Өнөөдөр бол “Хичээх өдөр”. Өөрийгөө болон бусдыг эрсдэлээс хамгаалж, хэн нэгний амь нас, эрүүл мэнд, эд хөрөнгийг зам тээврийн аюул, ослоос хамгаалах өдөр.

Иргэдийг зам тээврийн ослоос урьдчилан сэргийлэх, ослын аюулыг бууруулах зорилготой үйл ажиллагааг “Хичээх өдөр” уриатайгаар Цагдаагийн ерөнхий газар, Тээврийн цагдаагийн албанаас санаачлан Нийслэлийн Иргэдийн Төлөөлөгчдийн хуралтай хамтран зохион байгууллаа.

Энэ өдөр Энхтайваны өргөн чөлөөний авто замын хөдөлгөөнийг 11:00-11:05 цаг хүртэл таван минутын хугацаанд зогсоож цагдаа, яаралтай түргэн тусламж, онцгой байдлын албанаас дуут дохио өгч зам тээврийн ослоор хохирсон иргэдэд хүндэтгэл үзүүллээ. Мөн Тээврийн цагдаагийн албаны алба хаагчид иргэдэд Замын хөдөлгөөний аюулгүй байдлыг хангахтай холбоотой хууль, дүрмийг сурталчилж, осолд холбогдол бүхий эвдэрч хэмхэрсэн тээврийн хэрэгслийг цувааг тодорхой маршрутаар явуулж иргэдэд ослын хор уршгийг сэрэмжлүүлсэн юм.

Манай улсад зам тээврийн ослын улмаас өдөрт 1-2 хүн амиа алдаж, 15-20 хүн бэртэж гэмтэж байгааг албаны хүмүүс хэлж байна. Сүүлийн таван жилийн судалгаанаас үзэхэд зөвхөн зам тээврийн ослын улмаас 6800 иргэн гэмтэж, 500 гаруй иргэн амь насаараа хохирсон харамсалтай мэдээлэл гарчээ.

Хэрэв та Замын хөдөлгөөний дүрмээ баримтлан, өөрийгөө болоод бусдыг хүндэлж, соёлтойгоор зорчвол энэ тоо буурах боломжтой юм. Тиймээс зөвхөн энэ өдөр бус бүх л өдөр бүгдээрээ хичээе.