Энэ долоо хоногт цагдаа, дотоодын цэргийн байгууллагад болж өрнөсөн “ОНЦЛОХ” үйл явдлыг тоймлон хүргэж байна.

ДОТООДЫН ЦЭРГИЙН ШТАБААС “СОЁЛЫГ ТҮГЭЭЕ” НӨЛӨӨЛЛИЙН АРГА ХЭМЖЭЭГ ЭХЛҮҮЛЛЭЭ

Архи, согтууруулах ундааны зохисгүй хэрэглээнээс үүдэлтэй хүн амын эрүүл мэнд, нийгмийн аюулгүй байдал, эдийн засагт үзүүлэх сөрөг нөлөөг бууруулах зорилгоор Монгол Улсын Ерөнхийлөгч, Зэвсэгт хүчний Ерөнхий командлагчаас “Эрүүл Монгол хүн” хөтөлбөрийг санаачлан, хэрэгжилтийг эрчимжүүлэхээр зарлиг гаргаж, нийт иргэн, аж ахуйн нэгж, байгууллага архи, согтууруулах ундааны хэрэглээ, түүнээс үүдэлтэй эрүүл мэнд, нийгэм, эдийн засгийн сөрөг үр дагаврыг бууруулахад санаачилгатай оролцох, баяр ёслол, тэмдэглэлт өдөр, өндөр хатуулагтай этилийн спирт агуулсан архи, согтууруулах ундааг хэрэглэхгүй байхыг уриалсан.

Зарлигийн хэрэгжилтийг хангаж Дотоодын цэргийн нийт бие бүрэлдэхүүн архи согтууруулах ундааны зохисгүй хэрэглээнээс татгалзах зорилгоор “Соёлыг түгээе” нөлөөллийн арга хэмжээг эхлүүлээд байна.

САНХҮҮГИЙН АЛБА ХААГЧДЫН ЭНЭ ОНЫ НЭГДҮГЭЭР УЛИРЛЫН ТАЙЛАНГИЙН ХУРАЛ ЗОХИОН БАЙГУУЛАГДЛАА

Цагдаа, дотоодын цэргийн анги, байгууллагын санхүүгийн алба хаагчдын 2022 оны 1 дүгээр улирлын тайлангийн хурал Цагдаагийн ерөнхий газрын хурлын зааланд зохион байгуулагдлаа.

Тайлангийн хурлаар цагдаа, дотоодын цэргийн байгууллагын 2022 оны батлагдсан төсөв, 1 дүгээр улирлын гүйцэтгэлийн төлөвлөгөөний биелэлт болон санхүүгийн үйл ажиллагааг дүгнэн алба хаагчдад дүнг танилцуулав.

Мөн “Хөрөнгө оруулалт, худалдан авах ажиллагааны явц, анхаарах асуудал”, “Ирэх оны төсвийн төсөл, төсвийн хязгаарын санал”-ын талаар хэлэлцэж алба хаагчдын саналыг сонссон юм.

ЦАХИМААР СУРАЛЦАЖ ТӨГССӨН АЛБА ХААГЧДАД ДАВТАН МЭРГЭШҮҮЛЭХ СУРГАЛТ ЗОХИОН БАЙГУУЛАВ

Нийтийн хэв журам хамгаалах, олон нийтийн аюулгүй байдлыг хангах албанаас Цагдаа мэргэжил олгох сургалтад 2021 онд цахим хэлбэрээр суралцаж төгссөн алба хаагчдад ажлын чиг баримжаа олгох давтан мэргэшүүлэх сургалтыг 2022 оны 04 дүгээр сарын 11-нээс 15-ны өдрүүдэд Цагдаа, дотоодын цэргийн сургалтын нэгдсэн төвтэй хамтран зохион байгууллаа.

Сургалтын зорилго нь шинээр томилогдсон орон нутгийн цагдаагийн газар, хэлтсийн алба хаагчдыг богино хугацаанд ажилд нь сургаж дадлагажуулах, тэдгээрт хэрэгцээтэй байгаа мэдлэгийг олгох, ур чадварыг дээшлүүлэх, мэргэжлийн үйл ажиллагаагаа явуулахад шаардлагатай дадал, чадвар олгоход чиглэгдсэн.

Тус сургалтад 9 аймгийн 60 алба хаагчийг хамруулж байгаа бөгөөд цаашид сургалтыг үе шаттайгаар зохион байгуулахаар төлөвлөж байна.

“ХҮНИЙ ЭРХ БА АЛБА ХААГЧИЙН ЭРХ, ҮҮРЭГ” СЭДЭВТ СУРГАЛТ ЗОХИОН БАЙГУУЛЛАА

Цагдаагийн ерөнхий газрын Хуулийн хэлтсээс Мөрдөн байцаах албатай хамтран цагдаа, дотоодын цэргийн алба хаагчийн эрх зүйн мэдлэгийг дээшлүүлэх, хууль хэрэглэх чадавхыг нэмэгдүүлэх зорилгоор “Хүний эрх ба алба хаагчийн эрх, үүрэг” сэдэвт практикт суурилсан сургалтыг энэ оны 03 дугаар сараас эхлэн 34 анги, байгууллагын 3230 алба хаагчийг хамруулаад байна. Дээрх сургалтыг зохион байгуулснаар алба хаагчдын хууль хэрэглээний чадвар нэмэгдэхийн зэрэгцээ, иргэдтэй харилцах харилцааны ур чадварт эерэг үзүүлэлт гарах юм.

АДУУНД БАЙРШИЛ ТОГТООГЧ "GPS" ТӨХӨӨРӨМЖ АШИГЛАЖ БАЙНА

Хил дамнасан мал хулгайлах гэмт хэргээс урьдчилан сэргийлэх чиглэлээр Увс аймаг дахь цагдаагийн газраас Их Британи улсад үйлдвэрлэсэн байршил тогтоогч "GPS" төхөөрөмжийг "Шинэ зууны адуучин" ХХК-тай хамтран Увс аймгийн Сагил сумын хил орчмын бүсэд нутагладаг малчин өрхүүдийн адуунд байршуулах ажлыг зохион байгуулж байна. Уг төхөөрөмжийг ашигласнаар иргэд малаа алдахгүй, олон хоног эрлээр явахгүй байх үр өгөөжтэй бөгөөд малын эзэнд тухай бүр мэдээлэл ирж байхаар тохируулагдсан байна.

"ХҮҮХДЭЭ СОНСОХ ӨДӨР"-ИЙГ ЗОХИОН БАЙГУУЛАВ

Өсвөрийн сэргийлэгч бүлгэмийн хүүхдүүдийн үйл ажиллагааг идэвхжүүлэх, хүүхдүүдийн дунд тулгамдаж буй асуудлуудыг холбогдох байгууллагын төлөөллүүдэд хүргэх зорилго бүхий "Хүүхдээ сонсох өдөр"-ийг Өвөрхангай аймаг дахь цагдаагийн газар, аймгийн Гэмт хэргээс урьдчилан сэргийлэх ажлыг зохицуулах салбар зөвлөл, Прокурор, Боловсрол шинжлэх ухаан, Гэр бүл, хүүхэд, залуучуудын хөгжлийн газрууд хамтран зохион байгуулав.

Энэхүү арга хэмжээнд Арвайхээр сумын Ерөнхий боловсролын 7 сургуулийн 92 сурагчид оролцож, "Өсвөрийн сэргийлэгч сайн дурын бүлгэм"-ийн гишүүний энгэрийн тэмдгээ гардан авч, тангараг өргөлөө.

Үйл ажиллагаанд оролцогч хүүхдүүдээс өөрсдийн өмнө тулгамдаад байгаа асуудлынхаа талаар холбогдох байгууллагын төлөөллүүдэд уламжилж,  сурагчдаас гаргасан санал, хүсэлтийг аймгийн Гэмт хэргээс урьдчилан сэргийлэх ажлыг зохицуулах салбар зөвлөл болон Хүүхдийн төлөө зөвлөлийн хуралдаанаар хэлэлцүүлж шийдвэрлэн хариу хүргүүлэх юм.