Эрүүгийн хэргийн илрүүлэлт, шийдвэрлэлтийг нэмэгдүүлэх, гэмт хэргээс урьдчилан сэргийлэх ажлын чиглэлээр цагдаа, прокурор, шүүхийн байгууллагын хамтарсан “Хангайн бүс”-ийн зөвлөгөөнийг Мөрдөн байцаах албанаас санаачлан 2023 оны 03 дугаар сарын 20-ны өдөр цахимаар зохион байгууллаа.

Зөвлөгөөнд Мөрдөн байцаах албаны дарга, Дүн шинжилгээ, үнэлгээ, хяналт шалгалтын хэлтсийн дарга, зөвлөлийн гишүүд, Архангай, Орхон, Хөвсгөл, Булган, Өвөрхангай, Баянхонгор зэрэг 6 аймгийн ерөнхий шүүгч, шүүгч, ерөнхий прокурор, орлогч прокурор, нутаг дэвсгэр хариуцсан цагдаагийн газрын дарга, дэд дарга, мөрдөн байцаах тасгийн дарга нар болон алба хаагчид хамрагдаж, нийт 119 алба хаагч 25 байршлаас цахимаар оролцлоо.

Энэхүү зөвлөгөөнийг зохион байгуулж буйд орон нутгийн шүүх, прокурорын байгууллагын ерөнхий шүүгч, ерөнхий прокурорууд баярлаж талархсанаа илэрхийлж, тодорхой саналуудыг дэвшүүллээ.Тухайлбал: Баянхонгор аймгийн Эрүүгийн хэргийн анхан шатны шүүхийн шүүгч “Мөрдөгч нарын ур чадварыг нэмэгдүүлэхэд анхаарах”, Архангай аймгийн эрүүгийн хэргийн анхан шатны шүүхийн ерөнхий шүүгч “Мөрдөгчийн гаргасан таслан сэргийлэх арга хэмжээ авах саналыг шуурхай шийдвэрлэх”, Хөвсгөл аймгийн Прокурорын газрын ерөнхий прокурор зөвлөгөөнөөс гарах шийдвэрийг хэрэгжүүлж ажиллах, Булган аймгийн прокурорын газрын ерөнхий прокурор мэдүүлэг авах өрөөний техник хэрэгслийг сайжруулах, Булган аймгийн эрүүгийн хэргийн анхан шатны шүүхийн ерөнхий шүүгч “Хохирогч, иргэний нэхэмжлэгчээр хэрхэн тогтоох” зэрэг асуудлуудаар санал гаргалаа.

Мөн Цагдаагийн байгууллагаас 6, шүүх, прокурорын байгууллагаас 2 мэдээлэл, танилцуулга хийж, тодорхой асуудлуудыг дэвшүүлэн цаашид саналуудыг нэгтгэн, орон нутгийн шүүх, прокурорын байгууллагуудад танилцуулж, зөвлөмж гарган үйл ажиллагаандаа хэрэгжүүлэн ажиллахаар боллоо.