ЦАГДААГИЙН ДЭСЛЭГЧ Б.ЭНХБАЯР НЭГЭН АЙЛЫГ ОРОН ГЭРГҮЙ БОЛОХ АЮУЛААС ХАМГААЛЛАА

Чингэлтэй дүүрэг дэх цагдаагийн хоёрдугаар хэлтсийн эргүүлийн офицер, цагдаагийн дэслэгч Б.Энхбаяр үүргээ амжилттай гүйцэтгэж, айлын гэр шатаж байсныг унтраан, нэгэн өрхийг гэр оронгүй болох аюулаас хамгаалжээ.

Тэрбээр энэ сарын 28-ны өдөр түүнийг авто эргүүлийн үүрэг гүйцэтгэж байх үедээ тус дүүргийн 12 дугаар хорооны нутаг “Булгийн гудамжинд айл шатаж байна” гэсэн дуудлагын дагуу шуурхай ажиллаж, иргэн Ц-ийн таван ханатай монгол гэрт гал гарч байсныг унтрааж, аюулгүй болгосон байна. Гэрийн эзэн иргэн Ц гэр бүлийн хамт цагдаагийн дэслэгч Б.Энхбаяртай уулзан, талархал илэрхийлсэн байна.