ХОШУУЧ ГЕНЕРАЛ Ч.АМАРБОЛД “СУРГАГЧ АХЛАГЧ НАРЫГ ЧАДАВХИЖУУЛАХ СУРГАЛТ"- нд ХАМРАГДСАН АЛБА ХААГЧ НАРТАЙ ЯРИЛЦЛАГА ЗОХИОН БАЙГУУЛЛАА.

Цагдаагийн Ерөнхий газрын Сургалтын төвөөс Цагдаагийн албаны тухай хууль шинэчлэн батлагдсантай холбогдуулан Улаанбаатар цагдаагийн хүрээний цагдаагийн газар хэлтсийн ахлагч бүрэлдэхүүнээс сургагч ахлагчийн шалгуур хангасан алба хаагчдад сургалт зохион байгуулж байгаа билээ.

Энэхүү сургалтанд хамрагдаж байгаа алба хаагч нарт зориулан мэргэжилтэн бие хүний хоорондын харилцаа ба ёс зүй, өөрийгөө илтгэх ур чадвар, хувь хүний хөгжил ба суралцах чадвар, сэтгэлгээний бүтээлч байдлыг хөгжүүлэх арга замууд, удирдлагын үндсэн зарчмууд зэрэг олон төрлийн сургалт зохион байгуулж байна. Энэ сургалтын хүрээнд хошууч генерал Ч.Амарболд ахлагч бүрэлдэхүүний ажлын онцлог, тэдний ёс, зүй ажлын ачааллын талаар санал бодлоо солилцож илэн далангүй ярилцлаа. "Цагдаагийн байгууллагын алба хаагчдын 50 –аас дээш хувь нь ахлагч бүрэлдэхүүн байдаг.

Тэднийгээ би ажиллаж байсан цагаасаа одоо ч хүртэл хэдэн "Бор цагдаа" нар маань гэж хэлэх бодох дуртай. Яагаад гэвэл энэ бор царайны тухай яриагүй. Цагдаагийн байгууллагын ажил, ачааллын дийлэнх хувийг хариуцаж, илүү их ачаалал даах чадвартай байдгаар нь би үргэлж баярлаж бахархаж байдаг юм. Шинэчлэн батлагдсан хуулинд мэргэжлийн ур чадварыг сайжруулах, ахлагч нарын манлайллыг дээшлүүлэх чиглэлээр тусгасан нь маш зөв зүйтэй" гэж илэн далангүй ярилцсан юм. Сургалт 5 хоног үргэлжилж, баасан гаригт өндөрлөх юм. Сургалтанд хамрагдаж байгаа ахлагч бүрэлдэхүүндээ ажлын амжилт хүсье.