Улаанбаатар Цагдаагийн хүрээний газар, хэлтсийн бие бүрэлдэхүүний дунд найрал дууны уралдаан зохион байгуулав.

Цагдаагийн Ерөнхий газрын  2015 оны үйл ажиллагааны төлөвлөгөөнд тусгагдсан Улаанбаатар цагдаагийн хүрээний газар, хэлтэс, нэгжүүдийн бие бүрэлдэхүүний дунд урлагийн наадам зохион байгуулах ажлын хүрээнд Найрал дууны урлагаар дамжуулан цагдаагийн алба хаагчдын соёлын боловсролд нөлөөлж, багаар хамтран ажиллах, дуулах чадварыг хөгжүүлэх, нэгэн зорилго, зохион байгуулалттай, харилцан хүлээх үүрэг хариуцлагатай, сахилга баттай, үнэт зүйлсийн төлөө алсын хараатай мөр зэрэгцэн хамтран ажиллах чадваруудыг төлөвшүүлэх, Цагдаагийн найрал дууны хамтлагийг үүсгэн байгуулах, Цагдаагийн байгууллага, алба хаагчдыг олон нийтэд сурталчлах зорилгоор Цагдаагийн Ерөнхий газрын Хэвлэл мэдээллийн төв, Монголын найрал дууны уран бүтээлчдийн холбоотой хамтран найрал дууны уралдааныг хоёр  үе шаттай амжилттай зохион явууллаа.

Уралдаанд Улаанбаатар цагдаагийн хүрээний газар, хэлтсийн бие бүрэлдэхүүн хамрагдаж, 2015 оны 5 дугаар сарын 29-ний өдөр ОНАБХГ-ын Хамгаалалтын 1, 2, 3 дугаар газрууд, Замын цагдаагийн газар, Сүхбаатар дүүрэг дэх цагдаагийн 1, 2 дугаар хэлтэс, Хан-Уул дүүрэг дэх цагдаагийн 1 дүгээр хэлтэс, Чингэлтэй дүүрэг дэх цагдаагийн 1 дүгээр хэлтэс, Цагдаагийн Ерөнхий Газрын Авто бааз зэрэг байгууллагууд оролцлоо.

Уралдааны тэргүүн байранд ОНАБХГ-ын Хамгаалалтын 2 дугаар газар “Ариун дайн”, Буриад ардын дуу “Ижий минь” бүтээлээр,

2-р байранд Сүхбаатар дүүрэг дэх цагдаагийн 1 дүгээр хэлтэс “Хайгуулч хархүүгийн дуу”, Буриад ардын дуу “Ижий минь” бүтээлээр,

3-р  байранд ОНАБХГ-ын Хамгаалалтын 1 дүгээр газар  “Талд унасан жавар”, ТШАЖ Л.Мөрдорж, Д.Пунцаг “Түүхт хил” бүтээлээр, Тусгай байранд Сүхбаатар дүүрэг дэх цагдаагийн 2 дугаар хэлтэс “Орос дууны эвлүүлэг”, “Жаргаах зүрхэн”, ЦЕГ-ын Авто бааз МУУГЗ Г.Дарамзагд “Өргөн Сэлэнгэ”, БМАД “Тоохуу нэгэн гос” бүтээлээр тус тус шалгарч, өргөмжлөл мөнгөн шагналаар шагнагдсан юм.