Шинэ жилийн баяр, амралтын өдрүүдэд нийтийн хэв журмыг сахиулах, олон нийтийн аюулгүй байдлыг хангах, гэмт хэргээс урьдчилан сэргийлэх, замын хөдөлгөөний аюулгүй байдлыг хангах үүднээс ХСИС-ийн Цагдаагийн сургууль, Ахлагчийн сургуулийн нийт 700 сонсогч 2018 оны 12 дугаар сарын 25-наас 2019 оны 1 дүгээр сарын 01-ний хооронд хүч нэмэгдүүлэн үүрэг гүйцэтгэсэн.

Үүнтэй холбогдуулан ЦЕГ-ын дэд бөгөөд Нийслэлийн цагдаагийн газрын дарга, цагдаагийн хурандаа Д.Ядамдорж өндөржүүлсэн бэлэн байдлын үед идэвх санаачилга гарган хамтран ажилласан Их сургуулийн хамт олон болон нийт сонсогчдод талархал гардууллаа.

Мөн ЦЕГ-ын Нийтийн хэв журам хамгаалах, олон нийтийн аюулгүй байдлыг хангах албанаас Ахлагчийн сургуулийн сонсогч Л.Лувсандондог, Ц.Бат-Очир, О.Батзориг, Б.Хулан, Б.Цэндсүрэн, М.Марал-Эрдэнэ, Б.Мөнгөнболор нарт “Баярын бичиг” мөнгөн шагналаар шагнав.

Шинэ жилийн баярын өдрүүдэд бүртгэгдсэн гэмт хэрэг, зөрчлийн дуудлага мэдээллийг өмнөх оны мөн үетэй харьцуулахад 11 хувиар, гэмт хэргийн дуудлага 54 хувиар, зөрчлийн дуудлага 26 хувиар тус тус буурсан байна.

Үүнээс дээрэмдэх гэмт хэрэг 53%, хулгайлах 73%, олон нийтийн амгалан тайван байдлыг алдагдуулах 50%, гэр бүлийн хүчирхийлэл үйлдэх 88%, хүний эрүүл мэндэд хохирол учруулах 65 хувиар тус тус буурчээ.