Дулааны улирал эхэлсэнтэй холбогдуулан шар усны үер, хуримтлагдсан хог хаягдлыг цэвэрлэх, хөрсний бохирдлыг бууруулах, орчны бохирдлоос үүдэлтэй халдварт өвчнөөс урьдчилан сэргийлэх, байгууллагын соёлыг иргэд, олон нийтэд сурталчлах, нийгмийн  хариуцлагын хүрээнд  өнөөдөр /2023.03.31/ 14:00 цагт “Эрүүл аюулгүй - Цэвэр орчин бүрдүүлэх” уриан доор Цагдаа, дотоодын цэргийн анги, байгууллагын   нийт алба хаагч, ажилтныг хамруулан бүх нийтийн их цэвэрлэгээг улс, орон даяар эхлүүллээ.

Тухайлбал Баянзүрх дүүргийн 26-р хороо Үндэсний цэцэрлэгт хүрээлэн, Баянзүрх дүүргийн 13-р хороо Офицеруудын тойрог орчим, Сүхбаатар дүүргийн 6-р хороо Жанжин Сүхбаатарын хөшөө, Сонгинохайрхан дүүргийн 16-р хороо Саппорогийн уулзвар, Налайх дүүргийн 2-р хороо Соёлын төвийн талбай, Завхан аймгийн Улиастай сум Жинст баг Хутагтын хүрээлэн, Увс аймгийн Улаангом сум Чандмань улаан уул зэрэг Улаанбаатар хот төдийгүй 21 аймгийн нийт 67 байршилд нэгэн зэрэг их цэвэрлэгээ хийлээ.

Монгол Улсын Үндсэн хуулийн холбогдох заалтаар хүн эрүүл, аюулгүй орчинд амьдрах, орчны бохирдол, байгалийн тэнцэл алдагдахаас хамгаалуулах эрхтэй болохыг тодорхойлсон байдаг. Үндсэн хуулийн энэ эрхийг хангах иргэдийн эрүүл, аюулгүй орчинд амьдрах эрхийг улам бүр баталгаажуулах үүднээс цагдаа, дотоодын цэргийн анги, байгууллага бүх нийтийн их цэвэрлэгээг зохион байгуулсан юм.