Цагдаагийн байгууллагын мөрдөгчдийн нэгдсэн зөвлөгөөний үеэр мөрдөн шалгах ажиллагаанд олон жил үр бүтээлтэй ажиллаж, гэмт хэрэгтэй тэмцэх, хууль сахиулах үйлсэд үнэтэй хувь нэмэр оруулсан 19 алба хаагчийг Монгол Улсын Ерөнхийлөгчийн зарлигаар төрийн дээд шагнал, хүндэт цолоор шагнаж урамшууллаа.

Тодруулбал, "Гавьяат хуульч" хүндэт цолоор Цагдаагийн ерөнхий газрын Гэмт хэрэгтэй тэмцэх албаны ахмад ажилтан, бэлтгэл хурандаа Д.Цогтбаяр, Мөрдөн шалгах албаны Хүнд гэмт хэрэг мөрдөн шалгах хэлтсийн дарга, цагдаагийн хурандаа Д.Энхтөр шагнагдсан бол "Цэргийн гавьяаны одон"-гоор 3, "Цэргийн хүндэт медаль"-иар 14 алба хаагч тус тус шагнагдлаа.

Эдгээр шагнал нь алба хаагчдын хууль сахиулах, мөрдөн шалгах ажиллагааг хэрэгжүүлэх, гэмт хэргийг илрүүлэх, таслан зогсоох үйлсэд оруулсан хувь нэмэр, мэргэжлийн ур чадвар, хариуцлага, хөдөлмөр зүтгэлийг төрөөс өндрөөр үнэлсний илэрхийлэл юм.

Төрийн дээд шагнал, хүндэт цол хүртсэн нийт алба хаагчдадаа баяр хүргэж, ажил үйлсэд нь өндөр амжилт, эрүүл энх, сайн сайхан бүхнийг хүсье.