Нийслэлийн цагдаагийн удирдах газраас Нийслэлийн иргэдийн Төлөөлөгчдийн хурал, Гэмт хэргээс урьдчилан сэргийлэх ажлыг зохицуулах салбар Зөвлөлийн дэмжлэгтэй Нийслэлийн Гэр бүл, хүүхэд, залуучуудын хөгжлийн газар, Тээврийн цагдаагийн алба, Экологийн цагдаагийн албатай хамтран гэр бүлийн хүчирхийлэлтэй тэмцэх чиглэлээр “Жаргалтай Гэр бүл” урьдчилан сэргийлэх, соён гэгээрүүлэх арга хэмжээний нээлтийг өнөөдөр /2023.10.18/ Нийслэлийн иргэний танхимд зохион байгууллаа.

Арга хэмжээнд дүүргийн хэсгийн ахлагч, нийгмийн ажилтан, хүүхэд хамгаалагч, иргэдийн төлөөлөл нийт 350 орчим хүн оролцсон бөгөөд уг арга хэмжээ нэг сарын хугацаанд үргэлжлэх юм.

Энэхүү арга хэмжээ нь бүртгэл, судалгаанд хамтрагдсан гэр бүлийн хүчирхийллийн эрсдэлтэй өрх айл, хүчирхийлэл дахин давтан үйлдэж болзошгүй этгээдэд нэгбүрчилсэн хяналт, зан үйлд нөлөөлөх сургалт, сэтгэл зүйн зөвлөгөө өгөх зэрэг ажил, арга хэмжээг үе шаттай эрчимжүүлэх, хамтарсан багуудыг чадавхжуулах зорилготой юм.  

Тодруулбал: Нийслэлийн хэмжээнд энэ оны эхний 09 сарын байдлаар гэр бүлийн хүчирхийллийн улмаас 602 гэмт хэрэг бүртгэгдэж, 521 иргэн хохирсноос 87.3 хувийг эмэгтэй, 11.3 хувийг хүүхэд эзэлж байна. Бүртгэгдсэн нийт гэмт хэргийг өмнөх оны мөн үетэй харьцуулахад 10.1 хувиар буурсан үзүүлэлттэй байна.

Гэр бүлийн хүчирхийлэл үйлдсэний улмаас 454 хүн сэжигтнээр тооцогдон шалгагдсаны 232 буюу 50.8 хувь нь согтууруулах ундааны зүйл хэрэглэсэн үедээ гэмт хэрэг үйлджээ.