Энэ долоо хоногт цагдаа, дотоодын цэргийн байгууллагаас зохион байгуулсан иргэд, олон нийт рүү чиглэсэн ОНЦЛОХ үйл явдлыг тоймлон хүргэж байна.

“ИЛҮҮДЭЛ ЖИНГҮЙ-ЭРТЭЧ МОНГОЛ” АЯНД ЦАГДАА, ДОТООДЫН ЦЭРГИЙН АЛБА ХААГЧИД НЭГДЛЭЭ

Цагдаа, дотоодын цэргийн байгууллагаас 2022 онд дэвшүүлсэн зорилтыг хэрэгжүүлэх, алба хаагч, ажилтанд хорт зуршлаас татгалзах, багасгах сэдэл төрүүлэх эрүүл зөв, амьдралын хэвшил, ёс зүй зан үйлийг төлөвшүүлэх, алба хаагчдын бие бялдрыг чийрэгжүүлэх, нийтийн биеийн тамир, спортыг дэмжих чиглэлээр алба хаагчдын идэвх, оролцоог нэмэгдүүлэх зорилгоор Монгол Улсын Ерөнхий сайдын санаачилсан “Илүүдэл жингүй-Эртэч Монгол” аянд цагдаа, дотоодын цэргийн алба хаагчид нэгдлээ.

ЦАГДАА, ДОТООДЫН ЦЭРГИЙН БАЙГУУЛЛАГЫН “ДАРТС”-ЫН АВАРГА ШАЛГАРУУЛАХ ТЭМЦЭЭН ЗОХИОН БАЙГУУЛЛАА

Монгол Улсад орчин цагийн Дотоодын цэрэг үүсэж хөгжсөний 100 жилийн ойн хүрээнд Цагдаагийн ерөнхий газрын 2022 оны “Дартс”-ын аварга шалгаруулах тэмцээнийг “Монголын Дартсын Холбоо”-той хамтран “Хүч” спорт хорооны зааланд зохион байгууллаа.

Энэхүү тэмцээнд цагдаа, дотоодын цэргийн анги, байгууллагын эрэгтэй 102, эмэгтэй 80, нийт 182 алба, орон нутгийн 18 аймгийн цагдаагийн газар, хэлтсийн баг, тамирчид оролцон шилдгүүдээ шалгарууллаа.

Дөрөв дэх жилдээ зохион явуулж буй энэхүү тэмцээнийг “Монголын Дартсын Холбоо”-ны 19 шүүгчид шүүсэн юм.

ХУГАЦААТ ЦЭРГИЙН АЛБА ХААГЧДЫН ДУНД “ШАТАР”-ЫН ТЭМЦЭЭН ЗОХИОН БАЙГУУЛЛАА

Монгол Улсад Дотоодын цэрэг үүсэж хөгжсөний түүхт 100 жилийн ойг тэмдэглэн өнгөрүүлэх хүрээнд Дотоодын цэргийн штабаас Зэвсэгт хүчин, Хилийн цэрэг, Дотоодын цэрэгт цэргийн жинхэнэ алба хааж байгаа хугацаат цэргийн алба хаагчдын дунд “Шатар”-ын тэмцээнийг зохион байгууллаа.

Энэхүү тэмцээнд Зэвсэгт хүчин, Хилийн цэрэг, Дотоодын цэргийн 12 анги, байгууллагын 64 алба хаагч оюун ухаан, ур чадвараа сорьсон юм.

ПРОКУРОР, ЦАГДААГИЙН БАЙГУУЛЛАГЫН ХАМТАРСАН ЗӨВЛӨГӨӨНИЙГ ЗОХИОН БАЙГУУЛЛАА

Мөрдөн шалгах ажиллагааны чанарыг дээшлүүлэх, алба хаагчдын ажлын ачааллыг бууруулах, хэргийн шийдвэрлэлтийг нэмэгдүүлэх, алба хаагчдын гаргаж байгаа зөрчил, дутагдлыг арилгах арга замыг тодорхойлох, хамтын ажиллагааг сайжруулах зорилгоор Нийслэлийн прокурорын газар, Мөрдөн байцаах алба хамтарсан зөвлөгөөнийг зохион байгууллаа.

Энэхүү зөвлөгөөнд Нийслэлийн прокурорын газар, Мөрдөн байцаах алба, Экологийн цагдаагийн алба, Хар тамхитай тэмцэх газар, Нийслэлийн цагдаагийн удирдах газрын мөрдөн шалгах эрх бүхий 100 гаруй алба хаагч хамрагдсан юм.

АРХИВЫН ЕРӨНХИЙ ГАЗАРТАЙ ХАМТРАН АРХИВ, АЛБАН ХЭРЭГ ХӨТЛӨЛТ ХАРИУЦСАН АЛБА ХААГЧДЫГ МЭРГЭШҮҮЛЭХ СУРГАЛТАД ХАМРУУЛЖ БАЙНА

Архив, албан хэрэг хөтлөлтийн тухай хууль, шинэчлэгдсэн заавар журмуудыг архив, албан хэрэг хөтлөлт хариуцсан алба хаагчдад сурталчлах, мэдлэг ур чадварыг дээшлүүлэх зорилгоор Цагдаагийн ерөнхий газрын Соён гэгээрүүлэх, албаны сургалтын хэлтэс, Төв архив, Архивын ерөнхий газартай хамтарсан сургалтыг зохион байгуулж байна.

Сургалтаар “Албан хэрэг хөтлөлтийн нийтлэг журам”, “Баримт бичгийг стандартын дагуу зохион бүрдүүлэхэд тавигдах шаардлага”, “Цахим баримтын тухай ойлголт, архивын баримтыг цахим хэлбэрт шилжүүлэх”, “Хадгаламжийн нэгж бүрдүүлэх”, “Данс, бүртгэл үйлдэх арга зүй”, “Архивын баримт ашиглалт” сэдвүүдээр тухайн чиглэлээр мэргэшсэн багш нар удирдан явуулж байна.