Мөрдөн шалгах ажиллагааны чанарыг дээшлүүлэх, алба хаагчдын ажлын ачааллыг бууруулах, хэргийн шийдвэрлэлтийг нэмэгдүүлэх, алба хаагчдын гаргаж байгаа зөрчил, дутагдлыг арилгах арга замыг тодорхойлох, хамтын ажиллагааг сайжруулах зорилгоор Нийслэлийн прокурорын газар, Мөрдөн байцаах алба хамтарсан зөвлөгөөнийг өнөөдөр /2022.02.23/ зохион байгууллаа.

Энэхүү зөвлөгөөнд Нийслэлийн прокурорын газар, Мөрдөн байцаах алба, Экологийн цагдаагийн алба, Хар тамхитай тэмцэх газар, Нийслэлийн цагдаагийн удирдах газрын мөрдөн шалгах эрх бүхий 100 гаруй алба хаагч хамрагдсан юм.

Зөвлөгөөнөөр “2021 оны мөрдөн шалгах ажлын үр дүн, прокурорын шаардлага, арга хэмжээ тооцуулах албан бичигт заагдсан зөрчилд дүн шинжилгээ хийсэн талаар”, “Мөрдөн шалгах ажиллагааны чанар, үр дүн, мөрдөгч нарын гаргаж буй нийтлэг алдаа, зөрчил, цаашид анхаарах асуудлын талаар”, “2021 онд прокурорын байгууллагатай хэрхэн хамтран ажилласан, хэргийн шийдвэрлэлтийг нэмэгдүүлэхээр авч хэрэгжүүлсэн ажлын талаар”, “Хэргийн шийдвэрлэлтийг ахиулахад тулгамдаж буй  хүндрэл, бэрхшээл, цаашид хэрэгжүүлэх ажлын талаар” тус тус мэдээлэл солилцож дараах шийдвэрийг гаргалаа.

- Мөрдөгч гэмт хэргийн талаарх гомдол, мэдээллийг хүлээн авч шалгаад яллагдагчаар татах хүн, хуулийн этгээд хаана байгаа нь тодорхой, хэрэг бүртгэлт явуулах шаардлагагүй гэж үзсэн гомдол, мэдээлэлд эрүүгийн хэрэг үүсгэж яллагдагчаар татах саналаа прокурорт гаргах, прокурор өөрийн санаачилгаар эсхүл мөрдөгчийн саналаар эрүүгийн хэрэг үүсгэж яллагдагчаар татсан байх;

- Дүүргийн прокурорын газар, түүний харьяа Цагдаагийн газрууд нь хэргийн шийдвэрлэлтийг нэмэгдүүлэх, мөрдөн шалгах ажиллагаа явуулж буй хэргийн талаар харилцан мэдээлэл солилцох зэрэг асуудлыг хэлэлцэх хүрээнд хамтарсан уулзалт, зөвлөгөөнийг тогтмол зохион байгуулж, үр дүнг тооцон ажиллах;

- Эрүүгийн хэрэг хянан шийдвэрлэх ажиллагааны явцад гарсан зөрчлийг таслан зогсооход прокурор, цагдаагийн байгууллагын удирдлагын хяналтыг тогтмолжуулах, зөрчлийг тухай бүр арилгах. Шаардлагатай тохиолдолд хяналтын прокуроруудыг мөрдөх байгууллага дээр биечлэн очиж ажиллуулж, мөрдөн шалгах ажиллагаанд оролцуулах;

- Мөрдөн шалгах ажиллагааны чанар, үр дүнг сайжруулах, Эрүүгийн хууль, Эрүүгийн хэрэг хянан шийдвэрлэх тухай хууль болон бусад хууль тогтоомжийг нэг мөр ойлгож хэрэгжүүлэх зорилгоор Прокурор, Цагдаагийн газрууд хамтарсан сургалт зохион байгуулах зэрэг шийдвэрийг үйл ажиллагаандаа хэрэгжүүлэн ажиллахаар болов.