Энэ долоо хоногт цагдаа, дотоодын цэргийн байгууллагаас зохион байгуулсан ОНЦЛОХ үйл явдлыг тоймлон хүргэж байна.

ТЭЭВРИЙН ЦАГДААГИЙН АЛБАНААС УРЬДЧИЛАН СЭРГИЙЛЭХ АЖИЛ ХАРИУЦСАН АЛБА ХААГЧДЫН ЗӨВЛӨЛДӨХ УУЛЗАЛТЫГ ЗОХИОН БАЙГУУЛЛАА

Тээврийн цагдаагийн албанаас улсын хэмжээнд урьдчилан сэргийлэх ажил хариуцсан алба хаагчдын зөвлөлдөх уулзалтыг энэ оны 03-р сарын 01-ний өдөр зохион байгууллаа. 

Зөвлөлдөх уулзалтад Цагдаагийн ерөнхий газрын Урьдчилан сэргийлэх хэлтсийн дарга, цагдаагийн хурандаа Б.Баттулга, Тээврийн цагдаагийн албаны Дэд дарга, цагдаагийн хурандаа С.Жавхлантбаатар, тус албаны Урьдчилан сэргийлэх хэлтсийн дарга, цагдаагийн дэд хурандаа Б.Очирбат болон аймаг, дүүргүүд дэх цагдаагийн газар, хэлтсийн урьдчилан сэргийлэх ажил хариуцсан алба хаагчид цахимаар оролцлоо. 

Уулзалтын үеэр Тээврийн цагдаагийн албаны  Урьдчилан сэргийлэх хэлтсийн дарга, цагдаагийн дэд хурандаа Б.Очирбат танилцуулгадаа: “Өнгөрсөн 10 жилийн хугацаанд манай улсад зам тээврийн 293 мянган осол бүртгэгдэж, 5137 хүн нас барж, 33928 хүн гэмтсэн тоо баримт байдаг. Цагдаагийн байгууллагаас зам тээврийн зөрчлийг бууруулах чиглэлээр олон арга хэмжээг тасралтгүй авч ажиллаж байгаа. Үүний үр дүнд иргэд олон нийт сэрэмжлүүлэг, мэдээлэл авч, осол гэмтлийн тоо буурсан үзүүлэлт харагддаг. Иймд бид нэгдсэн нэг бодлогоор зам тээврийн осол, зөрчлөөс урьдчилан сэргийлэх ажлуудаа эрчимжүүлэн ажиллахаар энэхүү уулзалтыг зохион байгуулж, тал талын мэдээллийг нэгтгэн авч байгаа юм” гэлээ.

ОЛОН УЛСЫН ЭМЭГТЭЙЧҮҮДИЙН ЭРХИЙГ ХАМГААЛАХ ӨДРИЙГ ТОХИОЛДУУЛАН

“БИДЭНД ЧИХЭР, ШОКОЛАД ХЭРЭГГҮЙ ЭЭ” АРГА ХЭМЖЭЭ ЗОХИОН БАЙГУУЛЛАА

Нийтийн хэв журам хамгаалах, олон нийтийн аюулгүй байдлыг хангах албаны Эмэгтэйчүүдийн зөвлөлөөс Олон улсын эмэгтэйчүүдийн эрхийг хамгаалах өдрийг тохиолдуулан “Бидэнд чихэр, шоколад хэрэггүй ээ” уриалгыг албаны хэмжээнд өрнүүлж албаны нийт алба хаагч нараас хандив цуглуулан “Өнөр бүл” асрамжийн газрын 2-12 насны 69 хүүхдүүдэд эдийн болон ахуйн хэрэглээний бяцхан бэлэг гардуулан өглөө. Уг арга хэмжээг дэмжиж хандив өгсөн албаныхаа нийт алба хаагч нарт болон тус албаны Эмэгтэйчүүдийн зөвлөлийг хүлээн авч байгууллагынхаа үйл ажиллагааг танилцуулсан “Өнөр бүл” асрамжийн газрын хамт олон, урлагийн тоглолтоор сэтгэлийн бэлэг өгсөн бяцхан хүүхдүүд дээ сайн сайхан бүхнийг хүсэн ерөөе.

“ЭКО-2022” НЭГДСЭН АРГА ХЭМЖЭЭ УЛСЫН ХЭМЖЭЭНД 3 ДАХЬ ЖИЛДЭЭ ЗОХИОН БАЙГУУЛАГДАЖ БАЙНА

Хүрээлэн байгаа орчны эсрэг гэмт хэрэг, зөрчлөөс урьдчилан сэргийлэх, илрүүлэх, шийдвэрлэлтийг ахиулах, нөхцөл байдалд дүн шинжилгээ хийж хяналтын пост ажиллуулах санхүүжилтийг шийдвэрлүүлэх, энэ төрлийн гэмт хэрэг үйлдэж болзошгүй этгээдүүдийг хяналтад авах зорилгоор “Эко-2022” нэгдсэн арга хэмжээг энэ оны 02 дугаар сарын 21-ний өдрөөс 03 дугаар сарын 21-ний өдрийн хооронд Экологийн цагдаагийн албаны харьяа хэлтсүүд, нутаг дэвсгэр хариуцсан цагдаагийн болон бусад мэргэжлийн байгууллагууд хамтран зохион байгуулж байна.

“ЦАГДАА”, “ЦАГДАА ЖОЛООЧ”, “ХАРУУЛЧИН” МЭРГЭЖИЛ ОЛГОХ СУРГАЛТ ЭХЭЛЛЭЭ

Төрийн албаны зөвлөлийн Цагдаагийн ерөнхий газрын дэргэдэх салбар зөвлөлийн 2022 оны Б/01 дүгээр тогтоолоор “Төрийн жинхэнэ албаны нөөц”-д бүртгэгдсэн 138 иргэнийг Цагдаагийн ерөнхий газрын даргын 2022 оны “Мэргэжил олгох сургалтад суралцуулах тухай” А/33 дугаар тушаалаар Дотоод хэргийн их сургуулийн Ахлагчийн сургуулийн “Цагдаа”, “Цагдаа жолооч”, “Харуулчин” мэргэжил олгох сургалтад хамруулж байна. 

Сургалт энэ оны 02 дугаар сарын 28-ны өдрөөс эхлэн Дотоод хэргийн их сургуулийн Ахлагчийн сургууль дээр зохион байгуулагдаж байгаа бөгөөд хоёр сарын турш үргэлжлэх юм. 

“МОНГОЛ УЛСЫН ТӨРИЙН ДАЛБААГ МАНДУУЛЖ, ШИНЭЭР ТОМИЛОГДСОН АЛБА ХААГЧДЫГ ЦЭРГИЙН ТАНГАРАГ ӨРГҮҮЛЛЭЭ

Монгол улсын төрийн далбаа мандуулах, Ангид шинээр томилогдсон алба хаагчдыг цэргийн тангараг өргүүлэх, тангараг давтах, 7 хоног, сарын ажлын дүн хэлэлцэх ажиллагааг зохион байгууллаа.

ЦЭРГИЙН ТАНГАРАГ

Монгол Улсын иргэн Би Монгол Улсын Үндсэн хуулиар хүлээсэн иргэний цэргийн үүргээ үнэнчээр биелүүлж, өвөг дээдсийнхээ ариун гал голомт болсон Монгол Улсынхаа халдашгүй дархан байдлыг амь бие үл хайрлан батлан хамгаалахаа эх орон, төр, ард түмэндээ андгайлан тангараглая.

Би ард түмнийхээ үндэсний эв нэгдэл, Монгол цэргийн шилдэг уламжлалаа эрхэмлэн хүндэтгэж, цэргийн эрдэмд шамдан боловсорч, улсын нууцыг найдвартай хадгалж, Монгол Улсын хууль, цэргийн дүрмийг чанд сахин биелүүлэхээ батлан тангараглая.

Эх орноо батлан хамгаалагч дайчин Би өргөсөн тангаргаасаа няцваас төрийн хууль ёсны цээрлэл хүлээнэ!