Энэ долоо хоногт цагдаа, дотоодын цэргийн байгууллагаас зохион байгуулсан ОНЦЛОХ үйл явдлыг тоймлон хүргэж байна

ГИМНАСТИКИЙН АВАРГА ШАЛГАРУУЛАХ ТЭМЦЭЭН ЗОХИОН БАЙГУУЛЖ БАЙНА

Жанжин Д.Сүхбаатарын нэрэмжит, Сүхбаатарын ба Цэргийн гавьяаны улаан туг, Цэргийн гавьяаны одонт Дотоодын цэргийн 05 дугаар ангийн бие бүрэлдэхүүн, “Одонт хороо ахмадын зөвлөл”, Дотоодын цэргийн штабтай хамтран Их Жанжин Д.Сүхбаатарын мэндэлсний 130 жилийн ой, Дотоодын цэргийн 05 дугаар ангийн 101 жилийн ойн арга хэмжээний хүрээнд хөшөөнд “Цэцэг өргөх” цэргийн ёслол хүндэтгэлийн ажиллагаа, “Одонт хороо” ахмадын зөвлөлийн нэрэмжит “Жанжин Сүх шиг хийцгээе” цэрэгжлийн гимнастикийн аварга шалгаруулах тэмцээний нээлтийн үйл ажиллагааг зохион байгууллаа.

Тэмцээний нээлтийн ажиллагааны үеэр “Монголын гимнастикийн холбоо”-ны тамирчдын үзүүлэх тоглолт болон урлагийн тоглолтуудыг толилуулж, хүндэт зочид ангийн “Цэргийн байр”, “Дайчин алдрын танхим”-тай танилцлаа.

Энэхүү тэмцээнд Дотоодын цэргийн анги, салбар, орон нутгийн тусгай салбаруудын 90 гаруй тамирчид өрсөлдөж байгаа юм.

“ЭРҮҮЛ БИЕД-САРУУЛ УХААН ОРШИНО” ӨДӨРЛӨГ ЗОХИОН БАЙГУУЛЛАА

Тээврийн цагдаагийн албанаас “Монос” ХХК-тай хамтран алба хаагчдад эрүүл мэндийн боловсрол олгох, анхан шатны үзлэг, зөвлөгөө өгөх зорилгоор “Эрүүл биед-саруул ухаан оршино” өдөрлөгийг харьяа нэгжийн болон нийслэлийн 6 дүүргийн цагдаагийн газрын Замын цагдаагийн хэлтсийн 350 алба хаагчдыг хамруулан зохион явууллаа.

Дээрх үйл ажиллагааны хүрээнд алба хаагчдад мэргэжлийн эмч нар анхан шатны зөвлөгөө өгөх, цусны даралт хэмжих, цусан дахь сахрын хэмжээг тодорхойлох, ясны сийрэгжилтийг тодорхойлох, биологийн нас, булчингийн масс, бие дэх усны түвшин, дотор өөхлөлт, био энергийн оношилгоо зэргийг тусгай зориулалтын аппаратаар тодорхойлох үйлчилгээг үзүүлж, алба хаагчдад амин дэмийн ач холбогдол, витамины зөв зохистой хэрэглээний талаар сургалт зохион байгууллаа.

ДАРТСЫН АВАРГА ШАЛГАРУУЛАХ ТЭМЦЭЭН ЗОХИОН БАЙГУУЛЛАА

Нийтийн хэв журам хамгаалах, олон нийтийн аюулгүй байдлыг хангах албаны тэмдэглэлт өдрийг угтан зохион байгуулсан “Дартс”-ын аварга шалгаруулах тэмцээн зохион байгууллаа. Тэмцээнд алба хаагчид багийн болон ганцаарчилсан төрлөөр өрсөлдөн цэц мэргэнээ сорилоо.

Энэхүү тэмцээнийг албаны тэмдэглэлт өдрийг угтахаас гадна алба хаагчдын дунд дартсын спортыг сурталчлах, түгээн дэлгэрүүлэх, биеийн болон оюуны алжаалыг тайлах, мөн 2023 онд цагдаа, дотоодын цэргийн анги байгууллагуудын дунд зохион байгуулагдах “Дартс”-ын тэмцээнд оролцох алба хаагчдыг сонгон шалгарууллаа.

Тэмцээнд амжилттай оролцсон дартсын спортыг сонирхогч алба хаагчид та бүхний хараа хурц, сум мэргэн, ухаан тэнүүн байхыг ерөөе.

ХҮҮХДИЙН ЭСРЭГ ХҮЧИРХИЙЛЭЛ, ОСОЛ ГЭМТЛЭЭС УРЬДЧИЛАН СЭРГИЙЛЭХ ҮЗҮҮЛЭН БЭЛТГЭН ИРГЭД, ОЛОН НИЙТЭД ТҮГЭЭЛЭЭ

Дундговь аймгийн цагдаагийн газраас аймгийн Гэр бүл, хүүхэд, залуучуудын хөгжлийн газар, Онцгой байдлын газартай хамтран эцэг эх, асран хамгаалагчдын хүүхдэдээ тавих анхаарал, хараа хяналтыг сайжруулах, хүүхдийг болзошгүй осол гэмтэл, цахим орчны эрсдэлээс урьдчилан сэргийлэх, эрүүл аюулгүй, амьдралын зөв дадлыг гэр бүлийн орчинд хэвшүүлж, эцэг эхийн үүрэг хариуцлагыг нэмэгдүүлэх зорилгоор эцэг, эхчүүдэд зориулсан зөвлөгөө, зөвлөмж бүхий үзүүлэн бэлтгэн иргэд, олон нийтэд хүргэлээ. Мөн эцэг эх, асран хамгаалагч болон багш, сурган хүмүүжүүлэгчдэд хүүхэдтэй ажиллах арга зүй, хүмүүжлийн эерэг арга, хандлагыг төлөвшүүлэх зорилгоор “САЙН ЭЦЭГ,ЭХ” сургалтыг 220 эцэг, эх асран хамгаалагчийг хамруулан зохион байгууллаа.

ЦАГДААГИЙН ХОШУУЧ Б.ЭРДЭНЭДАЛАЙ ДОКТОРЫН ЗЭРГЭЭ АМЖИЛТТАЙ ХАМГААЛЛАА

ЦЕГ-ын Гадаад харилцаа, энхийг сахиулах ажиллаагааны хэлтсийн дарга, цагдаагийн хошууч Б.Эрдэнэдалай өнөөдөр /2023.01.27/ “Хар тамхитай тэмцэх байгууллагын үйл ажиллагааны хяналтад хийсэн дүн шинжилгээ” сэдвээр докторын зэргээ амжилттай хамгааллаа.

Цагдаагийн хошууч Б.Эрдэнэдалай нь цагдаагийн байгууллагад 16 дахь жилдээ ажиллаж байна.

Ажиллах хугацаандаа АНУ-д хууль зүйн ухааны магистр хамгаалсан, Өмнөд Судан Улсад Цагдаагийн байгууллагаас энхийг сахиулах ажиллагаанд  анхны удаа үүрэг гүйцэтгэсэн юм.

Докторын зэргээ амжилттай хамгаалсан танд баяр хүргэж, цаашдын ажилд нь амжилт хүсье!