Монгол Улсын Засгийн Газрын 2022 оны 417 дугаар тогтоолоор Мэргэжлийн хяналтын байгууллагын үйл ажиллагааг 2022 оны 12 дугаар сарын 31-ний өдөр татан буулгасантай холбогдуулан Цагдаагийн ерөнхий газрын дарга, Мэргэжлийн хяналтын ерөнхий газрын дарга нарын хамтарсан тушаалаар баталсан “Тэсэрч дэлбэрэх бодис, тэсэлгээний хэрэгслийн тээвэрлэлтийн аюулгүй ажиллагааны журам”-ыг шинэчлэн батлах шаардлага бий болсон.

Тэсэрч дэлбэрэх бодис, тэсэлгээний хэрэгслийн эргэлтэд хяналт тавих тухай хуулийн 14 дүгээр зүйлийн 14.7 дахь хэсэгт “Тэсэрч дэлбэрэх бодис, тэсэлгээний хэрэгслийн тээвэрлэлтийн аюулгүй ажиллагааны журмыг цагдаагийн төв байгууллага геологи, уул уурхайн асуудал эрхэлсэн төрийн захиргааны төв байгууллагатай хамтран батална.” гэж, Зөвшөөрлийн тухай хуулийн 8.2 дугаар зүйлийн 7.1 дэх хэсэгт “Цагдаагийн төв байгууллага нь тэсэрч дэлбэрэх бодис, тэсэлгээний хэрэгслийг тээвэрлэх энгийн зөвшөөрөл олгох”-оор тус тус заасны дагуу “Тэсэрч дэлбэрэх бодис, тэсэлгээний хэрэгслийн тээвэрлэлтийн аюулгүй ажиллагааны журам”-ын төслийн хэлэлцүүлэг  2023 оны 5 дугаар сарын 05-ны өдөр Дотоодын цэргийн 805 дугаар ангид зохион байгуулагдлаа.

Энэхүү хэлэлцүүлэгт Уул Уурхай Хүнд Үйлдвэрийн Яамны Салбарын хяналтын газар, Авто тээврийн үндэсний төв ТӨҮГ, Цагдаагийн ерөнхий газрын Хуулийн хэлтэс, Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах алба, Дотоодын цэргийн штаб, Дотоодын цэргийн 805 дугаар анги, аж ахуй нэгж байгууллагын төлөөлөл оролцож хэлэлцүүлгийг ажилттай зохион байгууллаа.