Архангай аймаг дахь Цагдаагийн газар үүсэн байгуулагдсаны түүхт 80 жилийн ойн баярын үйл ажиллагаа энэ сарын 21-ний өдөр боллоо.

Ойн баярын үйл ажиллагаанд УИХ-ын гишүүн Ж.Мөнхбат, Ё.Баатарбилэг, Г.Тэмүүлэн, аймгийн ИТХ-ын дарга Б.Өсөхбаяр, Засаг дарга Ц.Мөнхнасан, ЦЕГ-ын даргын зөвлөлийн гишүүн, ЗЦА-ны дарга, цагдаагийн хурандаа Д.Амарсайхан, Хошууч генерал М.Ганболд болон тус цагдаагийн газрын үе үеийн удирдлага, аймгийн үндэсний аюулгүй байдлыг хангах тусгайлсан чиг үүрэг бүхий байгууллагын дарга нар оролцож хүндэтгэл үзүүлэв. Мөн Архангайн цагдаагийн газрын хөгжил дэвшилд залуу халуун нас, хөдөлмөр зүтгэлээ зориулсан үе үеийн ахмад ажилтнууд, энэ цаг үед мөр зэрэгцэн үүрэг гүйцэтгэж буй алба хаагчид болон тэдний гэр бүлийн гишүүд оролцлоо.

Түүхт ойн хүрээнд эх орон, ард иргэдийнхээ өмнө өргөсөн тангарагтаа үнэнчээр багтаж, гэмт хэрэгтэй тэмцэх, нийтийн хэв журам хамгаалах, олон нийтийн аюулгүй байдлыг хангах ажилдаа идэвх зүтгэл гарган, үр бүтээлтэй ажилласан цагдаагийн алба хаагчдыг Төрийн дээд одон медаль, Хууль зүйн яам, Цагдаагийн ерөнхий газар, аймгийн болон бусад шагналаар шагнаж, урамшуулж, тэдний хөдөлмөр зүтгэлийг үнэлсэн юм.

АРХАНГАЙ АЙМАГ ДАХЬ ЦАГДААГИЙН ГАЗАР