Тус газраас Цагдаагийн ерөнхий газрын даргын тушаалаар цэргийн алба хаасны тэтгэвэрт гарч буй Урьдчилан сэргийлэх, шуурхай удирдлагын тасгийн гэр бүлийн хүчирхийллээс урьдчилан сэргийлэх ахлах мэргэжилтэн, цагдаагийн ахмад Ё.Бадрал, Захиргааны удирдлагын тасгийн цагдаа-жолооч, цагдаагийн ахлах ахлагч С.Цогтбаатар, Гучин-Ус сумын хэсгийн цагдаа, цагдаагийн ахлах ахлагч Ж.Отгонбаатар нарт өнөөдөр буюу 2026 оны 10 дугаар сарын 05-ны өдөр хүндэтгэл үзүүлэх арга хэмжээг зохион байгууллаа.

Арга хэмжээг нээж Цагдаагийн газрын дарга, цагдаагийн хурандаа Б.Онон хэлсэн үгэндээ “Алба хаасан он жилүүдэд эрхэлсэн ажилдаа үр бүтээлтэй ажиллаж, хуримтлуулсан мэдлэг, туршлага, хариуцлагатай ажил үйлсээрээ хамт олондоо үлгэр дуурайл болж, залуу хойч үеэ сурган хүмүүжүүлэх үйлсэд үнэтэй хувь нэмэр оруулсан та бүхнээрээ бид үргэлж бахархдаг” хэмээн онцолж, талархал илэрхийллээ.

Уулзалтын үеэр ахмад ажилтнуудын ажил, амьдралын баялаг түүхийг харуулсан “Зураг түүх өгүүлнэ” дурсамж видеог толилуулж, ая дууны мэндчилгээ дэвшүүлж, Цагдаагийн ерөнхий газрын Ахмадын хорооны ТББ-аас амар тайван амьдралын төлөө зүтгэсэн хөдөлмөр, бүтээлийг нь үнэлж, “Ардын багш, гавьяат хуульч Б.Пүрэв”-ийн нэрэмжит “Зууны алдартан”, “Монгол цагдаа” тэмдгээр тус тус шагнаж, дурсгалын зүйл гардууллаа.

Та бүхэндээ цагдаагийн газрын нийт бие бүрэлдэхүүний өмнөөс эрүүл энх, урт насалж, удаан жаргахын өлзийтэй ерөөлийг өргөн дэвшүүлье.