БАЯН-ӨЛГИЙН АЙМГИЙН ЦАГДААГИЙН ГАЗРААС МЭДЭЭЛЖ БАЙНА

“Ахлагчийн 10 хоног” үйл ажиллагааг зохион явуулав.

Цагдаагийн газрын Нийтийн хэв журам хамгаалах тасгийн ахлагч бүрэлдэхүүнээс санаачлан тус Цагдаагийн газрын түүхт 75 жилийн ойг угтаж, иргэд, олон нийтийн болон төрийн болон төрийн бус байгууллагын хамтын ажиллагааг бэхжүүлэх, ахлагч бүрэлдэхүүний багаар ажиллах ур чадварыг дээшлүүлэх, ядуурлыг бууруулах, эмзэг бүлгийг дэмжих зорилгоор “Ахлагчийн 10 хоног” арга хэмжээг 2015 оны 01 дүгээр сарын 20-ны өдрөөс 2015 оны 02 дугаар сарын 01-ний өдрийн хооронд зохион явууллаа.


Арга хэмжээний хүрээнд амьдралын баталгаажих доод түвшинээс доогуур орлоготой, нэн ядуу Өлгий сумын иргэн С.Нурлан, Х.Ерхумар, Ц.Бор, Б.Ерболат нарын өрхөд 700.000 /долоон зуун мянган/ төгрөгийг цагдаагийн газрын нийт алба хаагч нарын зүгээс дэмжлэг болгон хандивлаж, тус аймгийн Хүүхэд, гэр бүл хөгжлийн хэлтэс, Нэгдсэн эмнэлэг, “Эрчим” ХХК, “Хайнар” ХХК, Капитрон банк, Улаанзагалмайн хороо зэрэг төрийн болон төрийн бус байгууллагын дэмжлэгтэйгээр дээрх өрхүүдэд хоол хүнс болон нэн шаардлагатай эд материалын тусламж үзүүлэв.


Мөн ахлагч бүрэлдэхүүний зүгээс С.Нурлан, Х.Ерхумар нарын гэрт иж бүрэн засвар үйлчилгээ хийж, тав тухтай амьдрах орчныг бүрдүүлэхээс гадна С.Нурлан, Х.Ерхумар, Ц.Бор, Б.Ерболат нарын гэр бүлийн гишүүд тус бүрт иж бүрэн хувцас, 1 тонн нүүрс, 1 м3 мод, хөнгөлөлттэй цахилгаан болон хүнсний зүйлээр бүрэн хангаж, сэтгэлийн дэм үзүүлсэн юм.


Энэ ажлын хүрээнд “Хельп Интернациональ” олон улсын хүмүүнлэгийн байгууллагатай хамтран ажиллах талаар тохиролцоонд хүрч, ядуурлыг бууруулах, эмзэг бүлгийг дэмжихэд доривтой хувь нэмэр оруулж, улмаар ахлагч бүрэлдэхүүний багаар ажиллах ур чадвар, бүтээлч сэтгэлгээг хөгжүүлсэн арга хэмжээ боллоо.


Зохион явуулсан ажил, арга хэмжээний явц байдал, үр дүнг орон нутгийн хэвлэл мэдээллийн байгууллагаар дамжуулан олон нийтэд сурталчлах зорилгоор орон нутгийн “Дербес” телевизтэй хамтран “Халуун итгэлийн зул” 30 минутын тусгай нэвтрүүлэг бэлтгэж, олон нийтэд сурталчлав.