Цагдаагийн ерөнхий газрын Эрүүгийн цагдаагийн албаны нэрэмжит “Шилжин явах цом”-ын төлөөх сагсан бөмбөгийн аварга шалгаруулах тэмцээн зохион байгуулагдаж байна. 2019 онд тус албаны түүхт 85 жилийн ой тохиож, ойг угтаж алба хаагчдынхаа ажиллах урам зоригийг нэмэгдүүлэх, нийгмийн асуудлуудыг шийдэх, ажлын байрны орчин нөхцөлийг сайжруулах чиглэлээр үе шаттай ажил, арга хэмжээг зохион байгуулахаар төлөвлөжээ.

Эрүүгийн цагдаагийн албанаас спортын төрлөөр энэ жилийн  эхний тэмцээнээ эхлүүлж, сагсан бөмбөгийн аварга шалгаруулах тэмцээнийг зохион байгуулж байна. Энэ удаагийн тэмцээнд Эрүүгийн цагдаагийн албаны харьяа 33 нэгжийн 200 орчим тамирчид хурд хүч авхаалж самбаагаа сорьж байна.

Нээлтийн үйл ажиллагааны үеэр Спортын төрлөөр манлайлж буй алба хаагчдаа шагналаа. “Спортын мастер” тэмдгээр Баянзүрх дүүргийн цагдаагийн хоёрдугаар хэлтсийн эрүүгийн ахлах мөрдөгч, цагдаагийн хошууч Х.Саруул, мөн “Спортын алдар” тэмдгээр гурван алба хаагч, “Спортын зэрэг тэмдгээр нийт 21 алба хаагчдыг тус тус шагнаж урамшуулсан юм.