад террорист үйлдэл гарсан тохиолдолд Терроризмтой тэмцэх зөвлөлийн гишүүн байгууллагууд болон бусад холбогдох төрийн байгууллагуудын харилцан уялдаа, бэлэн байдлыг хангах чухал ач холбогдолтой юм. Монгол Улс нь хэдийгээр терроризмын аюул заналын хувьд багаас дунд эрсдэлтэй гэж үнэлэгдсэн ч терроризмын аюул занал, эрсдэлд бэлэн байдлаа хангах чадамжийг тогтмол бэхжүүлж, олон улсын хамтын нийгэмлэгийн өмнө хүлээсэн үүргээ биелүүлж байх учиртай юм" гэв.

Мөн “Хаан шонхор-2022” нэгдсэн дадлага сургуулийн нээлтийн арга хэмжээний үеэр Монгол Улс дахь НҮБ-ын суурин зохицуулагч ноён Тапан Мишра “Терроризмтой тэмцэх зөвлөл, Цагдаагийн ерөнхий газрын хамтран зохион байгуулж буй энэ удаагийн “Хаан шонхор-2022” нэгдсэн дадлага сургуулийг нээж үг хэлэх боломж олдсонд баяртай байна. Терроризмын аюул занал олон улсын болон бүс нутгийн аюулгүй байдалд ихээхэн хэмжээний сөрөг нөлөө үзүүлсэн хэвээр байна. Хүний хөгжил, олон улсын найрсаг харилцааны ололттой талуудыг бүрэн ашиглах эрмэлзэлтэй улс орны хувьд террорист үйлдэлд яаралтай хариу үзүүлэх, энх тайван, үндэсний аюулгүй байдлыг хангах нөөц бололцоог бэхжүүлэх нь нэн тэргүүний алхам юм” гэв.

Мөн тэрбээр үргэлжлүүлэн НҮБ-аас 2006 онд баталсан Дэлхий нийтийн терроризмтой тэмцэх стратеги, 2017 оны 2341 дүгээр тогтоолын хэрэгжилтийг хангахад болон сүүлийн жилүүдэд кибер террорист халдлага ихээр үйлдэгдэх болсон энэ үед “Хаан шонхор-2022” нэгдсэн дадлага сургууль зохион байгуулагдаж буйд НҮБ-ын тал сайшаалтай хандаж буйг илэрхийллээ.

Эцэст нь ноён Т.Мишра “Энэхүү арга хэмжээг нээх ялдамд Монгол Улс дахь НҮБ-ын суурин төлөөлөгчийн газрын хамт олон Монгол Улсыг аюулгүй ирээдүйг цогцлоон бий болгох, болзошгүй террорист аюул заналаас урьдчилан сэргийлэх, таслан зогсоох үйл хэрэгт тогтмол дэмжлэг үзүүлэн ажиллахаа мэдэгдэж байна” гэв.