Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

ЦАГДААГИЙН АЛБАНЫ БОЛОН ДОТООДЫН ЦЭРГИЙН БАЙЛДААНЫ ТУГАНД ХҮНДЭТГЭЛ ҮЗҮҮЛЭХ, ЦАГДААГИЙН ТАНГАРАГ ДАВТАХ ЁСЛОЛЫН АЖИЛЛАГАА ХЭНТИЙ, ДОРНОД, СҮХБААТАР АЙМГУУДАД АМЖИЛТТАЙ ЗОХИОН БАЙГУУЛАГДЛАА

Цагдаагийн ерөнхий газрын дарга, Дотоодын цэргийн командлагчийн тушаалаар албаны үйл ажиллагааг сурталчлах, алба хаагчдын албандаа итгэх итгэл, албаараа бахархах, урам зоригийг сэргээх, өсвөр үе, хүүхэд залуучуудад тусгаар тогтнол, үндэсний эв нэгдэл, эрх чөлөөний үнэ цэнийг ойлгуулах, түүх соёлоо хайрлан хамгаалах, эх оронч иргэнийг төлөвшүүлэх зорилгоор Цагдаа, дотоодын цэргийн алба хаагчдын бахархал, үнэт зүйл болсон Цагдаагийн албаны болон Дотоодын цэргийн байлдааны туганд хүндэтгэл үзүүлэх, цагдаагийн болон цэргийн тангараг давтах ёслолын арга хэмжээг энэ оны 04 дүгээр сарын 11-ний өдрөөс эхлэн 21 аймагт зохион байгуулж байна.  
Энэхүү ёслол, хүндэтгэлийн арга хэмжээнд Цагдаа, Дотоодын цэргийн анги байгууллагын алба хаагчид оролцож байна.

"ТҮР ХАМГААЛАХ БАЙР"-НЫ БАРИЛГЫН ШАВ ТАВИХ ЁСЛОЛЫН АРГА ХЭМЖЭЭ БОЛЛОО

Хууль зүй, дотоод хэргийн яам, Нийслэлийн Иргэдийн Төлөөлөгчдийн хурал, Гэмт хэргээс урьдчилан сэргийлэх ажлыг зохицуулах салбар зөвлөл, Нийслэлийн Засаг даргын дэмжлэгтэй, Азийн хөгжлийн банкны санхүүжилттэй гэр бүлийн хүчирхийллийн хохирогчийн аюулгүй байдлыг хангах, тусламж үйлчилгээ үзүүлэх "Түр хамгаалах байр"-ны барилгын шав тавих ёслолын арга хэмжээ /2023.04.10/ боллоо.
Олон Улсын жишиг стандарт, Монгол Улсын MNS60:40 2019 стандартыг хангасан шинэ Түр хамгаалах байр нь гэр бүлийн хүчирхийллийн хохирогч иргэдийг нас, хүйс, хөгжлийн бэрхшээл, өндөр настан харгалзахгүй хүлээн авч үйлчлэх хүчин чадалтай ба сэтгэл зүйн, эрүүл мэндийн үйлчилгээ, бүлгийн болон ганцаарчилсан зөвлөгөө өгөх, амьдрах ухааны дадлага, сургалтын танхим, номын сан, чөлөөт цаг өнгөрүүлэх болон хүүхдийн тоглоомын өрөө, ахмад настан, хөгжлийн бэрхшээлтэй иргэдэд тусгайлан зориулсан өрөө тасалгаатай бөгөөд Монгол Улсын хэмжээнд шинэ загвар болохуйц барилгын тохижилттой юм.
Шав тавих ёслолын арга хэмжээнд Хууль зүй, дотоод хэргийн яамны Гэмт хэргээс урьдчилан сэргийлэх ажлыг зохицуулах Зөвлөлийн Ажлын албаны дарга Л.Нямгэрэл, Нийслэлийн Иргэдийн Төлөөлөгчдийн хурлын дарга бөгөөд Гэмт хэргээс урьдчилан сэргийлэх ажлыг зохицуулах салбар Зөвлөлийн дарга Ж.Батбаясгалан, Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат болон бусад албаны төлөөлөгчид оролцлоо.

“ХҮН БҮР БАЙГАЛЬ ХАМГААЛАГЧ” ЗӨВЛӨГӨӨН ЗОХИОН БАЙГУУЛАГДАЖ БАЙНА

Цагдаагийн байгууллагаас байгаль орчныг хамгаалах тухай хууль болон бусад холбогдох хууль, тогтоомж, салбарын бодлого, зорилтын хэрэгжилтийг хангах, байгууллага хоорондын уялдаа холбоог сайжруулах замаар хүрээлэн буй орчны тулгамдсан асуудлыг хамтран шийдвэрлэх арга замыг тодорхойлох, байгаль орчны эсрэг гэмт хэрэг, зөрчилтэй тэмцэх, иргэд олон нийтийн оролцоонд тулгуурласан урьдчилан сэргийлэх ажлын чанар үр нөлөөг дээшлүүлэх зорилгоор “Хүн бүр байгаль хамгаалагч” аяныг энэ сарын 15-ны өдрөөс эхлүүлэх гэж байгаатай холбогдуулан /2023.04.11/ “Хүн бүр байгаль хамгаалагч" зөвлөгөөнийг Нийслэлийн иргэний танхимд зохион байгууллаа.
Зөвлөгөөнийг Нийслэлийн гэмт хэргээс урьдчилан сэргийлэх ажлыг зохицуулах салбар зөвлөл, Цагдаагийн ерөнхий газрын Экологийн цагдаагийн алба, Нийслэлийн байгаль орчны газар хамтран зохион байгуулж байгаа юм.
Тус зөвлөгөөнөөр “Нийслэлийн байгаль орчны салбарт тулгамдаж буй асуудлууд, шийдвэрлэх арга зам”, “Байгаль орчныг хамгаалах тухай хууль болон бусад холбогдох хууль, тогтоомж салбарын бодлого, шийдвэрийн хэрэгжилт”, “Улаанбаатар хотын хог хаягдлын менежмент, цаашид авах арга хэмжээ”, “Орчны бохирдлоос үүдэлтэй, хүний эрүүл мэндэд үзүүлэх сөрөг нөлөө”, “Хүрээлэн байгаа орчны эсрэг гэмт хэрэг, зөрчлийн нөхцөл байдал, тухайн төрлийн гэмт хэрэг, зөрчлийг таслан зогсоох, урьдчилан сэргийлэх ажилд хүн бүрийн оролцоо чухал болох нь” сэдвүүдээр оролцогч байгууллагуудаас илтгэл, мэдээлэл тавьж нээлттэй асуулт хариулттайгаар арга хэмжээ үргэлжиллээ.

ГЭМТ ХЭРЭГ, ЗӨРЧЛӨӨС УРЬДЧИЛАН СЭРГИЙЛЭХ ЧИГ ҮҮРЭГ БҮХИЙ АЛБА ХААГЧДЫГ МЭРГЭШҮҮЛЭХ СУРГАЛТ ЗОХИОН БАЙГУУЛЛАА

Цагдаа, дотоодын цэргийн байгууллагын үйл ажиллагаа, гэмт хэрэг, зөрчлөөс урьдчилан сэргийлэх ажлыг иргэд, олон нийтэд сурталчлах чиг үүрэг бүхий алба хаагчдыг мэргэшүүлэх сургалтыг энэ оны 04 дүгээр сарын 10, 11-ний өдрүүдэд зохион байгууллаа.
Сургалтад албад, төв, орон нутгийн цагдаагийн газар, хэлтсийн 80 алба хаагчид танхим болон цахимаар хамрагдан нийтийн мэдээллийн ил тод байдлыг хангах, хүний хувийн мэдээллийг хамгаалах, байгууллага, алба хаагчдын үйл ажиллагаа, гэмт хэрэг, зөрчлөөс урьдчилан сэргийлэх чиглэлээр мэдээ, мэдээлэл бэлтгэх, иргэд, олон нийтэд сурталчлах талаар мэдлэг, чадвараа ахиуллаа. 
Сургалтад амжилттай хамрагдсан алба хаагчдад зохион байгуулагч нэгжийн удирдлагууд “ГЭРЧИЛГЭЭ” гардуулан өгч, ажилд нь амжилт хүслээ.

ГЭРЧ, ХОХИРОГЧИЙГ ХАМГААЛАХ ТУХАЙ ХУУЛЬ, ҮЙЛ АЖИЛЛАГААГ СУРТАЛЧЛАХ, ЭРХ ЗҮЙН ОЙЛГОЛТЫГ ТҮГЭЭХ СУРГАЛТЫГ ЗОХИОН БАЙГУУЛЖ БАЙНА

Цагдаагийн ерөнхий газрын Гэрч хохирогчийг хамгаалах хэлтсээс Сонгинохайрхан дүүргийн гэмт хэргээс урьдчилан сэргийлэх ажлыг зохицуулах салбар зөвлөлтэй хамтран хороо, өрхийн эмнэлэг, ерөнхий боловсролын сургуулийн нийгмийн ажилтан, эмч, ажилчдад Гэрч, хохирогчийг хамгаалах тухай хууль, үйл ажиллагааг сурталчлах, мэдээ мэдээлэлтэй болгох, иргэд, олон нийтэд эрх зүйн ойлголтыг түгээх сургалтыг энэ оны 04 дүгээр сарын 13, 14-ний  өдрүүдэд зохион байгуулж байна.
Тус сургалтыг зохион байгуулснаар гэр бүлийн хүчирхийлэлд өртсөн, хүчирхийллийг нуун дарагдуулсан болон өртөх эрсдэлтэй, үе тэнгийн дээрэлхэлт дарамт шахалтад өртсөн хүмүүсийг хамтарсан багийн гишүүд тэдэнд зөвлөгөө мэдээлэл өгөх, цагдаагийн байгууллагад мэдэгдэх, учирч болзошгүй эрсдэлээс урьдчилан сэргийлэх ач холбогдолтой юм.
Цаашид сургалтыг үе шаттайгаар жил бүр зохион байгуулах юм.