ЦАГДААГИЙН ХОШУУЧ Э.ОКТЯБРЬ: МАЛЧИД УЙЛЖ БАЙНА

Намрын сүүл сар шувтарч, өвлийн эхэн сартай золгох гэж байна. Жил жилийн энэ улиралд малын хулгай гаарах байдал ихэсдэг. Малчид хариулга маллагаандаа анхаарч, цагдаагийн байгууллага сонор сэрэмжээ нэмэгдүүлж, нэгдсэн арга хэмжээ зохион байгуулдаг ч энэ төрлийн гэмт хэрэг буурахгүй байна. НЦГ-ын Гэмт хэрэгтэй тэмцэх газрын хулгайлах гэмт хэрэг мөрдөн шалгах хэлтсийн алба хаагчид дараах хэргийг илрүүлсэн байна. Энэ талаар бид эрүүгийн ахлах төлөөлөгч, цагдаагийн хошууч Э.Октябраас тодрууллаа.

2014.10.07-оос 8-нд шилжих шөнө гарсан хэргийн талаар тодруулж хэлнэ үү?

Сэлэнгэ аймгийн Орхонтуул сумын нутгаас шөнө хүрэн зүсмийн морь, Төв аймаг Баянцогт сумын нутгаас 9-өөс 10-нд шилжих шөнө хул халзан морь, хээр морь, сартай хонгор гурван тооны морийг Увс аймгийн Цагаанхайрхан сумын харьяат бүлэг этгээдүүд хулгайлсныг цагдаагийн алба хаагчид шуурхай ажилласны үр дүнд илрүүлсэн.

Энэ хэргийг үйлдсэн этгээдүүд хэдүүлээ, ямар машинтай байсан бэ?

Тэд хулгайн гэмт хэрэг үйлдэхдээ 03-74 УНЛ улсын дугаартай Тоёото приус 10 маркийн мөнгөлөг саарал өнгийн машин ашиглан хулгайлсан. Өмнө нь энэ төрлийн гэмт хэрэгт холбогдон ял шийтгүүлж, Улаанбаатар хотод шилжин ирээд эрхэлсэн тодорхой ажилгүй залуус үйлдсэн нь тогтоогдсон. Харамсалтай нь махыг нь тушаахаар бэлдсэн байсан учраас малчид уйлж байна.

Гэмт этгээдүүдийг хаанаас баривчилсан бэ?

Хулгайлсан адуугаа Сонгинохайрхан дүүргийн 10-р хороо Зүүн Баян Уулын 31-21 тоот хашаанд байрлах автомашины грашд нядлаж, махыг нь Чингэлтэй дүүргийн "Хүчит шонхор" захын нэр бүхий ченжүүдэд худалдан борлуулсан байсныг НЦГ-ын ГХТГ-ын Хулгайн гэмт хэрэг мөрдөн шалгах хэлтсийн алба хаагчид, Сэлэнгэ аймгийн Цагдаагийн газрын Сайхан сумын сум дундын цагдаагийн хэсгийн алба хаагч нартай хамтран гэмт этгээдүүдийг 2014-10-12ны шөнө баривчлан эрүүгийн хэрэг үүсгэн, бусад эзэнгүй мал хулгайлах гэмт хэрэгтэй холбон шалгаж байна

МАЛЧИН ИНГЭЖ ЯРЬЖ БАЙНА

Энэ үеэр бид малаа алдсан малчинтай уулзаж ярилцлага авахад, "Аль хэдийн хэдэн адууг маань нядласан байна. Эдгээр залууст үнэхээр их гомдож байна. Би түрүү жил бас алдаж байсан. Хүүхэд байхаасаа эхлээд мал дагаж өдий зэрэгт хүрлээ. Малынхаа буянаар сайхан л амьдарч байна. Бид залуу байхаас өдий хүртэл малаа хайрлаж, хариулж ирсэн болохоос хулгайлж байсангүй ээ. Хэргийг шуурхай илрүүлж өгсөн цагдаагийн алба хаагч нартаа баярлалаа" гээд нүдэнд нь нулимас цийлэгнэж байв. Буурлын буяныг даахгүй бусдын малыг хулгайлсан эдгээр бүлэг этгээдүүд эзэнгүй малын хэд хэдэн хэрэгт сэжиглэгдэн шалгагдаж эхэллээ.Харин гэмт этгээдүүдтэй уулзахад хийсэн хэрэгтээ гэмшиж байна, дахиж хулгай хийхгүй гэсэн худал үгнээс өөр үг хэлсэнгүй ээ.

Бусдын олон жил хариулж малласан адуун сүргээс хулгайлж, амар хялбар аргаар мөнгө олох гэсэн залуус олширч байгаа тул малчид та бүхэн малаа хариулга маллагаатай байлгаж, сонор сэрэмжтэй байж, алдсан тохиолдолд хурдан шуурхай холбогдох албанд мэдэгдэж байхыг цагдаагийн байгууллагаас анхааруулж байна.