Дотоод хэргийн Их сургуулийн төв номын сангийн эрдэм шинжилгээний фондын сан хөмрөгт хадгалагдаж байсан цагдаа, дотоодын цэргийн байгууллагын захиалгаар магистр, докторын зэрэг хамгаалсан алба хаагчдын магистрын дипломын ажлын эх хувь болон докторын ажлын сэдвийн жагсаалтыг Цагдаагийн ерөнхий газарт хүлээн авах ажлыг энэ оны 08 дугаар сарын 14-ний өдөр Цагдаагийн ерөнхий газрын хурлын зааланд зохион байгууллаа.

Арга хэмжээнд Цагдаагийн ерөнхий газрын дэд дарга, цагдаагийн хурандаа П.Оростогоо, Захиргааны удирдлагын газрын дарга, цагдаагийн хурандаа Л.Нямдаваа, Цагдаа, дотоодын цэргийн судалгааны төвийн дарга, цагдаагийн хурандаа Э.Идэрцог нар оролцон 2000 оноос хойш хамгаалсан нийт 483 докторын ажлын сэдвийн жагсаалт, 302 магистрын ажлын эх хувийг тус тус хүлээн авсан.

Цагдаагийн ерөнхий газрын даргын 2023 оны 07 дугаар сарын 24-ний өдрийн тушаалаар Цагдаа, дотоодын цэргийн судалгааны төвийг шинээр байгуулснаас хойш санаачлан хэрэгжүүлж буй энэхүү ажил, арга хэмжээ нь цаашид цагдаагийн байгууллагаас гэмт хэрэг, зөрчилтэй тэмцэх, нийтийн хэв журам хамгаалах, олон нийтийн аюулгүй байдлыг хангах талаар бодлогын судалгааны ажлын сан бүрдүүлэх, судлаач, алба хаагчидтай хамтран ажиллах, шаардлагатай судалгаа хийх ажлыг магистр, докторын сэдвийн хүрээнд урьдчилан авч хэлэлцэх, эрдэм шинжилгээ, судалгааны санал дүгнэлтийг практикт нэвтрүүлэхэд ач холбогдолтой.