Цагдаагийн ерөнхий газрын Нийтийн хэв журам хамгаалах албаны 2016 оны тайлангийн хурал өчигдөр /2016.12.23/ боллоо. Тус албаныхан 2016 онд хийсэн ажлаа дүгнэн, шилдэг алба хаагчдаа тодруулан, шагнал гардуулсан юм.

Тус албаны хөдөлмөрийн тэргүүний алба хаагчаар Сонгинохайрхан дүүрэг дэх Цагдаагийн нэгдүгээр хэлтсийн ахлах байцаагч, цагдаагийн ахмад Г.Ганбаяр, хөдөлмөрийн аварга хамт олноор цагдаагийн дэд хурандаа Ц.Одчулуун даргатай Дорнод аймаг дахь Цагдаагийн газрын Нийтийн хэв журам хамгаалах тасаг шалгарлаа.

Мөн ажил мэргэжлийн шилдэг хэв журмын ажилтнаар Сэлэнгэ аймаг дахь Цагдаагийн газрын хэсгийн байцаагч, цагдаагийн ахмад Б.Хосбаяр, шилдэг хэсгийн байцаагчаар Баянгол дүүрэг дэх Цагдаагийн нэгдүгээр хэлтсийн хэсгийн байцаагч, цагдаагийн ахлах дэслэгч Б.Түмэнжаргал, шилдэг хэв журмын цагдаагаар Сүхбаатар дүүрэг дэх Цагдаагийн хоёрдугаар хэлтсийн хороо хариуцсан цагдаа, цагдаагийн ахлах ахлагч Л.Амарсайхан, шилдэг эргүүлийн цагдаа жолоочоор Сүхбаатар дүүрэг дэх Цагдаагийн нэгдүгээр хэлтсийн эргүүүлийн цагдаа жолооч цагдаагийн ахлах ахлагч Б.Түвшинтөгс нар шалгарч, шагналаа гардсан юм.

2016 оны шилдэг “Гэр бүлийн хүчирхийлэл, хүүхдийн эсрэг гэмт хэргээс урьдчилан сэргийлэх байцаагч”-аар Хэнтий аймаг дахь Цагдаагийн газрын Гэр бүлийн хүчирхийлэл, хүүхдийн эсрэг гэмт хэргээс урьдчилан сэргийлэх байцаагч, цагдаагийн ахлах дэслэгч Б.Оюунтуяа шалгарлаа.

Тайлангийн үеэр ЦЕГ-ын Нийтийн хэв журам хамгаалах албаны дарга, туслах комиссар Б.Ганзориг “Цагдаагийн албаны тухай хууль батлагдсанаар Цагдаагийн байгууллагын бүтцэд өөрчлөлт орсон ба Цагдаагийн ерөнхий газрын даргын 2013 оны 755 дугаар тушаалаар тус албаны бүтэц орон тоо батлагдан, нийтийн хэв журам хамгаалах чиг үүргийг улсын хэмжээнд нэгтгэн зохион байгуулж, мэргэжил, арга зүйн удирдлагаар хангах, харицан уялдаа бүхий цогц арга хэмжээг хэрэгжүүлэн ажиллаж байна.

Улиран одож байгаа 2016 онд нийтийн хэв журам хамгаалах чиг үүргийн хүрээнд хийж гүйцэтгэсэн онцлог ажлуудаас дурдвал, Ази, Европын дээд түвшний 11 дүгээр уулзалт, Улсын Их Хурал, аймаг, нийслэл, сум, дүүргийн ээлжит сонгууль, Үндэсний Их баяр наадмын үеийн аюулгүй байдлыг хангах, хамгаалалт зохион байгуулах, гэмт хэрэг, зөрчлөөс урьдчилан сэргийлэх ажлын бэлтгэлийг ханган, зөрчил, дутагдалгүйгээр зохион байгуулсан.

Дээд шатны байгууллагаас батлагдсан хууль, тогтоомжийг нэг мөр ойлгуулах, алба хаагчдаас алдаа, дутагдалгүй дагаж мөрдүүлэхэд үйл ажиллагааг сайжруулах зорилгоор 12 хуулийн төсөл, 41 журам, зааврын төсөлд санал өгч, 3 журмын төслийг шинээр боловсруулан, алба хаагчдад зориулан 2 гарын авлага боловсруулж, алба хаагчдад хүргүүлэн, хэрэгжилтийг хангуулав.

Зохион байгуулж байгаа ажил болон тайланд дурьдсан дүн мэдээнээс харахад сахилгын зөрчил 86 буюу 14.7, сахилгын арга хэмжээ авагдсан алба хаагч 96 буюу 15.9 хувиар буурсан нь алба хаагчдын ажлын хариуцлага нэмэгдэж, сахилга, ёс зүй сайжирч байна гэж дүгнэхээр байгаа юм. Бид бүхэн өнгөрч буй онд олон сайхан ажил, арга хэмжээг хамтдаа үр дүнтэй, зохион байгуулсаныг дурьдхад таатай байна” гэж хэлсэн юм.