Баянзүрх дүүргийн 20 дугаар хороо Гачуурт тосгонд өнгөрсөн тавдугаар сарын 31-нд “Range Rover” маркийн автомашинтай залуус гарамгүй газраар Туул гол гаталж байгаад голын усны хайрганд идэгдсэн гүн рүү орон улмаар живэх шахжээ. Тухайн үед голын ус тэдний сууж явсан автомашины оройг давж, дотор нь сууж явсан зургаан том хүн, хоёр сартай бяцхан хүүхэд амиа алдах аюулд орсон байна. Энэ үед жолоо барьж явсан М.Золбоо бусдыгаа цаг  алдалгүй машиныхаа дээр гаргаж чадсан ч өөрөө гар алдан голын хүчтэй урсгалд урссан гэнэ. Голын эрэг дагуу амарч байсан амрагчид тэднийг харсан даруйдаа Шуурхай удирдлагын төвийн 102 дугаарын утсанд дуудлага өгснөөр Баянзүрх дүүргийн Цагдаагийн I хэлтэсийн харьяа Гачуурт тосгонд ажиллаж байсан цагдаагийн ахлах ахлагч Э.Энхбаяр, ахлах ахлагч Л.Мөнхбат нар ослын газарт очсон байна. Тэднийг ирэхэд голын эрэг орчмоор 20 гаруй хүн байсан хэдий ч яахаа мэдэхгүй, сандралдан ийш тийш гүйж байсан аж. Энэ үед нэгэн залуу амь тэмцэн голын дундах жижиг мөчирнөөс зүүгдсэн /жолоо барьж явсан М.Золбоо гар алдан голын хүчтэй урсгалд урсан улмаар бургаснаас зүүгдсэн/ байхыг харсан цагдаагийн ахлах ахлагч Э.Энхбаяр сэлж очин түүний амийг аварчээ. Үүний дараагаар гол дунд “Range Rover” маркийн автомашин дээр усны мандалтай зэрэгцэн цухуйж байсан таван том хүн нэг нярай хүүхдийг эсэн мэнд аварч, цаг алдалгүй эмнэлгийн тусламж үзүүлжээ.

Хоёр цагдаа цаг алдалгүй эр зориг гарган шуурхай ажиллан иргэдийн амь насыг авран голын эрэгт гарган эмнэлэгийнхэн яаралтай түргэн тусламжийг үзүүлсэн байна. Хэрвээ цагдаа нар тухайн үед автомашин живсан газарт түргэн шуурхай ирэн эр зориг, авхаалж самбаа гарган тэднийг авраагүй бол өнөөдөр миний хүүхдүүд осолдох байсан хэмээн Золбоогийн аав Н.Мягмар ярьсан юм.

Ингээд Баянзүрх дүүргийн Цагдаагийн I хэсгийн ахлах ахлагч Э.Энхбаяртай цөөн хором ярилцсан юм.

- Тэр үед нөхцөл байдал ямар байсан бэ?

- Баянзүрх дүүргийн 20 дугаар хороо Гачуурт тосгоны 85 дугаар сургуулийн урд усанд автомашинтай иргэд живж байна гэсэн дуудлагын дагуу түргэн шуурхай очиж шалгасан. Биднийг очиход иргэн М.Золбоо автомашиныхаа хүмүүсийг дээвэр дээр нь гаргаж байгаад гар алдан урсаж холгүйхэн бургаснаас зууран тогтож байсан. Тиймээс цаг алдалгүй түүний амийг аварсан. Мөн тухайн автомашины дээврийн хэсэг  уснаас цухуйсан байдалтай живсэн байсан. Түүний дээвэр дээр байсан зургаан хүнийг ахлах ахлагч Л.Мөнхбаттай хамтран голын эрэг рүү аюулгүй газарт гаргасан. 

- Автомашинтай иргэд усанд живээд хэр удсан байсан бэ?

- Нэлээд цаг хугацаа алдсан байсан. Учир нь биднийг очиход автомашины дээврээс бусад бүх хэсэг нь усанд бүрэн автсан байсан. Тухайн иргэд амрахаар гол гатлахдаа л голын гүехэн хэсгийг харан ус руу орсон байгаа юм. Тэд тухайн газрыг мэдэхгүй учраас голын цүнхэл хэсэг рүү орон автомашин нь живж эхэлсэн.

- Тухайн сургуулийн орчим автомашинаар гатлах гарам, гүүр байдаг уу?

- Машин живсэнээс дээшээ 150 метр газарт гүүр байдаг. Гэхдээ тэр гүүрийг Туул голын цэвэр усны хангамжийнхан л ашигладаг. Энгийн иргэдэд зориулаагүй түгжээтэй байдаг. Ер нь Гачуурт, Туул голыг гатлах зориулалтын гарам, гүүр байдаггүй. Туул голыг гатлах ёсгүй. Учир нь голын цаана нийслэл хотыг цэвэр усаар хангаж байгаа цэвэр усны байгууламжууд байдаг учраас иргэдийг зорчихыг хориглодог. Энэ дашрамд иргэдэд анхааруулахад одоо зуны дэлгэр цаг болж байна. Хөдөө орон нутагт зугаалж явахдаа хүүхэддээ хараа хяналт тавин гол уснаас хол, зориулалтын бус гарам, гүүрээр гол гатлахгүй байхыг анхааруулья.

Дашрамд дурдахад, Гачуурт тосгонд ажилладаг ахлах ахлагч Э.Энхбяр, Л.Мөнболд нар хоёулаа голтой ойр өссөн учраас усанд сайн сэлдэг бөгөөд хоёулаа аймгийн начин, сумын заан цолтой залуус юм байна.

 Г.Даша