Хууль зүй, дотоод хэргийн сайд С.Бямбацогт, дэд сайд Б.Энхбаяр болон УИХ-ын Хууль зүйн байнгын хорооны гишүүд өнөөдөр /2017.02.11/ Төрийн тусгай алба хаагчдын нэгдсэн эмнэлэгт ажиллалаа.

Төрийн тусгай алба хаагчдын нэгдсэн эмнэлгийн үйл ажиллагаатай танилцахын сацуу тус эмнэлгийн наймдугаар давхарт болсон Хууль зүй, дотоод хэргийн сайдын эрхлэх асуудлын хүрээний улсын төсөвт, төрийн өмчит аж ахуйн тооцоот үйлдвэрийн газруудын үйлдвэрлэсэн бүтээгдэхүүний үзэсгэлэнг үзэж сонирхсон юм.

Төрийн тусгай алба хаагчдын нэгдсэн эмнэлэг энэ оны нэгдүгээр сарын 2-ны өдрөөс амбулаторын үйл ажиллагаагаа эхлэн иргэдэд эрүүл мэндийн тусламж үйчилгээ үзүүлж байна. Өнөөдрийн байдлаар эмнэлгийн амбулаторт үндсэн болон төрөлжсөн нарийн мэргэжлийн 21, оношилгооны 13 кабинетыг стандартын шаардлагад нийцүүлэн байгуулж, эмнэлгийн үйл ажиллагааг стандарын дагуу явуулж буйгаа танилцууллаа.

Үйл ажиллагаагаа эхлүүлсэн нэг сарын хугацаанд 11 мянга гаруй хүнд амбулаторын болон урьдчилан сэргийлэх үзлэг хийжээ. Энэ оны гуравдугаар улирлаас эмнэлгийн Б блок буюу хэвтүүлэн эмчлэх стационарыг ашиглалтад оруулснаар дотор, мэдрэл, хүүхэд, сэргээн засах-уламжлалт, ерөнхий болон гэмтлийн мэс засал, яаралтай тусламж, эрчимт эмчилгээний тусламж үзүүлж, эмнэлэг бүрэн хүчин чадлаар ажиллах юм байна.

С.БЯМБАЦОГТ: ЭНЭХҮҮ ҮЗЭСГЭЛЭН САЛБАРЫНХАА ҮЙЛДВЭРЛЭГЧДИЙГ ХЭРЭГЛЭГЧТЭЙ ХОЛБОХ ЗОРИЛГОТОЙ

Хууль зүй, дотоод хэргийн салбарт Цагдаагийн ерөнхий газар, Хил хамгаалах ерөнхий газар, ШШГЕГ, Оюуны өмч, Улсын бүртгэлийн газар, Архивын ерөнхий газар, Гадаадын иргэн, харьяатын асуудал эрхлэх газар зэрэг 236 төсөвт нэгж, 24207 алба хаагч, 10 үйлдвэрийн газар харьяалагддаг.

Энэ удаагийн үзэсгэлэнд ЦЕГ-ын харьяа “Цагаан шонхор”, “Монгол тамга” ТӨААТҮГ, Хилийн 0119, 0252, 0288 дугаар анги, “Багануур тоосго”, “ШТН”, “Хэрэмт цамхаг”, “Газар ивээл”, “Авдрант хайрхан” ТӨААТҮГ, Хорих 407 дугаар анги, АЕГ-ын хэвлэх цех, ХЗҮХ-ийн хэвлэх үйлдвэр зэрэг байгуулага оролцож, үйлдвэрлэсэн бүтээгдэхүүнээ дэлгэн, иргэдэд худалдав.

Хууль зүй, дотоод хэргийн сайд С.Бямбацогт “Эдийн засгийн хүндрэлтэй энэ цаг үед салбарын үйлдвэрлэлийн үйл ажиллагааг дэмжих, үндэсний үйлдвэрлэгчдийн орлогыг нэмэгдүүлэх, төсвийн зардлыг зүй зохистой, хэмнэлттэй, үр ашигтай зарцуулах үүднээс өнөөдөр энэхүү үзэсгэлэнг зохион байгуулж байна. Та бүхэн энэ үзэсгэлэнгээс оёдол, барилга, барилгын материал, уул уурхай, тавилга, тамга тэмдэг, мал аж ахуй, газар тариалангийн үйлдвэрлэлийн бүтээгдэхүүн, шинэ техник технологи, инновацитай танилцаж, цаашдын үр дүнтэй хамтын ажиллагааны эхлэлийг тавина гэдэгт найдаж байна. Салбарынхаа үйлдвэрлэгчдийг хэрэглэгчтэй холбох, бүтээгдэхүүний чанар стандарт, загварыг захиалагчид танилцуулах, улмаар эдийн засгийн үр ашигтай үйлдвэрлэлийг хөгжүүлэх арга замыг илүү оновчтой тодорхойлоход үзэсгэлэнгийн гол зорилго оршиж байгаа юм” гэлээ.