Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

“ХӨГЖЛИЙН АЛБАН ЁСНЫ БУЦАЛТГҮЙ ТУСЛАМЖ /OFFICIAL DEVELOPMENT ASSISTANCE-ODA/”-ААР САНХҮҮЖИХ ТӨСЛИЙН ХҮРЭЭНД БНСУ-ЫН ҮНДЭСНИЙ ЦАГДААГИЙН ГАЗАР, ТЕГҮ ХОТЫН ЦАГДААГИЙН ГАЗРЫН ТӨСЛИЙН ГИШҮҮД АЙЛЧЛАЛ ХИЙЛЭЭ

Монгол Улсын Цагдаагийн байгууллагын цахим сүлжээг өргөтгөх, дижитал нотлох баримт шинжлэх тоног, төхөөрөмж, хэрэгсэл, лабораторийг шинэчлэх, хар тамхи, мансууруулах бодистой тэмцэх чадавхыг бэхжүүлэх зорилгоор БНСУ-ын Засгийн газрын “Хөгжлийн албан ёсны буцалтгүй тусламж /Official Development Assistance-ODA/”-аар санхүүжих төслийг 2023-2027 онд хэрэгжүүлэх юм.

БНСУ-ын Үндэсний цагдаагийн газар, Тегү хотын цагдаагийн газраас Монгол Улсад айлчилж, төсөл хэрэгжүүлэхэд шаардагдах мэдээлэл цуглуулах зорилгоор ЦЕГ-ын Хар тамхитай тэмцэх газар, Эрүүгийн цагдаагийн албаны Kибер гэмт хэрэгтэй тэмцэх хэлтэс, Мэдээлэл дүн шинжилгээ, шуурхай удирдлагын албаны Цахим мэдээллийн аюулгүй байдлын хэлтэс, Гадаад харилцаа, энхийг сахиулах ажиллагааны хэлтсийн төлөөлөлтэй уулзаж төслийн ерөнхий төлөвлөгөө, хийгдэх ажлын талаар  санал солилцлоо.

ТУРК УЛСЫН ЦАГДААГИЙН БАЙГУУЛЛАГА, АРД ИРГЭДЭД СЭТГЭЛИЙН ДЭМ ӨГЧ, ХАНДИВ ТУСЛАМЖ ҮЗҮҮЛЭХ САЙН ДУРЫН АЯНЫГ ЗОХИОН БАЙГУУЛЛАА

Бүгд Найрамдах Турк Улсын зүүн өмнөд хэсгийн мужуудад болсон хүчтэй газар хөдлөлтийн улмаас олон мянган хүний эрдэнэт амь эрсдэж, иргэдийн орон байр нурж, их хэмжээний гарз хохирол учирсантай холбогдуулан тус улсын цагдаагийн байгууллага, ард иргэдэд сэтгэлийн дэм өгөх, хандив, тусламж үзүүлэх сайн дурын аяныг Цагдаа, дотоодын цэргийн байгууллагын хэмжээнд зохион байгууллаа.

Аяны хүрээнд цагдаа, дотоодын цэргийн 42 анги, байгууллагаас 30 гаруй нэр төрлийн эд зүйл /хувцас, хүүхдийн живх, гарын саван, барааны саван, шампунь/ болон 16,240,000 /арван зургаан сая хоёр зуун дөчин мянга/ төгрөг цугларсан юм.

Монгол Улс, Бүгд Найрамдах Турк Улсын цагдаагийн байгууллага хоорондын найрсаг харилцаа, хамтын ажиллагаа, харилцан дэмжлэг туслалцаа үзүүлэх ажлыг бэхжүүлэх зорилгоор аяны хүрээнд цугларсан эд зүйл, хандивын мөнгийг /2023.03.30/ өдөр Бүгд Найрамдах Турк Улсаас Монгол Улсад суугаа Онц бөгөөд бүрэн эрхт элчин сайд Зафер Атеш-д хүлээлгэн өглөө.

“БИЕИЙН ХҮЧ, ТУСГАЙ ТЕХНИК ХЭРЭГСЭЛ, ГАЛТ ЗЭВСЭГ ХЭРЭГЛЭХ БЭЛТГЭЛ ХАНГАХ СУРГАЛТ”-Д АМЖИЛТТАЙ ХАМРАГДСАН АЛБА ХААГЧДАД “ГЭРЧИЛГЭЭ” ГАРДУУЛЛАА

Цагдаагийн ерөнхий газрын дарга, Дотоодын цэргийн командлагчийн энэ оны А/42 дугаар тушаалаар “Цагдаа, дотоодын цэргийн алба хаагчдад биеийн хүч, тусгай техник хэрэгсэл, галт зэвсэг хэрэглэх бэлтгэл хангах, сурган дадлагажуулах сургалт”-д Улаанбаатар цагдаагийн хүрээний алба хаагчдыг энэ оны 03 дугаар сарын 15-ны өдрөөс эхлэн хамруулж эхэлсэн юм. Сургалтад амжилттай хамрагдсан алба хаагчдад “Гэрчилгээ” гардуулах арга хэмжээг /2023.03.30/ Цагдаа, дотоодын цэргийн Сургалтын нэгдсэн төвд зохион байгууллаа. Энэхүү арга хэмжээнд Цагдаа, дотоодын цэргийн Сургалтын нэгдсэн төвийн дарга, цагдаагийн хурандаа Б.Даваазул, мөн төвийн Захиргааны удирдлагын газрын дарга, цагдаагийн хурандаа Г.Наранбаатар, Дотоодын цэргийн штабын Дэд бөгөөд Ажиллагааны удирдлагын газрын дарга, хурандаа Н.Мөнх-Итгэл нар оролцов.

ДОТООДЫН ЦЭРГИЙН БАЙГУУЛЛАГЫН 2023 ОНЫ АВАРГА ШАЛГАРУУЛАХ “МАРШ-ТУСГАЙ БЭЛТГЭЛИЙН ЦОГЦОЛБОР ТЭМЦЭЭН" ЭХЭЛЛЭЭ

Төрийн цэргийн болон хууль сахиулах байгууллагын алба хаагчдын ёс зүй, бие бялдрын бэлтгэлжилтийг дээшлүүлэх хөтөлбөрийн хүрээнд Дотоодын цэргийн анги, байгууллагын бие бүрэлдэхүүний бие бялдар, мэргэжлийн ур чадвар, сэтгэл зүйн бэлтгэлийг дээшлүүлэн, хуулиар хүлээсэн үндсэн чиг үүргээ гүйцэтгэх чадавхыг нэмэгдүүлэх зорилгоор “Марш-тусгай бэлтгэлийн цогцолбор тэмцээн”-ийг зохион байгуулж байна. Энэхүү цогцолбор тэмцээн энэ сарын 30,31-ний өдрүүдэд Дотоодын цэргийн 05 дугаар анги, “Нарстай ам” дахь сургалтын хэсэгт зохион байгуулагдаж байгаа юм.

“ГЭР БҮЛИЙН ХАМААРАЛ БҮХИЙ ЭТГЭЭДЭЭС ҮЙЛДЭЖ БУЙ БЭЛГИЙН ХҮЧИРХИЙЛЭЛ БА ХҮҮХЭД ХАМГААЛАЛ” СЭДЭВТ ХЭЛЭЛЦҮҮЛЭГ ЗОХИОН БАЙГУУЛЛАА

ЦЕГ-ын Гэр бүлийн хүчирхийлэл, хүүхдийн эсрэг гэмт хэрэгтэй тэмцэх хэлтсээс Гэр бүлийн хамаарал бүхий харилцаатай хүнээс үйлдэж буй бэлгийн хүчирхийллийн гэмт хэргээс урьдчилан сэргийлэх, илрүүлэх, энэ төрлийн гэмт хэргийн талаарх олон нийтийн ойлголт, мэдлэгийг нэмэгдүүлэх, хохирогчийн эрх, хууль ёсны ашиг сонирхлыг хамгаалахад төрийн болон төрийн бус байгууллагын ажлын уялдаа холбоог сайжруулах зорилгоор “Гэр бүлийн хамаарал бүхий этгээдээс үйлдэж буй бэлгийн хүчирхийлэл ба хүүхэд хамгаалал” сэдэвт хэлэлцүүлгийг зохион байгууллаа.

Хэлэлцүүлэгт Цагдаагийн байгууллагын алба, нэгжийн алба хаагчид, Хүний эрхийн комисс, Нэгдсэн Үндэстний байгууллагын Хүн амын сан, Хөдөлмөр нийгмийн хамгааллын яамны Гэр бүлийн бодлогын хэрэгжилтэд зохицуулалтын газар, Гэр бүл, хүүхэд, залуучуудын хөгжлийн газар, Хүүхдийн эрхийн хэрэгжилтийн газар, Нийгмийн эрүүл мэндийн хүрээлэн, Сэтгэцийн эрүүл мэндийн үндэсний төв, Монголын эх барих эмэгтэйчүүдийн эмч нарын нэгдсэн холбоо, “Хөөрхөн зүрх” ТББ зэрэг 16 байгууллагын удирдлага, мэргэжилтнүүд оролцлоо.

Хэлэлцүүлгийн үеэр салбарын мэргэжилтнүүд гэр бүлийн хамаарал бүхий этгээдийн бэлгийн хүчирхийлэлд өртсөн хүүхдийг хамгаалахад тулгамдаж байгаа болон энэ төрлийн гэмт хэргээс урьдчилан сэргийлэх чиглэлээр хэрэгжүүлэхэд анхаарах асуудлыг хэлэлцэж, Цагдаа, Прокурор, Шүүхийн байгууллага, Гэр бүл, хүүхэд, залуучуудын хөгжлийн газар, хэлтэс, Хороодын Хамтарсан баг, бусад байгууллагуудад зориулсан зөвлөмж гарган, үйл ажиллагаандаа хэрэгжүүлэн ажиллахаар боллоо.