Энэ долоо хоногт цагдаа, дотоодын цэргийн байгууллагад болж өрнөсөн “ОНЦЛОХ” үйл явдлыг тоймлон хүргэж байна.

ЦАГДАА, ДОТООДЫН ЦЭРГИЙН БАЙГУУЛЛАГЫН “ГЕНЕРАЛ”-УУДАД ХҮНДЭТГЭЛ ҮЗҮҮЛЛЭЭ

Монгол Улсад орчин цагийн Дотоодын цэрэг үүсэж хөгжсөний түүхт 100 жил, Генерал цол бий болсны 78 жилийн ой, “Монгол генералын өдөр”-ийг тохиолдуулан цагдаа, дотоодын цэргийн байгууллагын генералуудад хүндэтгэл үзүүлэх ёслолын арга хэмжээ боллоо. Энэхүү хүндэтгэлийн арга хэмжээнд Цагдаагийн ерөнхий газрын дарга, Дотоодын цэргийн командлагч, хошууч генерал Ж.Болд болон даргын зөвлөлийн гишүүд, Монгол Улсын гавьяат хуульч, хошууч генерал Б.Пүрэв, хошууч генерал Ч.Амарболд, Монгол Улсын гавьяат хуульч, хошууч генерал Д.Сандаг-Очир, хошууч генерал М.Ганболд, бригадын генерал Б.Билэгт, бригадын генерал А.Дулаанжаргал, бригадын генерал Т.Хүрэлбаатар, бригадын генерал С.Ганбат нар оролцсон юм.

“МӨНГӨ УГААХ ГЭМТ ХЭРГИЙН ЗҮЙЧЛЭЛ, ТУЛГАМДАЖ БУЙ АСУУДАЛ, ЦААШДЫН ЧИГ ХАНДЛАГА” СЭДЭВТ ЭРДЭМ ШИНЖИЛГЭЭНИЙ ХУРАЛ ЗОХИОН БАЙГУУЛЛАА

Цагдаагийн байгууллагаас санаачлан Монгол банк, Улсын дээд шүүх, Шүүхийн ерөнхий зөвлөл, Улсын ерөнхий прокурорын газар, Авлигатай тэмцэх газар, Тагнуулын ерөнхий газартай хамтран “Мөнгө угаах гэмт хэргийн зүйлчлэл, тулгамдаж буй асуудал, цаашдын чиг хандлага” сэдэвт эрдэм шинжилгээний хурал зохион байгууллаа.

Мөнгө угаах гэмт хэргийн зүйлчлэл, мөрдөн шалгах ажиллагаа, прокурор, шүүхийн шатанд энэ төрлийн гэмт хэргийг хянан шийдвэрлэхэд тулгамдаж буй асуудлуудыг шийдвэрлэх зорилго бүхий энэ хуралд оролцогч байгууллагуудаас 12 илтгэл хэлэлцүүлж, хурлаас гарах зөвлөмжийн төслийг боловсруулан баталж төрийн бодлого, хууль, эрх зүйн актад тусгуулахаар холбогдох газарт хүргүүлэхээр хэлэлцсэн байна.

"ЗАЛИЛАГЧИД БОЛОМЖ БҮҮ ОЛГО" СЭДЭВТ ХЭЛЭЛЦҮҮЛЭГ ЗОХИОН БАЙГУУЛАГДЛАА

Цагдаагийн байгууллагаас Хууль зүй, дотоод хэргийн яам, Цахим хөгжил харилцаа холбооны яам, Улсын дээд шүүх, Улсын ерөнхий прокурорын газар, Шүүхийн шийдвэр гүйцэтгэх ерөнхий газар, Санхүүгийн зохицуулах хороо, Монголын банкны холбоо, Төрийн бус байгууллагууд, хохирогчийн төлөөлөлтэй хамтран залилах гэмт хэрэгтэй тэмцэх зорилгоор “Залилагчдад боломж бүү олго” хэлэлцүүлгийг зохион байгууллаа.

Хэлэлцүүлгийн явцад илтгэгч болон бусад оролцогчдоос гаргасан залилах гэмт хэрэг мөрдөн шалгах ажиллагаанд тулгамдсан асуудлыг хэрхэн шийдвэрлэх талаарх саналуудыг нэгтгэн, зөвлөмж боловсруулан оролцогч байгууллагуудад хүргүүлж, цаашид энэ төрлийн гэмт хэргээс урьдчилан сэргийлэх, шийдвэрлэлтийг ахиулахад зөвлөмжийг хэрэгжүүлж ажиллахаар болжээ.

“ШУДАРГА ЖУРАМ” МЕДАЛИАР НЭХЭН ШАГНАЛАА

Цагдаагийн байгууллага нь гэмт хэрэгтэй тэмцэх, нийтийн хэв журам сахиулах, олон нийтийн аюулгүй байдлыг хангах үндсэн чиг үүргээс гадна үер, зуд, хээрийн түймэр зэрэг байгалийн гамшиг тохиолдсон үед ард иргэдийнхээ амь нас, эрүүл мэнд, эд хөрөнгийг хамгаалах ажилд төр, ард түмнийхээ өмнө өргөсөн тангарагтаа үнэнчээр зүтгэж ирсэн.

Баян-Өлгий аймаг дахь цагдаагийн газрын эргүүлийн цагдаа, цагдаагийн ахлах ахлагч И.Эрдэнэшагай нь 2019 оны 07 дугаар сарын 02-ны өдөр Баян-Өлгий аймгийн Өлгий сумын нутаг дэвсгэр “Ховд гол”-ын усанд живж байсан иргэний амь насыг авран хамгаалахаар яваад өөрөө амь эрсэдсэн билээ. Эргүүлийн цагдаа, цагдаагийн ахлах ахлагч И.Эрдэнэшагай агсныг Монгол Улсын Ерөнхийлөгчийн 2022 оны 30 дугаар зарлигаар “Шударга журам” медалиар нэхэн шагнасныг талийгаачийн ар гэрийнхэнд нь гардуулан өгөх хүндэтгэлийн арга хэмжээг зохион байгууллаа.

АХЛАГЧ БҮРЭЛДЭХҮҮНИЙ УУЛЗАЛТ ЗОХИОН БАЙГУУЛЛАА

Тээврийн цагдаагийн албанаас хэрэгжүүлж буй үйл ажиллагаа, бодлого чиглэлийг танилцуулах, алба хаагчдын санал, хүсэлтийг хүлээн авах, тулгарч байгаа хүндрэл бэрхшээлийг шийдвэрлэх арга замыг тодорхойлох зорилгоор тус албаны “Ахлагч бүрэлдэхүүний” уулзалтыг зохион байгууллаа.

Уулзалтад Тээврийн цагдаагийн албаны дарга болон даргын зөвлөлийн гишүүд оролцож, сэтгэл зүйч Г.Наранбаатар “ Алба хаагчдын харилцаа хандлага” сэдвээр илтгэл тавьсан юм. Алба хаагчдаас албаны үйл ажиллагаа болон алба хаагчидтай холбоотой санал, хүсэлтийг сонсож, бусдыгаа манлайлан үр бүтээлтэй ажилласан алба хаагчдыг шагнаж урамшууллаа. Уулзалтад тус албаны харьяа газар, хэлтэс, тасгийн 300 гаруй алба хаагч хамрагдсан юм.