Нийслэлийн цагдаагийн удирдах газраас өнөөдөр /2023.12.26/ 2023 оны үйл ажиллагааны тайлангийн хурлаа зохион байгуулж, 2023 онд цагдаа, дотоодын цэргийн анги, байгууллаас дэвшүүлсэн зорилт, гүйцэтгэлийн төлөвлөгөөний хэрэгжилтийг дүгнэж, тэргүүний болон шилдэг алба хаагчдад шагнал гардуулах ёслолын ажиллагааг зохион байгуулав.

Энэхүү  арга хэмжээнд Цагдаагийн ерөнхий газрын Дэд дарга, цагдаагийн хурандаа Т.Ганзориг, Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат, Нийслэлийн засаг даргын нэгдүгээр орлогч П.Сайнзориг, Нийслэлийн иргэдийн Төлөөлөгчдийн Хурлын нарийн бичгийн дарга бөгөөд Ажлын албаны дарга Б.Батбямба, Нийслэлийн Засаг даргын Тамгын газрын дарга Л.Хосбаяр болон алба хаагчид оролцлоо.

Зарим онцлог ажлаас дурдвал, Нийслэлийн Засаг дарга, Иргэдийн Төлөөлөгчдийн хурлын дарга болон дүүргийн нутгийн захиргааны байгууллагын дэмжлэгээр 103 автобусны буудал орчим 200  камерыг суурилуулж, дүүргүүдийн 15 хорооны 650 байршилд 1700 орчим хяналтын камерыг шинээр суурилуулах 5.5 тэрбум төгрөгний төсвийг шийдвэрлүүлж, камержуулах ажлыг эхлүүлсэн байна.

Эргүүлийн үйл ажиллагааг оновчтой зохион байгуулах, алба хаагчдын ажил, ачааллыг тэнцвэржүүлэх зорилгоор “Шөнийн эргүүлийн хэлтэс”-ийн нэршлийг “Эргүүл хяналтын хэлтэс” болгон дотоод нөөц бололцоогоо ашиглан 80 орон тоогоор нэмэгдүүлэн 150 гаруй алба хаагчид өдөр бүр эргүүлийн үүрэг гүйцэтгэж байна.

Энэ онд үргэлжлэн орсон бороо, үер усны аюулт үзэгдлээс иргэдийн амь бие, эд хөрөнгийг хамгаалах, эрэн хайх, үерт автсан айл өрх, иргэдийг нүүлгэн шилжүүлэх, тээврийн хэрэгслийн хөдөлгөөн хязгаарлах, чөлөөлөх ажилд 3000 гаруй алба хаагч, 200-аад тээврийн хэрэгсэлтэйгээр үүрэг гүйцэтгэжээ.

Бүртгэгдсэн гэмт хэрэг, зөрчлийн дуудлага, мэдээлэлд дүн шинжилгээ хийж, “ArcGIS” программыг гэмт хэргийн цахим зураглал үйлдэх, эргүүлийн чиглэл, байршлыг “Квадрат”-ын системд шилжүүлэн томилгоо, хүн хүчийг хувиарлан үйл ажиллагаандаа ашиглаж байна. 

Мөн алба хаагчдад эерэг хандлага төлөвшүүлэх, сахилга, ёс зүйн зөрчлөөс урьдчилан сэргийлэх зорилгоор “Эерэг хандлага-Хуульч ажиллагаа 2023” аяныг жилийн турш зохион байгуулж, аяны хүрээнд сар бүр дүүргийн цагдаагийн газар хэлтэстэй хамтран биеийн тамир спорт, соёл урлаг, уулзалт, зөвлөгөөн, хэлэлцүүлэг зэрэг арга хэмжээг хэрэгжүүлснээр сахилга, ёс зүйн зөрчил 27.6 хувиар буурсан эерэг үзүүлэлттэй байгаа юм.

Түүнчлэн төрийн болон төрийн бус байгууллагатай хамтран архи, согтууруулах ундааны хорт зурглаас татгалзуулах, архинд донтох, сэтгэцийн эмгэгийг эмчлэх зорилгоор 497 хүнийг эмчилгээнд хамруулан ажиллажээ.

Нийслэлийн хэмжээнд 23.405 гэмт хэрэг бүртгэгдэн мөрдөн шалгах ажиллагаа явуулснаас хөнгөн хэргийн илрүүлэлт 3.8, хүнд гэмт хэргийн илрүүлэлт 0.9 хувиар өссөн эерэг үзүүлэлттэй байна.

Иргэд, жуулчдын аюулгүй байдлыг хангах зорилгоор Нийслэлийн Иргэдийн Төлөөлөгчдийн Хурлын даргын энэ оны А/72 дугаар захирамжаар 150 оюутныг аялал жуулчлалын улиралд эргүүл, хяналт- шалгалтаар ажиллуулснаар гадаадын иргэн гэмт хэрэгт өртөж хохирсон дуудлага, мэдээлэл 63 хувиар буурсан үр дүнтэй ажил болов.

Ийнхүү өнөөдөр Цагдаагийн ерөнхий газар, Нийслэлийн цагдаагийн удирдах газрын 2023 оны “Хөдөлмөрийн, Тэргүүний болон Ажил мэргэжлийн шилдэг”-ээр 1 нэгж, 11 алба хаагч, нийслэлийн шилдэг газар, хэлтэс, алба хаагч шалгаруулах журмын дагуу ажлаараа бусдыгаа хошуучлан ажилласан 2 нэгж, 29 алба хаагчийг шагнаж, урамшуулсан юм.

Шагнагдсан алба хаагчдадаа баяр хүргэж, ажлын өндөр амжилт, эрүүл энх, сайн сайхан бүхнийг хүсье!