Цагдаа, дотоодын цэргийн алба хаагчдын “Миний ажил-миний бахархал” үзэсгэлэн өнөөдөр /2018.12.19/ “Блю Мон” центрийн “Norphei Art gallery”-д нээлтээ хийлээ.

Цагдаагийн ерөнхий газрын Хэвлэл мэдээллийн төвөөс алба хаагчдын дунд зохион байгуулсан “Миний ажил-миний бахархал” гэрэл зургийн уралдааны эцсийн шалгаруулалтад тэнцсэн бүтээлүүдээр үзэсгэлэн дэлгэж байна.  

Нээлтийн үйл ажиллагаанд МУСГЗ, гэрэл зурагчин С.Цацралт, Монголын гэрэл зурагчдын нэгдсэн холбооны ерөнхий нарийн бичгийн дарга Ц.Батбаатар нарын албаны хүмүүс, алба хаагчдын төлөөлөл оролцлоо.

Алба хаагчдын эерэг хандлагыг нэмэгдүүлэх, ажлаараа бахархах сэтгэгдлийг төрүүлэх, тэдний сонирхлыг хөгжүүлэх, байгууллагын үйл ажиллагаа, албаны техник, тусгай хэрэгслийг олон нийтэд сурталчлан таниулах зорилгоор зохион байгуулсан энэхүү уралдаанд 38 анги, байгууллагаас 200 гаруй бүтээл ирүүлжээ. Мэргэжлийн гэрэл зурагчид шүүгчээр ажиллаж шилдэг 80 бүтээлийг тодруулсан юм.

Гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах үүргээ нэр төртэйгөөр биелүүлж, төр, ард түмнийхээ өмнө өргөсөн тангарагтаа үнэнчээр зүтгэж буй алба хаагчдын агшин гэрэл зурагт хэрхэн буусныг энэхүү үзэсгэлэнгээс тольдоорой.

“Миний ажил-миний бахархал” үзэсгэлэн хоёр өдрийн турш /2018.12.19, 20/ үзэгчдийн хүртээл болно.