Цагдаа, дотоодын цэргийн алба хаагчдыг чадавхжуулах, нийгмийн баталгааг хангах, суралцах нөхцөл боломжийг хангах, тогтвор суурьшилтай ажиллах нөхцөл боломжийг бүрдүүлэх зорилгоор “Алсын хараа-2050” Монгол улсын урт хугацааны хөгжлийн бодлогыг хэрэгжүүлэхэд миний гүйцэтгэх үүрэг” сэдэвт эсээ бичлэгийн уралдааныг зохион байгуулсан билээ.

Уралдаанд нийт 730 гаруй алба хаагч эсээ ирүүлснээс шилдгээр шалгарсан 50 алба хаагчид “Филиппин Улсад англи хэлний вакумжуулсан сургалтад” хамрагдах “Батламж” гардуулах үйл ажиллагаа өнөөдөр /2023.09.29/ Цагдаагийн ерөнхий газарт болов.

Энэхүү арга хэмжээнд Цагдаагийн ерөнхий газрын Дэд дарга, цагдаагийн хурандаа П.Оростогоо, МУ-ын Ерөнхий сайдын Ахлах зөвлөх бөгөөд Ажлын албаны дарга Д.Амгаланбаатар, Монгол улсын Засгийн газрын Хэрэг эрхлэх газрын дэргэдэх Удирдлагын академийн захирал Д.Сүрэнчимэг, алба хаагчид оролцсон юм.

Сонгон шалгаруулалтын шүүлтийн ажиллагааг зохион байгуулсан Монгол улсын Засгийн газрын Хэрэг эрхлэх газрын дэргэдэх Удирдлагын академийн захирал Д.Сүрэнчимэг хэлсэн үгэндээ: Та бүхний хичээл зүтгэлийн үр дүнд баярт мөчийг хуваалцаж байгаадаа таатай байна. Энэ бол шагнал гэхээсээ илүү та бүхний зүтгэл, холч харааны үр дүн юм. Амар тайван, хүнлэг, хүний эрхийг дээдэлсэн нийгмийг бүтээхэд Сингапур, Филиппин улсаас сурч ирсэн мэдлэг энэ нийгэмд харанга болон дэлдэх байх, хөгжлийг түүчээлж урагшлуулах шинэ санаанууд энэ танхимаас төрнө гэж итгэж байна. Та бүхэнд амжилт хүсье” хэмээв.

“Алсын хараа-2050” Монгол улсын урт хугацааны хөгжлийн бодлогыг хэрэгжүүлэхэд миний гүйцэтгэх үүрэг” эсээ бичлэгийн уралдаанд оролцсон нийт алба хаагчид болон “Батламж” гардан авсан та бүгдийн цаашдын ажилд амжилт хүсье!