ЦАГДААГИЙН ЕРӨНХИЙ ГАЗАР, ЗЭВСЭГТ ХҮЧНИЙ ЖАНЖИН ШТАБ СУРГАЛТЫН ЧИГЛЭЛЭЭР ҮЙЛ АЖИЛЛАГААГАА ӨРГӨЖҮҮЛЭН АЖИЛЛАХААР БОЛЛОО

Цагдаагийн ерөнхий газар, Зэвсэгт хүчний жанжин штаб хамтран Галт зэвсгийн тухай хууль, Цагдаагийн албаны тухай хууль, бусад дүрэм, журам, Монгол Улсын Ерөнхийлөгч, Зэвсэгт хүчний Ерөнхий командлагч Ц.Элбэгдоржоос цэргийн ангид буудлагын төвүүдийг байгуулж, иргэдийн эзэмшилд байгаа галт зэвсэгт үйлчилгээ үзүүлэх, зориулалтын талбайд төлбөртэй сургалт зохион байгуулж байх тухай өгсөн үүргийг хэрэгжүүлэх ажлын хүрээнд  “Санамж бичиг” байгуулан хамтран ажиллахаар боллоо. Энэхүү  үйл ажиллагаанд ЗХЖШ-ын дарга, дэслэгч генерал Д.Даваа, ЦЕГ-ын дарга, тэргүүн комиссар Ө.Энхтөр, ЗХЖШ-ын нэгдүгээр орлогч, хошууч генерал Р.Сүхбат, ЗХЖШ-ын хоёрдугаар орлогч, бригадын генерал Ж.Бадамбазар  болон хоёр байгууллагын зөвлөлийн гишүүд бүрэн бүрэлдэхүүнээрээ оролцсон юм.

Үүний үр дүнд хоёр байгууллага хууль тогтоомжоор тогтоосон чиг үүргийн хүрээнд хамтран ажиллах, харилцан дэмжлэг үзүүлэх, иргэн, байгаль хамгаалагч, харуул хамгаалалтын үйл ажиллагаа эрхлэх эрх бүхий хуулийн этгээдийн ажилтанд иргэний болон харуул хамгаалалтын зориулалттай галт зэвсэг эзэмших, ашиглах, хадгалах аюулгүй ажиллагааг хангах мэдлэг, ур чадварыг олгоход чиглэсэн сургалт, дадлагыг зохион байгуулах юм.

   Хамтын ажиллагааг сургалт, дадлага, үйлчилгээ болон бусад үйл ажиллагааны чиглэлээр зохион байгуулж Зэвсэгт хүчний Жанжин штабын зүгээс Сургалт, дадлага, үйлчилгээг чанартай зохион байгуулах, сургалтын материаллаг баазыг бүрдүүлэх, буудлага үйлдэх аюулгүй орчныг хангах, иргэний болон харуул хамгаалалтын зориулалттай галт зэвсэг, дуран багаж хэрэгсэлд засвар үйлчилгээ хийх, иргэн, байгаль хамгаалагч, харуул хамгаалалтын ажилтанд иргэний болон харуул хамгаалалтын зориулалттай галт зэвсгээр буудлага үйлдэх үйлчилгээ үзүүлэх, сургалтад хамрагдсан иргэн, байгаль хамгаалагч, харуул хамгаалалтын  ажилтанд “Иргэний болон харуул, хамгаалалтын зориулалттай галт зэвсэг эзэмших, ашиглах, хадгалах аюулгүй ажиллагааны сургалтын заавар”-ын 3.7.2-д заасан батлагдсан гэрчилгээний загварын сургалтын гэрчилгээ дагуу олгох зэрэг үйл ажиллагаануудыг хэрэгжүүлнэ.

Харин Цагдаагийн ерөнхий газрын зүгээс сургалтад хамрагдах иргэн байгаль хамгаалагч, харуул хамгаалалтын  ажилтанд Галт зэвсгийн тухай болон Эрүүгийн хууль, бусад хууль тогтоомж, дүрэм, журам, зааврын талаар  сургалт, зөвлөгөө өгөх, иргэний болон харуул, хамгаалалтын зориулалттай галт зэвсэг эзэмших, ашиглах, хадгалах аюулгүй ажиллагааны сургалтын заавар” болон бусад энэ чиглэлээр гарсан дүрэм, журам, зааврыг баримтлан сургалтыг зохион байгуулах зэрэг олон талаар хамтарч ажиллахаар харилцан тохиролцлоо

”Санамж бичиг”-ийн хэрэгжилтийн явц, биелэлтийг өөрсдийн чиг үүргийн хүрээнд Зэвсэгт хүчний Жанжин штабын Ар талын газрын Цэргийн   зэвсэглэлийн хэлтэс, Цагдаагийн ерөнхий газрын Нийтийн хэв журам хамгаалах алба, Сургалтын төвийн  дарга нар  тус тус хариуцан хамтран ажиллана.

.