Нэгдсэн Үндэстний байгууллагын Хүн амын сан, цагдаагийн байгууллага хамтран “Гэр бүлийн хүчирхийлэл, хүүхдийн эсрэг гэмт хэрэгтэй тэмцэх, урьдчилан сэргийлэх аргай зүй” сэдэвт бүсчилсэн сургалтыг нийслэлийн хэмжээнд зохион байгуулах ажлыг эхлүүллээ.

Сургалтыг Нийслэлийн цагдаагийн удирдах газрын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсийн дарга, цагдаагийн дэд хурандаа П.Болормаа нээж, сургалтад хамрагдаж буй нийт алба хаагчдад амжилт хүсэв.

Энэхүү бүсчилсэн сургалт нь Гэр бүлийн хүчирхийлэлтэй тэмцэх тухай, Хүүхдийн эрх болон Хүүхэд хамгааллын тухай хуулийн хэрэгжилтийг хангах, хохирогч төвтэй, хүүхдэд ээлтэй мөрдөн шалгах ажиллагаа мөн гэр бүл, хүүхдийн эсрэг хүчирхийллийн шинжтэй дуудлага, мэдээллийг шалгахад хүний эрхийн мэдрэмжтэй, ялангуяа хүүхдийн эрхийг хамгаалах ур чадварыг нэмэгдүүлэх, хохирогч хүүхэдтэй хэрхэн харилцах, хүүхэд хамгааллын хариу үйлчилгээнд хамруулах талаар харилцан туршлага солилцох, эрх бүхий алба хаагчдын эрх зүйн мэдлэг, чадварыг дээшлүүлэх, чадавхжуулах, төрийн болон төрийн бус байгууллагуудын ажлын уялдаа холбоог сайжруулах зорилготой юм.

“Гэр бүлийн хүчирхийлэл, хүүхдийн эсрэг гэмт хэрэгтэй тэмцэх, урьдчилан сэргийлэх арга зүй” сэдэвт сургалтад нийслэлийн дүүргийн цагдаагийн газар, хэлтсийн гэр бүлийн хүчирхийлэл, хүүхдийн асуудал хариуцсан алба хаагчид болон эрх бүхий 88 албан тушаалтан нар хамрагдаж байна.