Монгол Улсын Ерөнхийлөгчийн ивээл дор энэ оны 11 дүгээр сарын 21, 22-ны өдрүүдэд “Орон нутаг дахь Үндэсний аюулгүй байдлыг хангах тусгайлсан чиг үүрэг бүхий байгууллагуудын удирдах бүрэлдэхүүн, удирдах ажилтны зөвлөгөөн” зохион байгуулагдаж байна.

Ийнхүү төвийн бүсийн салбар хуралдаан өнөөдөр /2024.11.21/ эхэлж, Дархан-Уул, Сэлэнгэ, Төв аймгуудын Үндэсний аюулгүй байдлыг хангах  чиг үүрэгтэй байгууллагуудын удирдах бүрэлдэхүүн оролцож байгаа юм.

Хуралдааны нээлтийн үйл ажиллагаанд Монгол Улсын Ерөнхийлөгчийн Батлан хамгаалах, цэргийн бодлогын зөвлөх, бригадын генерал Д.Баасандамба, Цагдаагийн ерөнхий газрын дарга, Дотоодын цэргийн командлагч, бригадын генерал Т.Сүхболд, зөвлөлийн гишүүд, холбогдох албан тушаалтнууд оролцлоо.

Энэхүү хуралдаанаар “Бүс орон нутгийн аюулгүй байдлын эрсдэлийн үнэлгээ хийх аргачлал”, “Монгол Улсын Ерөнхийлөгчийн бодлого, “Монгол Улсын Засгийн газрын 2024-2028 оны үйл ажиллагааны хөтөлбөр”-ийн холбогдох заалтуудыг бүс, орон нутагт хэрэгжүүлэх арга зам, ”Дэлхийн улс орнуудын бүсчилсэн нутаг дэвсгэр, хөгжлийн бодлого, орон нутгийн аюулгүй байдлын нэгдсэн тогтолцлоо, туршлага, сургамж”, “Орон нутгийн аюулгүй байдал, эрсдэлийн мэдээлэл, удирдлагын цахим санг ашиглах арга зам” сэдвийн хүрээнд модератор, паналистууд хэлэлцүүлэг зохион байгуулж байна.