Энэ долоо хоногт цагдаа, дотоодын цэргийн байгууллагад болж өрнөсөн “ОНЦЛОХ” үйл явдлыг тоймлон хүргэж байна.

БҮСЧИЛСЭН СУРГАЛТ ЗОХИОН БАЙГУУЛЛАА

Гэр бүлийн хүчирхийлэл, хүүхдийн эсрэг гэмт хэрэг, зөрчил, дуудлага мэдээлэл шалган шийдвэрлэх эрх бүхий алба хаагчдын эрх зүйн мэдлэг, чадварыг дээшлүүлэх зорилгоор зохион байгуулагдаж байгаа “Гэр бүлийн хүчирхийлэл, хүүхдийн эсрэг гэмт хэрэгтэй тэмцэх, урьдчилан сэргийлэх арга зүй” сэдэвт сургалтыг 21 аймагт бүсчилсэн байдлаар зохион байгууллаа.

Сургалтыг Нэгдсэн Үндэстний байгууллагын Хүн амын сан, Цагдаагийн ерөнхий газрын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтэс болон нутаг дэвсгэр хариуцсан цагдаагийн байгууллагуудтай хамтран зохион байгуулж байна.

АНЗААР АЯН ЗОХИОН БАЙГУУЛАГДАЖ БАЙНА

ЦЕГ-ын Хар тамхитай тэмцэх газар, Сонгинохайрхан дүүргийн Иргэдийн Төлөөлөгчдийн Хурал, дүүргийн цагдаагийн газартай хамтран “Мэдээллээ сайжруулъя, Анхаарлаа хандуулъя” уриан дор “АНЗААР” сургалт, нөлөөлөл, мэдээллийн аяныг эхлүүлээд байна.

Аян нэг сарын хугацаанд буюу энэ оны 4-р сарын 5-наас 5-р сарын 5 хүртэл үргэлжлэх юм.

Гэмт хэргийн гаралт, тоо баримтын араас хөөцөлдөх бус түүнээс урьдчилан сэргийлж иргэд олон нийтэд зөв мэдээ, мэдээлэл хүргэх нь нэн чухал билээ.

Энэ ажлыг үр дүнтэй зохион байгуулахад дүүргийн Шүүх, прокурор, цагдаагийн байгууллага, нутгийн захиргааны байгууллагууд, ерөнхий боловсролын болон их дээд сургуулиуд, эмнэлэг, өрхийн эрүүл мэндийн төв зэрэг бүх шатны байгууллагын хамтын ажиллагаа чухал үүрэгтэй. Мөн мансууралгүй ирээдүйн төлөө иргэн бүрийг “Анзаар” аянд уриалж байна.

ХАМТДАА СЭРГИЙЛЬЕ АЯН ЗОХИОН БАЙГУУЛЖ БАЙНА

Гэмт хэрэг, зөрчлөөс урьдчилан сэргийлэх ажилд иргэд, олон нийтийг татан оролцуулах, гудамж талбай, олон нийтийн газарт үйлдэгдэх гэмт хэрэг, зөрчлөөс урьдчилан сэргийлэх зорилгоор Баянгол дүүргийн 5-р хорооны Засаг даргын ажлын албатай хамтран гэмт хэрэг, зөрчлөөс урьдчилан сэргийлэх сарын аяныг зохион байгуулан ажиллаж байна.

Аяны хүрээнд 5-р хорооны нутаг дэвсгэрт үйл ажиллагаа явуулдаг аж ахуй нэгж, байгууллагын ажилтан, алба хаагч нар цагдаагийн алба хаагч, олон нийтийн цагдаа нарын хамт нийтийн эргүүлд ажиллаж байна.

“ЗАЛИЛАГЧ НАРТ БОЛОМЖ БҮҮ ОЛГО” АРГА ХЭМЖЭЭ ЗОХИОН БАЙГУУЛЖ БАЙНА

Налайх дүүргийн Гэмт хэргээс урьдчилан сэргийлэх ажлыг зохицуулах салбар зөвлөл, Налайх, Багахангай дүүргийн Прокурорын газар, Шуурхай удирдлага, хяналт, мэдээллийн төвтэй хамтран цахим орчинд үйлдэгдэх залилах гэмт хэргээс урьдчилан сэргийлэх чиглэлээр “Залилагч нарт боломж бүү олго” арга хэмжээг энэ оны 04 дүгээр сарын 05-ны өдрөөс эхлэн 1 сарын хугацаатай зохион байгуулж байна.

ХАМГААЛАХ МАЛГАЙ НӨЛӨӨЛЛИЙН АРГА ХЭМЖЭЭ ЗОХИОН БАЙГУУЛАГДАЖ БАЙНА

Зам тээврийн осол, зөрчлөөс урьдчилан сэргийлэх зорилгоор "Зөвийг хэвшүүлье" уриан дор зохион байгуулж байгаа “Хамгаалах малгай" нөлөөллийн арга хэмжээг энэ оны 04 дүгээр сарын 04-ний өдрөөс мөн сарын 30-ны өдрийг хүртэлх хугацаанд зохион байгуулж байна. Мотоцикл, мопед, унадаг дугуйтай замын хөдөлгөөнд оролцох үедээ стандартын хамгаалалтын малгай, хувцсыг өмсөн хэвшихийг, өөрийн болон бусдын амь нас, эрүүл мэнд зөвлөж байна.