Цагдаагийн байгууллагад Дипломат байгууллага, банкны хамгаалалтын хэлтэс үүсэн байгуулагдсаны яруу алдарт 100 жилийн ойн баярын хурал, ёслол хүндэтгэлийн үйл ажиллагаа өнөөдөр /2023.11.17/ Цагдаагийн ерөнхий газрын “Сүлд” чуулгын танхимд зохион байгуулагдлаа.

Энэхүү ёслолын үйл ажиллагаанд Цагдаагийн ерөнхий газрын Дэд дарга, цагдаагийн хурандаа Т.Ганзориг, Төлөвлөлт, зохион байгуулалтын хэлтсийн дарга, цагдаагийн дэд хурандаа Г.Мөнгөншагай, Соён гэгээрүүлэх, албаны сургалтын хэлтсийн дарга, цагдаагийн хурандаа В.Отгонбаяр, Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Н.Лхагвасайхан болон даргын зөвлөлийн гишүүд, алба хаагчид болон түүхийн шаргал хуудсыг хамт бичилцсэн үе үеийн ахмад ажилтнууд оролцсон юм.

Ардын Цагдан сэргийлэх байгууллагаас 1923 онд Зөвлөлт Холбоот Улсын Тувагийн Элчин сайдын яамыг хамгаалалтад авсан түүхэн цаг хугацаагаар өнөөдрийн Эргүүл хамгаалалтын газрын Дипломат байгууллага, банкны хамгаалалтын хэлтсийн эхлэл тавигдсан түүхт ойгоо угтан “Хамтдаа бүтээсэн 100 жил” ном, “Бидний бүтээсэн 100 жил” дурсамж нэвтрүүлэг бүтээн “Харуулын цагдаа” дуугаа өлгийдөн авсныг хүндэт зочдодоо толилуулав.

Мөн энэ үеэр эрхэлсэн ажилдаа идэвх зүтгэл гарган ажилласан 57 алба хаагч, ажилтнууд төрийн одон, медаль, Цагдаагийн ерөнхий газар, бусад төрийн болон төрийн бус байгууллагын шагналаар энгэрээ мялаалаа.

Хүрэлцэн ирсэн хүндэт зочид, алба хаагчдад ЦЕГ-ын Сүлд чуулгын уран бүтээлчид урлагийн хэсэгчилсэн тоглолтоо толилуулсан юм.

Та бүхэнд яруу алдарт 100 жилийн ойн мэндийг хүргэж, амжилт бүтээлийн дээд, эрүүл энх, сайн сайхныг хүсэн ерөөе. Төр түвшин, түмэн олон минь амгалан байж, Монгол төрийн цагдаагийн сүр хүч, сүлд хийморь үүрд мандан бадрах болтугай!