Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

ЦАГДААГИЙН АЛБА ХААГЧИД ШАТАЖ БАЙСАН ГЭРЭЭС ИРГЭНИЙ АМЬ АВАРЧЭЭ

Энэ оны 03 дугаар сарын 04-ний өдөр Сонгинохайрхан дүүргийн 28 дугаар хорооны нутаг дэвсгэр Ногоон Чулуутын дугаар тоотод айлын гэр шатаж байхад Сонгинохайрхан дүүргийн цагдаагийн газрын 2 дугаар хэлтсийн алба хаагчид цагдаагийн ахлагч О.Одбаяр, цагдаагийн дэслэгч Ц.Содбилэгийн хамт иргэн "Н"-ыг шатаж буй гэрээс гаргаж амь насыг нь аварлаа.

Цагдаагийн дэслэгч Ц.Содбилэг, цагдаагийн ахлагч О.Одбаяр нар хэлтэс дээрээ албан үүргээ гүйцэтгэж байхдаа хэлтсийн цонхоор айлын хашаанаас их хэмжээний утаа гарч байхыг хараад газар дээр нь очиход айлын гэр шатаж байжээ. Тэд гэр дотор хүн байгааг мэдээд даруй яаралтай нэвтрэн орж амь насыг нь аврахаар ажилласан байна.

ЭМЭГТЭЙ АЛБА ХААГЧИД УРЛАГИЙН ТОГЛОЛТ ҮЗЭЖ СОНИРХЛОО

“Олон улсын эмэгтэйчүүдийн эрхийг хамгаалах өдөр”-ийг тохиолдуулан Цагдаагийн ерөнхий газрын төв байрны харьяа нэгжийн эмэгтэй алба хаагчдыг хүлээн авч, хүндэтгэл үзүүллээ. Энэхүү арга хэмжээг  2023 оны 03 дугаар сарын 07-ний өдөр Цагдаагийн ерөнхий газрын Сүлд чуулгын танхимд зохион байгуулж, тус чуулгын эрэгтэй уран бүтээлчид урлагийн тоглолт үзэж сонирхуулсан юм.

МӨРДЭСТЭЙ БҮСГҮЙЧҮҮД ТЭМЦЭЭНД АВЬЯАС ЧАДВАРАА СОРИН ӨРСӨЛДЛӨӨ

Монгол Улсын Зэвсэгт хүчний 102 жил, "Монгол цэргийн өдөр", Олон Улсын эмэгтэйчүүдийн эрхийг хамгаалах өдрийг угтан Төрийн цэргийн болон Хууль сахиулах 5 байгууллагуудын дунд зохион байгуулагдсан "МӨРДЭСТЭЙ БҮСГҮЙЧҮҮД" тэмцээнд Сэлэнгэ аймгийн цагдаагийн газрын тооцооны нягтлан бодогч, цагдаагийн дэслэгч Б.Үүрцайх ахлагчтай "Шонхрууд" баг амжилттай оролцлоо.

АНУ-ААС МОНГОЛ УЛСАД СУУГАА ЭЛЧИН САЙДЫН ЯАМНЫ БҮС НУТГИЙН АЮУЛГҮЙ БАЙДАЛ ЭРХЭЛСЭН АТТАШЕ НОЁН ЖОЭЛ ОРТЕЗИЙГ ХҮЛЭЭН АВЧ УУЛЗЛАА

Дотоодын цэргийн штабын дарга, бригадын генерал Р.Чингис Америкийн Нэгдсэн Улсаас Монгол Улсад суугаа Элчин сайдын яамны Бүс нутгийн аюулгүй байдал эрхэлсэн Атташе ноён Жоэл Ортезийг 2023 оны 03 дугаар сарын 09-ний өдөр хүлээн авч уулзлаа. Уулзалтад Америкийн Нэгдсэн Улсаас Монгол Улсад суугаа Элчин сайдын яамны Бүс нутгийн аюулгүй байдлын ахлах ажилтан Б.Сэргэлэн, АНУ-ын Төрийн департментийн мансууруулах бодис, Хууль сахиулах асуудал эрхэлсэн олон улсын товчооны хөтөлбөрийн зохицуулагч Ц.Эрдэнэхишиг, Дотоодын цэргийн штабын орлогч, Харуул хамгаалалтын хэлтсийн дарга, дэд хурандаа Н.Мөнх-Итгэл, Цагдаагийн ерөнхий газрын Гадаад харилцаа, энхийг дэмжих ажиллагааны хэлтсийн ахлах мэргэжилтэн, цагдаагийн хурандаа П.Даваажав нар оролцов. Уулзалтын үеэр Монгол Улсын Дотоодын цэрэг, Америкийн Нэгдсэн Улсын Үндэсний гвард болон бусад ижил чиг үүрэг бүхий байгууллагуудын хамтын ажиллагааг хөгжүүлж өргөжүүлэх, алба хаагчдыг сургаж бэлтгэх болон цаашдын хамтын ажиллагааны талаар санал солилцлоо.

МОНГОЛЫН ХУУЛЬЧДЫН ХОЛБООТОЙ ХАМТРАН АЖИЛЛАХ САНАМЖ БИЧИГ БАЙГУУЛЛАА

Цагдаагийн ерөнхий газар, Монголын Хуульчдын холбоотой гэрч, хохирогчийг хамгаалах чиглэлээр хамтран ажиллах санамж бичиг байгуулах арга хэмжээ энэ оны 03 дугаар сарын 09-ний өдөр боллоо. Энэхүү санамж бичигт Монголын Хуульчдын холбооны ерөнхийлөгч П.Одгэрэл, Цагдаагийн ерөнхий газрын Гэрч, хохирогчийг хамгаалах хэлтсийн дарга, цагдаагийн хурандаа Б.Буянтөр нар гарын үсэг зурж баталгаажуулсан юм.

Арга хэмжээнд Цагдаагийн ерөнхий газрын Гэрч, хохирогчийг хамгаалах хэлтсийн Аюулгүй байдал хамгаалалтын тасгийн дарга, цагдаагийн хошууч Н.Мөнхбат, Монголын Хуульчдын холбооны Тамгын газрын дарга Ш.Жолбарс, Эрүүгийн эрх зүйн хорооны тэргүүн Г.Оюунболд, Төлбөрийн чадваргүй иргэдэд хууль зүйн туслалцаа, өмгөөллийн үйлчилгээ үзүүлэх асуудал эрхэлсэн хорооны тэргүүн Р.Булгамаа, Хуульчийн нийтэд тустай мэргэжлийн үйл ажиллагаа эрхэлсэн хорооны тэргүүн Г.Цагаанбаяр нар оролцов.

Дээрх санамж бичгийн хүрээнд гэрч, хохирогч, иргэдэд хууль зүйн туслалцаа үзүүлэх, хуульчийн үргэлжилсэн сургалт хамтран зохион байгуулах, судалгаа хийх, төсөл, хөтөлбөр хэрэгжүүлэх, эрдэм шинжилгээ, онол, практикийн бүтээл хамтран туурвих, хуульчдын эрх, хууль ёсны ашиг сонирхлыг хамгаалах, үйл ажиллагаанд дэмжлэг үзүүлэх чиглэлээр хамтран ажиллах юм.