Тэр тахал хүнийг гоо үзэсгэлэн, залуу нас, хайр дурлал, гэр бүл хамаг сайхан бүхнээс нь салгаад, эцэст нь амийг нь авна. Түүнд донтох аваас бүгдээ алдаад, эцэст өөрөө ч үгүй болно. Харамсалтай нь өнөөдөр энэ аюул биднийг нөмөрч, залуус маань хавханд зүүсэн өгөөш рүү хөлийн хурд мэдэн гүйж ирээд хавчуулагдах хулгана мэт урхидуулж золиос болсоор. Үүнтэй холбоотой хамгийн сүүлийн үеийн тоо баримтыг Цагдаагийн ерөнхий газрын Хар тамхитай тэмцэх газраас гаргажээ. 2018 оны эхний зургаан сарын байдлаар энэ төрлийн 91 хэрэгт 201 хүн холбогдож шалгагдсан байна. Эдгээр тоо баримтыг өмнөх оны мөн үетэй харьцуулахад 40 хэргээр буюу 78.4 хувь, холбогдогч нь 68 хүнээр буюу 51.1 хувиар өссөн гэжээ. Тэгвэл энэ төрлийн гэмт хэрэгтэй тэмцэх, урьдчилан сэргийлэх бууруулах чиглэлээр хэн, юу хийж байна вэ?

Хүн төрөлхтнийг нөмрөөд байгаа энэ аюулт тахалд дэлхийн нийтээр анхаарал хандуулж байна. НҮБ-ын Мансууруулах бодис, гэмт хэрэгтэй тэмцэх алба /UNODC/-наас гишүүн орнууддаа хар тамхи хэрэглэж байгаа иргэд болон борлуулагч, тээвэрлэгч, бүлэглэлүүдийн эсрэг явуулж буй тэмцэлээ улам чангатгах хэрэгтэй гэсэн зөвлөмжийг гаргасан. Монгол Улсын Засгийн газраас “Мансууруулах эм, сэтгэцэд нөлөөт бодисын хууль бус эргэлттэй тэмцэх үндэсний хөтөлбөр”-ийг баталж, үндэсний хороо байгуулан, хөтөлбөрийг хэрэгжүүлэх 1 дүгээр үе шатны төлөвлөгөөг батлан хэрэгжүүлж байна.  

Цагдаагийн байгууллагаас хар тамхитай тэмцэх ажлыг эрчимжүүлэх зорилгоор  Эрүүгийн цагдаагийн албаны бүтцэд байсан Хар тамхитай тэмцэх хэлтсийг газар болгон бүтэц, орон тоог нэмэгдүүлж, 2018 оны хоёрдугаар сард Цагдаагийн төв байгууллагын харьяа Хар тамхитай тэмцэх газар болгон өргөжүүлсэн юм. Дээрх гэмт хэргийн илрүүлэлтийн тоо баримт өссөн нь шинэ тутам зохион байгуулагдсан энэхүү албаны үйл ажиллагаатай холбоотой ажээ.

АЙМГУУДЫН ЦАГДААГИЙН ГАЗАРТ ХАР ТАМХИ ИЛРҮҮЛЭГЧ ТӨХӨӨРӨМЖ АШИГЛАЖ ЭХЭЛЛЭЭ

Монгол Улсын Засгийн газар, Хууль зүй, дотоод хэргийн яам, цагдаагийн байгууллагаас энэ төрлийн гэмт хэргээс урьдчилан сэргийлэх, илрүүлэх тандан судлах, орчин үеийн дэвшилтэд техник, технологи, тоног төхөөрөмжөөр хангах, бүтэц орон тоог өргөтгөж, алба хаагчдын мэргэжлийн мэдлэг ур чадварыг дээшлүүлэх, иргэдийг соён гэргээрүүлэх, хор уршгийг таниулах чиглэлээр ажиллаж байна.

Хар тамхи, мансууруулах бодистой тэмцэх, илрүүлэхэд хамгийн чухал зүйл бол олон улсын стандартад нийцсэн орчин үеийн дэвшилтэт технологи юм. Манай цагдаагийн байгууллага олон улсын хар тамхитай тэмцэх чиг үүрэг бүхий байгууллагууд үйл ажиллагаандаа ашиглаж байгаа орчин үеийн дэвшилтэд техник, технологийг судалж 2018 оны улсын төсөвт тусгагдсан хөрөнгөөр АНУ, Англи улсад үйлдвэрлэсэн TARGET ID, HBI-120, SABRE™5000 зэрэг төхөөрөмж, уян камертай толь, загварын аналитик жин, рентген төхөөрөмж, шээснээс илрүүлэгч тест зэргийг худалдан авч ашиглаж байна. Сэлэнгэ, Дархан-Уул, Орхон, Дорнод, Дорноговь, Өмнөговь аймгийн Цагдаагийн газар, Иргэний агаарын тээвэр дэх цагдаагийн газар, хэлтэст хар тамхи, мансууруулах болон тэсэрч дэлбэрэх бодисыг илрүүлэгч, тандан судлагч тоног төхөөрөмжийг хүлээлгэн өгч, алба хаагчдыг нь сургалтад хамруулжээ.

Замын цагдаагийн албаны алба хаагчид хар тамхи, мансууруулах бодис хэрэглэсэн эсэхийг шалгах анхан шатны шүлсний тестийг ашиглаж байгаа юм. Тэрчлэн энэ төрлийн гэмт хэргээс урьдчилан сэргийлэх ажлыг оновчтой зохион байгуулах зорилгоор нийслэлийн ерөнхий боловсролын сургуулийн сурагчид, багш нар болон бусад төрийн байгууллагын ажилтан алба хаагч нар, их, дээд сургуулийн оюутнуудад тогтмол сургалт зохион байгуулж хэвшсэн байна. Хар тамхитай тэмцэх газраас чиг үүргийнхээ дагуу Шүүхийн шийдвэр гүйцэтгэх ерөнхий газартай хамтран ажиллаж, хар тамхи, мансууруулах бодистой холбоотой гэмт хэрэгт ял шийтгэгдсэн ялтнуудад сургалт зохион байгуулдаг аж.

ПРОКУРОРТОЙ ХАМТАРСАН ШАЛГАЛТ

Тус газраас мансууруулах эм, сэтгэцэд нөлөөт бодистой холбоотой гэмт хэргээс урьдчилан сэргийлэх зорилгоор нийслэлийн Баянзүрх, Сүхбаатар, Хан-Уул дүүрэгт үйл ажиллагаа явуулдаг шөнийн цэнгээний газруудад гэнэтийн шалгалт хийжээ. Энэхүү ажиллагааг нийслэлийн прокурорын газартай зохион байгуулсан бөгөөд хар тамхи, мансууруулах бодис хэрэглэсэн, тээвэрлэсэн этгээдүүдийг баривчлах ажиллагааг ч мөн хамтран явуулдаг байна.

Тухайлбал, 2018 оны дөрөвдүгээр сард Бүгд Найрамдах Хятад Ард Улсаас мансууруулах бодис биедээ нуун улсын хилээр хууль бусаар нэвтрүүлж, бусдад зарж борлуулах зорилгоор тээвэрлэж явсан Монгол Улсын иргэн С-ийг Баянзүрх дүүргийн нутаг дэвсгэрээс баривчилсан. Мөн гуравдугаар сард Монгол Улсын иргэн М нарын хоёр этгээд хар тамхи, мансууруулах бодисын төрөлд орох  ICE буюу мөсийг борлуулах зорилгоор улсын хилээр их хэмжээгээр хууль бусаар нэвтрүүлсэн үйлдлийг илрүүлэн Баянзүрх дүүргийн нутаг дэвсгэрээс баричилж, сэжигтэй этгээдүүдийг Шүүхийн шийдвэр гүйцэтгэх ерөнхий газрын харьяа хорих 461 дүгээр ангид саатуулан шалгалтын ажиллагааг явуулсан юм.

 Эх сурвалж: Montsame.mn сайт