ЗАВХАН АЙМГИЙН ЦАГДААГИЙН ГАЗРААС МЭДЭЭЛЖ БАЙНА

Завхан аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн 2015 оны ажлын төлөвлөгөөний 2 дугаар бүлгийн 2.1 дэх хэсэгт заасны дагуу сумдын Гэмт хэргээс урьдчилан сэргийлэх ажлыг зохицуулах салбар зөвлөлийн үйл ажиллагаатай биечлэн танилцаж, шалган зааварчилж, иргэд-олон нийтэд хууль сурталчлах ажлын хэсэг Завхан аймгийн урд чиглэлийн сумууд болох Цагаанхайрхан, Цагаанчулуут, Отгон, Шилүүстэй сумдад 2015 оны 04 дүгээр сарын 06-ны өдрөөс мөн сарын 11-ний хооронд ажилласан юм.

Ажлын хэсгийг аймгийн прокурор, хууль цаазын итгэмжит зөвлөх Н.Доржсүрэн ахалж, хяналтын прокурор, хууль цаазын зөвлөх Ч.Алтансүх, Нэгдсэн эмнэлгийн Хавдар судлалын их эмч Д.Уугантөгс, Цагдаагийн газрын Гэмт хэрэгтэй тэмцэх тасгийн ахлах мөрдөн байцаагч, /орлогч/ цагдаагийн дэд хурандаа О.Одхүү, Хүүхдийн ахлах байцаагч, цагдаагийн хошууч Л.Өлзийжаргал, олон нийттэй харилцах ахлах байцаагч, цагдаагийн ахмад Ж.Баярмаа, Замын хөдөлгөөний аюулгүй байдлыг хангах ахлах байцаагч, цагдаагийн ахмад С.Батбаатар, хэсгийн цагдаа, цагдаагийн ахлах ахлагч Ж.Оюунтунгалаг, цагдаа- жолооч, цагдаагийн ахлах ахлагч Ж.Баасанжав, Алдархаан сумын олон нийтийн цагдаагийн ажилтан Ө.Цэрэндорж, Иргэний зөвлөлийн гишүүн Ш.Чулуунбаатар нар дээрхи сумдад томилолтоор үндсэн таван чиглэлээр ажиллаа.
Сургалт сурталчилгаа, мэдээлэл хийх ажлын хүрээнд сумдын иргэд хөдөлмөрчдөд аймгийн прокурор, хууль цаазын итгэмжит зөвлөх Н.Доржсүрэн аймаг, сумын 2014 оны эрүү хэв журмын нөхцөл байдлын талаар, Цагдаагийн газрын олон нийттэй харилцах ахлах байцаагч, цагдаагийн ахмад Ж.Баярмаа аймгийн ГХУСАЗСЗ, цагдаагийн газраас гэр хүчирхийлэлтэй тэмцэх, мал хулгайлах гэмт хэрэгтэй тэмцэх чиглэлээр хийж буй ажлын талаар тус тус мэдээлэл хийсэн юм.
Гэмт хэргээс урьдчилан сэргийлэх ажлын хүрээнд дээрх сумдад үйл ажиллагаа явуулж буй төрийн байгууллага, аж ахуйн нэгжийн ажилтнууд, иргэдийн төлөөлөл оролцсон нийт 24 багийн дунд Монгол Улсын хууль, тогтоомжийн хэрэгжилтийн өнөөгийн байдал, цаашид анхаарах асуудал сэдвээр “Дэвжээ” тэмцээнийг зохион байгуулан, шилдгүүдийг шалгаруулан шагнаж урамшууллаа.
Хүүхдийн албанаас зохион байгуулж буй ажлын хүрээнд “Эрхээ эдэлж, үүргээ биелүүлцгээе” 10 хоногийн аяны үр дүнг тооцон, бүрэн дунд сургуулийн дунд, ахлах ангийн сурагчдын дунд гар зургийн уралдаан, ахлах ангийн сурагчдын дунд “Томчуудад хэлэх бидний үг” сэдэвт зохион бичлэгийн уралдааныг тус тус явуулан, шилдэг бүтээлүүдийг шалгаруулан, зургийн үзэсгэлэн гаргаж, зохион бичлэгүүдийг насанд хүргэгч нарт уншиж сонордуулан, аянд амжилттай оролцсон хүүхдүүд, эцэг эхчүүд, багш сурган хүмүүжүүлэгч нарыг шагнасан юм.
Хөдөлгөөний аюулгүй байдлыг хангах ажлын хүрээнд “Мотоцикль” нэгдсэн арга хэмжээг зохион байгуулжээ. Соён гэгээрүүлэх ажлын хүрээнд Цагдаагийн газрын дэргэдэх “Энхийн харуул” хамтлагийн хэсэгчилсэн тоглолтоор үйлчилж, үдшийн цэнгүүнийг зохион явууллаа.