Дотоод хэргийн их сургуулийн 2025–2026 оны хичээлийн жилийн төгсөлтийн ёслол болж, Цагдаагийн сургуулийг амжилттай төгссөн сонсогчид мэргэжлийн диплом, энгэрийн тэмдэг, цолоо гардан авч, цагдаа, дотоодын цэргийн бүрэлдэхүүнд шинэхэн офицерууд нэгдлээ.

Энэ жил Дотоод хэргийн их сургуулийн Цагдаагийн сургууль болон бусад бүрэлдэхүүн сургуулиудаас нийт 455 бакалавр, Удирдлагын академийн магистрын хөтөлбөрөөс 21 төгсөгч бэлтгэгдэж, хууль сахиулах салбарын хүний нөөц шинэ төгсөгчдөөр өргөжин тэлж байна.

Төгсөлтийн ёслолд Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх оролцож, төгсөгчдөд цэргийн цол, мэргэжлийн диплом, энгэрийн тэмдгийг гардуулан, төрийн өмнө өргөсөн тангарагтаа үнэнч байж, хууль дээдлэх зарчим, хүний эрхийг эрхэмлэн, иргэдийн аюулгүй байдлыг сахин хамгаалах үүргээ нэр төртэй хэрэгжүүлэхийг захилаа.

Цагдаа, дотоодын цэргийн байгууллага нь мэргэжлийн, ёс зүйтэй, чадварлаг хүний нөөцийг бэлтгэх, хөгжүүлэхэд Дотоод хэргийн их сургуультай нягт хамтран ажиллаж, шинээр төгссөн офицер, алба хаагчид орчин үеийн мэдлэг, ур чадвараа бодит албанд хэрэгжүүлж, иргэдийн амар тайван, аюулгүй байдлын төлөө хүчин зүтгэнэ гэдэгт итгэлтэй байна.

Шинэхэн төгсөгчдөдөө баяр хүргэж, албаны зам нь амжилт бүтээлээр дүүрэн байхыг хүсье.