Гэмт хэрэгтэй тэмцэх албаны хэрэг бүртгэлтийн удирдах ажилтнуудад “Удирдлагын менежмент” сэдвээр модуль сургалтыг Цагдаагийн ерөнхий газрын Сургалтын төвд 2016 оны 3 дугаар сарын 02-ны өдрөөс эхлэн зохион байгуулж байна.

Цагдаагийн байгууллагын 2016 оны сургалтын гол онцлог нь алба хаагчийг ажлын байран дээрээ үүрэг гүйцэтгэх чадварыг дээшлүүлэхэд шууд чиглэгдсэн клиник сургалтыг явуулах бөгөөд удирдах ажилтны соёл, ёс зүйг төлөвшүүлэх, алба хаагчдынхаа үйл ажиллагаанд мэргэжил арга зүйн туслалцаа өгч ажиллаж чаддаг болгоход чиглэгдэж байгаагаараа онцлогтой.

2016 оны 9 дүгээр сарын 01-ний өдрөөс эхлэн Монгол улсын Эрүү, Зөрчлийн тухай хуулийн болон батлагдахаар төлөвлөгдсөн Хууль сахиулах, Цагдаагийн албаны, Эрүүгийн хэрэг хянан шийдвэрлэх тухай хуулиуд хэрэгжиж эхлэх учраас хуулиудын төслийн агуулга, үзэл баримтлал болон ”Гүйцэтгэлийн удирдлага”, “Хэрэг бүртгэх, мөрдөн байцаах ажиллагаанд анхаарах асуудал”, “БНСУ-ын хэрэг мөрдөх ажиллагааны арга тактик” зэрэг сэдвүүдийг тусган Цагдаагийн ерөнхий газар, Нийслэлийн прокурорын газар, Эмгэг судлалын үндэсний хүрээлэн, МУИС-ийн НШУС, Монголын хүний нөөцийн институт, Цэргийн нөхөрлөл төрийн бус байгууллага, Бүгд найрамдах Солонгос улсын зөвлөх багш нар хичээл сургалтыг хамтран зохион байгуулж байна.

Сургалтад Улаанбаатар хотын цагдаагийн газрын харъяа дүүргүүд дэх цагдаагийн 1, 2, 3 дугаар хэлтсүүдийн хэрэг бүртгэх тасгийн дарга болон Замын цагдаагийн газрын дарга нийт 15 алба хаагчид оролцлоо.