“ОЛОН НИЙТИЙН ЦАХИМ СҮЛЖЭЭ АШИГЛАЖ БАЙГАА ТЕРРОРИСТУУДТАЙ ТЭМЦЭХ НЬ” СЭДЭВТ СУРГАЛТ ЗОХИОН БАЙГУУЛЛАА

Олон улсын эрүүгийн цагдаагийн байгууллага-Интерполоос Азийн бүсийн орнуудын хууль сахиулах байгууллагын ажилтнуудад зориулж хэвлэл мэдээлэл, олон нийтийн цахим сүлжээ ашиглаж байгаа террорист бүлгүүдтэй тэмцэх чиглэлээр мэргэшүүлэх сургалтыг зохин байгуулав.

Террорист гэмт бүлэг, бүлэглэлүүд, суртал ухуулга хийн энгийн ард иргэдийг өөртөө элсүүлэхээр оролдох, тэднийг тэрс үзэлтэй болгох, террорист хадлага үйлдүүлэх, үйлдэхээр бэлтгэхийн тулд тэдгээр иргэдийн нууц түлхүүр үгийг олох, IP хаягаар нь олж ярин айлган сүрдүүлэх зэргээр олон нийтийн сүлжээг ашиглаж байгаа тул мэдээлэл цуглуулах, нотлох баримт олзворлоход сайн туршлагыг судлах, хөгжүүлэх, түгээн дэлгэрүүлэхэд тус сургалт чиглэгдэж байгаа юм.

Интерполын Олон улсын терроризмтой тэмцэх стратегийн хүрээнд, Кибер болон Терроризмтой тэмцэх чиглэлээр стратегийн болон тактикийн түвшинд ажилладаг хууль сахиулах байгууллагуудын ахлах мэргэжилтэн, ажилтнуудад зориулж Сингапур Улс дахь Интерполын Инновацын олон улсын цогцолборт семинар зохион байгуулснаар тус хөтөлбөр өнгөрсөн оны долоодугаар сард эхэлсэн аж.
Гурван өдөр үргэлжилсэн тус хурал нь терроризмын аюул заналтай тэмцэх стратегийг хэрэгжүүлэх, боловсронгуй болгоход сайн туршлага бий болгох, мэдлэг мэдээлэл, ур чадвараа өөр хоорондоо солилцож хуваалцах боломж олгосон юм.

Хоёр удаагийн тусгай сургалт нь Интерполын Инновацын олон улсын цогцолборт болсон ба тус хурлуудаар терроризмтой тэмцэх гэмт хэргийн мөрдөн шалгах ажиллагааг сайжруулах, террорист этгээдүүдтэй холбогдсон үйл явдлыг яллах, мөрдөн шалгах, таслан зогсоох, урьдчилан сэргийлэхийн тулд олон нийтийн мэдээллийн хэрэгслээс цахим нотлох баримтыг олзлох, мэдээлэл цуглуулах чиглэлээр оролцогчдын мэдлэг ур чадварыг дээшлүүлэх практик дадлага хийлгэх зэргээр явагдсан юм.

Интерпол тус сургалтуудыг Австралийн Холбооны цагдаа, Лондон Хотын цагдаагийн газрын Терроризмтой тэмцэх багтай хамтран зохион байгуулсан бөгөөд Канадын эзэнт хааны морьт цагдаагийн газар, Сингапурын Өмгөөлөгчдийн танхим, болон бусад хувийн салбарын төлөөлөгчдийн дэмжлэг туслалцаатайгаар зохион байгуулсан байна. Канадын засгийн газраас санхүүжүүлсэн тус сургалт нь Зүүн Өмнөд Азийн бүс нутагт үндэстэн дамнасан терроризм болон бусад аюулгүй байдлын эсрэг гэмт хэрэгтэй тэмцэх тухай Интерполын чадамжийг бэхжүүлэх хөтөлбөрийн хүрээнд зохион байгуулагдсан.

Тус хөтөлбөрийн зорилго нь Азийн улс орнуудын хууль сахиулах байгууллагатай харилцаа хамтын ажиллагаатай байж, терроризмын аюултай тэмцэх, ялангуяа гадаадын террорист дайчид, тэдгээрийн олон нийтийн цахим хэрэгсэл ашиглаж хүчирхийлэл, хэрцгийлэл үйлдэж буйг сурталчилах, өдөөн хатгаж турхирах зэрэг үйлдэлтэй хэрхэн тэмцэх, урьдчилан сэргийлэх хариу арга хэмжээ авахад чиглэгдсэн юм.

Интерполын олон улсын өмнө хүлээсэн хамгийн гол үүргийг терроризмтой өргөн далайцтайгаар тэмцэх хэмээн тодорхойлсон байдаг. 2014 онд НҮБ-ын Аюулгүйн Зөвлөлөөс Интерпол нь Олон улсын хууль сахиулах байгууллагуудын хооронд мэдээлэл солилцох замаар гадаадын террорист дайчдын зүгээс учруулах аюул заналын эсрэг авах арга хэмжээний тухай 2178 дугаартай тогтоолыг санал нэгтэйгээр баталсан байдаг гэж Интерполын үндэсний төв товчооны ажлын албанаас мэдээллээ.