Энэ долоо хоногт цагдаагийн байгууллагаас зохион байгуулсан иргэд, олон нийт рүү чиглэсэн ОНЦЛОХ үйл явдлыг тоймлон хүргэж байна.

АНУ-ЫН ЭЛЧИН САЙДЫН ЯАМТАЙ ХАМТРАН АЛБА ХААГЧДЫГ МЭРГЭШҮҮЛЭХ СУРГАЛТ ЗОХИОН БАЙГУУЛЛАА

Цагдаагийн ерөнхий газраас АНУ-ын Элчин сайдын яамтай хамтран "Баримт бичгийн нууцлал, хуурамч бичиг баримтыг таних нь", "Хүн худалдаалах гэмт хэргийн хохирогчийг таних нь", "Интернэт орчин дахь нээлттэй эх сурвалжаас ач холбогдол бүхий мэдээллийг хайх арга зүй" сэдэвт сургалтыг энэ оны 02 сарын 15-ны өдөр амжилттай зохион байгууллаа.

Сургалтад Налайх дүүрэг дэх цагдаагийн хэлтсийн алба хаагчид хамрагдсан бөгөөд дээрх сургалтад алба хаагчдыг хамруулснаар хуурамч бичиг баримтыг хэрхэн таних, нээлттэй эх сурвалжаас ач холбогдол бүхий мэдээ, мэдээллийг хэрхэн авах зэрэг ур чадвар нэмэгдэх юм.

ЗӨВЛӨЛДӨХ УУЛЗАЛТ ЗОХИОН БАЙГУУЛЛАА

Улс, хот хоорондын зорчигч тээврийн Аж ахуйн нэгж байгууллагуудын жолооч нарт “Төв, орон нутагт гарсан зам, тээврийн осол, хэрэг, зөрчлийн статистик тоон судалгаанд үндэслэн урьдчилан сэргийлэх ажил зохион байгуулах нь” сэдэвт сургалт, зөвлөлдөх уулзалтыг Тээврийн цагдаагийн албанаас Авто тээврийн үндэсний төвтэй хамтран зохион байгууллаа.

УЛСЫН ТУСГАЙ ХАМГААЛАЛТТАЙ ГАЗАРТ ХЯНАЛТ ТАВИН АЖИЛЛАЖ БАЙНА

Байгаль орчин, аялал жуулчлалын сайдын тушаалаар 3 аймгийн 4 сумын 6 газар ойн цэвэрлэгээ хийхээр болсон. Хан Хэнтийн улсын тусгай хамгаалалттай газрын хамгаалалтын захиргааны даргын 2022 оны “Цэвэрлэгээний огтлол хийх тухай” тушаалын дагуу Төв аймгийн Эрдэнэ сумын 2 дугаар багийн нутаг дэвсгэр тусгай хамгаалалттай газрын бүст байрлах “Асралт хайрхан” гэх газарт “Эбээ” ХХК нь 40 га талбайд ойн цэвэрлэгээ хийх гэрээг байгуулж, эрх олгогдсон байна.

Экологийн цагдаагийн албанаас гэмт хэргээс урьдчилан сэргийлэх зорилгоор Хан Хэнтийн улсын тусгай хамгаалалттай газрын хамгаалалтын захиргаатай хамтран “Асралт хайрхан” гэх газарт ойн цэвэрлэгээ хийж байгаа “Эбээ ХХК-ны” үйл ажиллагаанд хяналт тавин ажиллаж байна.

СУРГУУЛИЙН ОЙР ОРЧИНД ЭРГҮҮЛИЙН ҮҮРЭГ ГҮЙЦЭТГЭЖ БУЙ ЭЦЭГ ЭХЧҮҮДЭД МЭРГЭЖИЛ АРГА ЗҮЙН ЗӨВЛӨГӨӨ ӨГЛӨӨ

Цагдаагийн байгууллагаас цэцэрлэг, сургууль эхэлсэнтэй холбогдуулан улсын хэмжээнд ерөнхий боловсролын сургуулийн ойр орчимд замын хөдөлгөөний дүрмийг сахиулах, хүүхдийг болзошгүй эрсдэлээс урьдчилан сэргийлэх чиглэлээр эргүүл, хяналт шалгалтыг зохион байгуулан, иргэдэд болзошгүй эрсдэлээс урьдчилан сэргийлэх тухай санамж, сэрэмжлүүлэг тараан, эцэг, эхийн эргүүлийн үйл ажиллагаанд мэргэжил, арга зүйн зөвлөгөө өгч ажиллалаа.

Мөн хүүхдийн аюулгүй байдлыг хангах, болзошгүй эрсдэлээс урьдчилан сэргийлэх зорилгоор 1-5 дугаар ангийн сурагчдыг “Гараас гарт” буюу хичээлд ирэх цагт эцэг, эх, асран хамгаалагчаас нь хүлээн авч, тарахад нь хүлээлгэн өгөх ажлыг зохион байгуулан ажиллаж байна.

“ХҮҮХЭД ХАМГААЛАЛ” ЕРӨНХИЙ АРГА ХЭМЖЭЭ ЗОХИОН БАЙГУУЛАГДАЖ БАЙНА

Цагдаагийн байгууллагаас Хүүхдийн эрхийн тухай хууль болон бусад холбогдох хуулиудын хэрэгжилтийг хангах, эрсдэлт нөхцөлд байгаа  хүүхдийг илрүүлэх, цагдаагийн байгууллагын судалгаа хяналтын санд бүртгэх, төрийн болон төрийн бус байгууллагатай хамтран хүүхэд хамгааллын хариу үйлчилгээ үзүүлэх, гэр бүлийн хүчирхийлэл үйлдэгчид тавих нэг бүрчилсэн хяналтыг сайжруулах зорилгоор хараа хяналтгүй хүүхэд орогнодог, байрлаж болзошгүй зах, худалдааны төв, авто угаалгын газар, төвлөрсөн хогийн цэг, дулааны шугам, нүх, траншей зэрэг газруудад үзлэг шалгалтыг зохион байгуулж, Сум, баг, хорооны “Хамтарсан баг”-тай хамтран гэр бүлийн хүчирхийлэлд өртсөн, өртөж болзошгүй хүүхдийг илрүүлэх, болзошгүй эрсдэлээс урьдчилан сэргийлэх чиглэлээр гэрийн хаягаар биечлэн шалгах ажлыг зохион байгуулан ажиллаж байна.

Энэхүү арга хэмжээний хүрээнд Зорилтот гэр бүлийн гишүүдэд хууль, эрх зүйн мэдлэг олгох сургалт орох, Ерөнхий боловсролын сургуулийн багш нарт эрсдэлт нөхцөлд байгаа хүүхдийг илрүүлэх, хүчирхийллийг мэдээлэх чиглэлээр хуулиар хүлээсэн үүргийг сурталчлах, тэдний эрх зүйн мэдлэгийг нэмэгдүүлэх, ерөнхий  боловсролын  сургуулийн сурагчдад   соён гэгээрүүлэх  ажил зохион байгуулах, насанд хүрээгүй хүнийг осол, гэмтэл /түлэгдэх, өндрөөс унах, угаартах, орчиндоо аюул учруулж болох амьтны эрсдэл гэх/ мэт өртөж хохирохоос урьдчилан сэргийлэх санамж, сэрэмжлүүлэг, мэдээ мэдээллийг  мэргэжлийн байгууллагатай хамтран боловсруулж, түгээх зэрэг ажлыг хийж хэрэгжүүлэх юм.