Нийслэлийн зургаан дүүргийн нутаг дэвсгэр дэх эвдэрч, хазайсан, унасан замын хөдөлгөөнд оролцогчдод буруу мэдээлэл өгч болзошгүй байдалтай болсон замын тэмдэг тэмдэглэгээнүүдийг засварлаж байна.

Тэмдэг, тэмдэглээг засварлах ажил өнөөдөр Сүхбаатар дүүрэгт явагдаж байна. Засварын ажлыг нийслэлийн Авто замын хөгжлийн газар, Улаанбаатар зам засвар арчлалын газартай хамтарч, 16 хүний бүрэлдэхүүнтэй хоёр бригад гүйцэтгэж байгаа юм.

Энэ тухай Сүхбаатар дүүрэг дэх Замын цагдаагийн хэлтсийн техник замын хяналтын мэргэжилтэн, цагдаагийн дэслэгч Ц.Дэлгэрхишиг “Замын цагдаагийн албанаас Замын хөдөлгөөний аюулгүй байдлын тухай хуулийн хэрэгжилтийг хангах хүрээнд Замын хөдөлгөөний аюулгүй байдлын тухай хуулийн 54 дүгээр зүйлийн 54,13-15 заалтын дагуу Улаанбаатар хотын зургаан дүүргийн хэмжээнд нэн даруй  засварлах шаардлагатай тэмдэг, тэмдэглээг засаж байна. Дүүргүүдийн техник замын хяналтын мэргэжилтний гаргаснаар 348 тэмдэгийг засварлах ёстой. Иргэд болон жолооч нарын санаатай болон санамсаргүй үйлдлээс болж замын тэмдэгийг мөргөж гэмтээх, санаатайгаар авах үйлдэл нь  жолооч явган зорчигч нарт буруу мэдээлэл өгч зам тээврийн осол гарах нөхцөл бүрдэхээс урьдчилан сэргийлж замын цагдаагийн албанаас тэмдэгийн арчлалт хийх, засах арга хэмжээ авч ажиллаж байна” гэлээ.